ឯកឧត្តមអនុរដ្ឋលេខាធិការ ឡោ រស្មី អញ្ជើញជាអធិបតីក្នុងពិធីបើកវគ្គបណ្តុះបណ្តាលពង្រឹងសមត្ថភាពវិជ្ជាជីវៈសម្រាប់អាជីវករជី-ថ្នាំកសិកម្ម ក្នុងខេត្តតាកែវ

ចេញ​ផ្សាយ​ ២៨ មេសា ២០២៦ 4629

នាព្រឹកថ្ងៃទី២៧ ខែមេសា ឆ្នាំ២០២៦ ឯកឧត្តម ឡោ រស្មី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលពង្រឹងសមត្ថភាពវិជ្ជាជីវៈសម្រាប់អាជីវករជី-ថ្នាំកសិកម្ម ចំនួន៩៦នាក់ នៅខេត្តតាកែវ ដោយមានការចូលរួមពីតំណាងថ្នាក់ដឹកនាំរដ្ឋបាលខេត្ត អគ្គនាយកដ្ឋានក្សេត្រសាស្រ្ត មន្ទីរកសិកម្មខេត្ត និងសហការី ។  
នៅចំពោះមុខអង្គពិធី ឯកឧត្តមអនុរដ្ឋលេខាធិការ បានជម្រាបជូនអាជីវករដែលជាសិក្ខាកាមអំពីវឌ្ឍនភាពថ្មីៗនៃវិស័យកសិកម្ម និងការបន្តយកចិត្តទុកដាក់ខ្ពស់របស់ក្រសួងកសិកម្ម រុក្ខាប្រមាញ់ និងនេសាទ ចំពោះវិស័យកសិកម្ម និងប្រជាកសិករ ក្រោមការដឹកនាំរបស់ឯកឧត្តមរដ្ឋមន្រ្តី ឌិត ទីណា តាមរយៈការដាក់ចេញនូវគោលនយោបាយ “មានហូប មានប្រើ មានបាន និងមានរហូត” និងយុទ្ធសាស្រ្តបញ្ចកោណរបស់រាជរដ្ឋាភិបាលនីតិកាលទី៧នៃរដ្ឋសភា ក្រោមការដឹកនាំដ៏ឈ្លាសវៃ និងស្វាហាប់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី តាមរយៈកម្មវិធីគោលនយោបាយអាទិភាពទី៥ និងទី៦ ដែលរួមមាន “យន្តការរក្សាលំនឹងថ្លៃកសិផល, ការដាក់ពង្រាយមន្ត្រីកសិកម្មឃុំនៅទូទាំងប្រទេស និងការអភិវឌ្ឍសហគមន៍កសិកម្មទំនើប” សំដៅបម្រើផលប្រយោជន៍ប្រជាកសិករឱ្យមានកម្រិតជីវភាពកាន់តែប្រសើរឡើងថែមទៀត និងបង្កើនល្បឿននៃការអភិវឌ្ឍវិស័យកសិកម្មកម្ពុជាឱ្យកាន់តែមានភាពរីកចម្រើនទៅមុខ។
ជាមួយនេះផងដែរ ឯកឧត្តមអនុរដ្ឋលេខាធិការ បានលើកទឹកចិត្តឱ្យអាជីវករដែលបានចូលរួមក្នុងវគ្គបណ្តុះបណ្តាលនេះ ត្រូវយកចិត្តទុកដាក់ចំពោះមេរៀនរបស់គ្រូឧទ្ទេស ដើម្បីទទួលបានចំណេះដឹងថ្មីៗជាមូលដ្ឋានអំពីការប្រើប្រាស់ជី និងថ្នាំកសិកម្ម ដោយត្រូវលក់តែផលិតផលដែលបានចុះបញ្ជីកាត្រឹមត្រូវ ដើម្បីធានាបាននូវគុណភាពសម្រាប់ការដាំដុះរបស់ប្រជាកសិករ និងការអនុវត្តច្បាប់ស្តីពីការគ្រប់គ្រងថ្នាំកសិកម្ម និងជីកសិកម្មប្រកបដោយប្រសិទ្ធភាព។ 
ឯកឧត្តមបានសង្កត់ធ្ងន់ថា អាជីវករជី និងថ្នាំកសិកម្ម ត្រូវសហការជាមួយមន្ត្រីកសិកម្មឃុំ  ត្រូវធ្វើជាដៃគូដ៏ល្អរបស់ប្រជាកសិករ មន្ទីរកសិកម្មខេត្ត និងក្រសួងកសិកម្ម តាមរយៈការជួយផ្គត់ផ្គង់ជី និងថ្នាំកសិកម្មដល់ប្រជាកសិករសម្រាប់ការដាំដុះ និងជួយពន្យល់ណែនាំដល់កសិករអំពីផលប្រយោជន៍ និងផលប៉ះពាល់នៃការប្រើប្រាស់ជី និងថ្នាំកសិកម្ម ឱ្យបានត្រឹមត្រូវតាមបច្ចេកទេស ក៏ដូចជាចូលរួមកាត់បន្ថយថ្លៃដើមផលិត ដើម្បីបង្កើនប្រាក់ចំណេញរបស់ប្រជាកសិករផ្ទាល់ស្របតាមគោលនយោបាយរបស់រដ្ឋាភិបាល និងជៀសវាងការផ្សព្វផ្សាយព័ត៌មានអវិជ្ជមាននៅក្នុងបណ្ដាញសង្គម។ 
សិក្ខាកាមទាំងអស់ក្នុងនាមជាដៃគូរបស់កសិករ មន្ទីរ និងក្រសួង មានសេចក្តីសោមនស្សរីករាយដោយគាំទ្រការជួយផ្សព្វផ្សាយព័ត៌មានវិជ្ជមាន ដើម្បីជួយដល់ប្រជាកសិករ និងរួមចំណែកអភិវឌ្ឍវិស័យកសិកម្មនៅខេត្តតាកែវ ព្រមទាំងបានសម្តែងការតាំងចិត្តនិងចូលរួមក្នុងវគ្គបណ្តុះបណ្តាលនេះឱ្យបានចប់តាមកម្មវិធីដែលបានគ្រោងទុក ដើម្បីទទួលបានវិញ្ញាបនបត្រប្រកបដោយសមធម៌  តម្លាភាព ក្នុងការបំពេញអាជីពរបស់ខ្លួនឱ្យបានល្អប្រសើរប្រកបដោយមនសិការវិជ្ជាជីវៈ៕