ឯកឧត្តមរដ្ឋមន្រ្តី វេង សាខុន បានទទួលជួបពិភាក្សាការងារជាមួយ ឯកឧត្តម Ma Yi អគ្គនាយកការិយាល័យពង្រឹងការអនុវត្តច្បាប់ជលផលនៅទន្លេយ៉ាងសេ នៅឯទីស្តីការក្រសួង ដើម្បីពិភាក្សាពីគម្រោងកិច្ចសហប្រតិបត្តិការលើការអភិវឌ្ឍវារីវប្បកម្មនិងការគ្រប់គ្រងធនធានជលផលនៅកម្ពុជា

ចេញ​ផ្សាយ​ ៣ កក្កដា ២០១៨ 3649

នៅវេលាម៉ោង៤ រសៀលថ្ងៃច័ន្ទ ៥រោច ខែបឋមាសាឍ ឆ្នាំច សំរឹទ្ធិស័ក ព.ស.២៥៦២ ត្រូវនឹងថ្ងៃទី០២ ខែកក្កដា ឆ្នាំ២០១៨ ឯកឧត្តម វេង សាខុន រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានទទួលជួបពិភាក្សាការងារជាមួយ ឯកឧត្តម Ma Yi អគ្គនាយកការិយាល័យពង្រឹងការអនុវត្តច្បាប់ជលផលនៅទន្លេយ៉ាងសេ នៅឯទីស្តីការក្រសួង ដើម្បីពិភាក្សាពីគម្រោងកិច្ចសហប្រតិបត្តិការលើការអភិវឌ្ឍវារីវប្បកម្មនិងការគ្រប់គ្រងធនធានជលផលនៅកម្ពុជា។
ថ្លែងនៅក្នុងជំនួបនេះ ឯកឧត្តមរដ្ឋមន្រ្តី បានសម្តែងនូវក្តីរីករាយ និងថ្លែងអំណរគុណយ៉ាងជ្រាលជ្រៅចំពោះឯកឧត្តម Ma Yi ដែលបានអញ្ជើញចូលរួមក្នុងទិវាមច្ឆជាតិ កាលពីថ្ងៃទី០១ ខែកក្កដា ឆ្នាំ២០១៨ កន្លងទៅនេះ។ ឯកឧត្តមរដ្ឋមន្រ្តី បានបញ្ជាក់បន្ថែមថាកិច្ចសហប្រតិបត្តិការ មេគង្គឡាងឆាង មានសារសំខាន់ក្នុងការថែរក្សាធនធានជលផល ថែមទាំងផ្តល់អត្ថប្រយោជន៏ជាច្រើនដល់ប្រជាជន និងពាណិជ្ជកម្ម ហើយសង្ឃឹមថានឹងមានការផ្លាស់ប្តូរពាណិជ្ជកម្មត្រីរវាងគ្នាទៅវិញទៅមកក្នុងពេលដ៏ខ្លីខាងមុខនេះ។
ឆ្លៀតក្នុងឱកាសនេះ ឯកឧត្តម Ma Yi បានថ្លែងអំណរគុណដល់ ឯកឧត្តមរដ្ឋមន្រ្តី និងក្រសួងកសិកម្ម រុក្ខាប្រមាញ់ និងនេសាទ ដែលបានផ្តល់កិច្ចសហការយ៉ាងជិតស្និទ្ធជាមួយនឹងក្រសួងកសិកម្មចិន។ ឯកឧត្តមបានបន្តថា រាជរដ្ឋាភិបាលកម្ពុជាបានដាក់ចេញនូវគោលនយោបាយដ៏ត្រឹមត្រូវ ក្នុងការរក្សាបាននូវផលចាប់ពីការនេសាទក្នុងរង្វង់ ៦០០ ០០០តោនក្នុងមួយឆ្នាំ និងជំរុញការអភិវឌ្ឍវារីវប្បកម្ម។ ទន្ទឹមនឹងនេះ ឯកឧត្តមបានបញ្ជាក់ពីជំហរយ៉ាងច្បាស់ថា ឯកឧត្តមនឹងបន្តពង្រឹងកិច្ចសហប្រតិបត្តិការជាមួយក្រសួងកសិកម្ម រុក្ខាប្រមាញ់ និងនេសាទឲ្យកាន់តែស៊ីជម្រៅ ដោយឯកឧត្តមគ្រោងនឹងអញ្ជើញថ្នាក់ដឹកនាំ និងមន្រ្តីជំនាញក្រសួង ទៅទស្សនកិច្ចការវិវឌ្ឍបច្ចេកវិទ្យានិងបច្ចេកទេសថ្មីៗក្នុងការអភិវឌ្ឍវារីវប្បកម្មនៅប្រទេសចិន ព្រមទាំងស្នើឲ្យភាគីកម្ពុជាសិក្សាពីតម្រូវការបច្ចេកទេស ដែលកម្ពុជាកំពុងមានការខ្វះខាត និងស្នើទៅឯកឧត្តម ដើម្បីឯកឧត្តមពិនិត្យពីលទ្ធភាពក្នុងការគាំទ្រ។ ឯកឧត្តម ក៏បានបញ្ជាក់ផងដែថា កិច្ចសហប្រតិបត្តិការមេគង្គឡាងឆាង នឹងជំរុញនូវការបង្កើនឡើងនូវផលស្តុកធនធានជលផល ការកសាងសមត្ថភាពធនធានមនុស្ស និងទិន្នផលវារីវប្បកម្ម។ ជាចុងក្រោយ ឯកឧត្តម ក៏បានអញ្ជើញថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ទៅចូលរួមវេទិកាស្តីពីការគ្រប់គ្រងធនធានជលផល និងការអភិវឌ្ឍវារីវប្បកម្មនៅក្នុងតុលា ឆ្នាំ២០១៨ នាខេត្តវូហាន់ នៃសាធារណរដ្ឋប្រជាមានិតចិន។