ព័ត៌មានផ្សេងៗទៀត
ឯកឧត្ដមរដ្ឋលេខាធិការ ហ៊ាន វណ្ណហន អញ្ជើញដឹកនាំមន្រ្ដីជំនាញចុះពិនិត្យ ស្ថានភាពផលិតកម្មផ្លែឈើ បន្លែ និងសក្ដានុពលជំរុញការគាំទ្រ នៅខេត្តចំនួនពីរ
ចេញផ្សាយ ២៨ កុម្ភៈ ២០២៥ 2943
នៅថ្ងៃទី២៦ ដល់ថ្ងៃទី២៧ ខែកុម្ភ: ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការ ក្រសួងកសិកម្មរុក្ខាប្រមាញ់ និងនេសាទ បានដឹកនាំមន្រ្ដីជំនាញ ចុះពិនិត្យស្ទាបស្ទង់ស្ថានភាពផលិតកម្មផ្លែឈើ បន្លែ និងសក្ដានុពលជំរុញការគាំទ្រ នៅខេត្ដព្រៃវែង និងខេត្តស្វាយរៀង។
នាឱកាសជួបពិភាក្សានោះ ឯកឧត្តមរដ្ឋលេខាធិការ បានគូសបញ្ជាក់ណែនាំតម្រង់ទិសដល់មន្ទីរកសិកម្មនៃខេត្តទាំងពីរ នូវចំណុចមួយចំនួនដូចជា៖ ទី១.ត្រូវយកចិត្តទុកដាក់ ជំរុញតាមយន្តការ ក្រុមអ្នកផលិត សហគមន៍កសិកម្ម ឬសហគមន៍កសិកម្មទំនើបក្នុងផលិតកម្មបន្លែ និងផ្លែឈើ ដែលមានលក្ខណៈសមស្របក្នុងការទទួលយកការគាំទ្រពីគម្រោង កម្មវិធីរបស់ក្រសួង និងដៃគូរអភិវឌ្ឍ។
ទី២. ជំរុញបង្កើនផលិតកម្មក្រៅពីដំណាំស្រូវ ដែលផ្តល់ចំណូលដល់កសិករច្រើនជាងមុន ក្នុងពេលដែលផលិតកម្មស្រូវសរុបរបស់កម្ពុជា មានរហូតជាង ១៤លានតោន នាឆ្នាំ២០២៥នេះ ទី៣.ចុះពិនិត្យវាយតំលៃវឌ្ឍនភាពសហគមន៍កសិកម្មដែលមានស្រាប់ និងបន្តជួយគាំទ្របច្ចេកទេស ការគ្រប់គ្រង និងការងារទីផ្សារ ចំពោះសហគមន៍ដែលមានសក្តានុពល តាមរយៈកញ្ចប់ថវិការបស់មន្ទីរ និងគម្រោងផ្សេងៗ និងពិនិត្យលទ្ធភាពប្រែក្លាយជាសហគមន៍កសិកម្មទំនើប។
បន្ទាប់ពីកិច្ចប្រជុំនៅមន្ទីរកសិកម្មខេត្ដនៃទាំងពីរ ឯកឧត្តមរដ្ឋលេខាធិការ និងមន្ត្រីជំនាញបានបន្តចុះពិនិត្យ ស្ថានភាពផលិតកម្ម បន្លែ ផ្លែឈើ និងដំណាំរួមផ្សំ ក៏ដូចជាទីតាំងប្រមូលទិញ នៅតាមចម្ការ ២ទីតាំង នៅស្រុកពាមរក៍ ខេត្ដព្រៃវែង និងចម្ការដំណាំបន្លែ ២ទីតាំង និងកន្លែងប្រមូលទិញបន្លែ១កន្លែង នៅស្រុកស្វាយជ្រុំ ខេត្ដស្វាយរៀង។
ជាចុងបញ្ចប់ក្នុងដំណើរចុះជួបកសិករ ឯកឧត្តមបានផ្តល់អនុសាសន៍ណែនាំ ពីការដោះស្រាយបញ្ហាបច្ចេកទេស និងបញ្ហាទីផ្សារ ។ ចំណែកការពិភាក្សាជាមួយថ្នាក់ដឹកនាំសហគមន៍កសិកម្ម ឯកឧត្ដម បានលើកទឹកចិត្ដឱ្យអ្នកពាក់ព័ន្ធទាំងអស់ពង្រឹងខ្លួនឯង បន្ដកិច្ចសហការណ៍ល្អជាមួយមន្ទីរកសិកម្មខេត្ដ ដែលជាសេនាធិការរបស់ក្រសួងកសិកម្ម លើការងារបច្ចេកទេសដាំដុះ (ការប្រើប្រាស់ធាតុចូលកសិកម្ម) ផែនការច្បាសលាស់ក្នុងការផលិត(ផ្គង់ផ្គង់បានទៀងទាត់ ទាំងគុណភាព និងបរិមាណ) បង្កើនប្រសិទ្ធភាពផលិតកម្ម និងការឆ្លើយតបទៅនឹងតម្រូវការទីផ្សារ (ការចុះកិច្ចសន្យាទិញ-លក់)ជាដើម៕
