ឯកឧត្តមអនុរដ្ឋលេខាធិការ ប៉ែន ផល្លីកា អញ្ជើញចុះត្រួតពិនិត្យស្ថានភាពទូទៅនៃដែននេសាទក្នុងភូមិសាស្រ្តបឹងទន្លេសាប ចំនួនបីខេត្ត

ចេញ​ផ្សាយ​ ១៣ កក្កដា ២០២៥ 1460

នៅថ្ងៃទី ១០-១២ ខែកក្កដា ឆ្នាំ២០២៥  ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយលោកនាយអធិការរដ្ឋបាលខាងត្បូងទន្លេសាប នាយអធិការរងរដ្ឋបាលជលផលខាងជើងបឹងទន្លេសាប លោកនាយ នាយរងខណ្ឌរដ្ឋបាលជលផលពាក់ព័ន្ធខាងលើ សហការជាមួយកងកម្លាំងយោធភូមិភាគ៥ និងក្រុមអអន្តរាគមន៍បង្រ្កាបបទល្មើសជ្រោយស្តី  បានអញ្ជើញចុះត្រួតពិនិត្យស្ថានភាពទូទៅនៃដែននេសាទក្នុងភូមិសាស្រ្តបឹងទន្លេសាប នៅខេត្តពោធិ៍សាត់ ខេត្តកំពង់ធំ និងខេត្តកំពង់ឆ្នាំង។

ក្នុងដំណើរនេះ ឯកឧត្តមអនុរដ្ឋលេខាធិការ បានវាយតម្លៃដាច់ដោយឡែកពីគ្នា ទៅតាមភូមិសាស្រ្តរួមមាន ភូមិសាស្រ្តខេត្តពោធិសាត់ ជាទូទៅបទល្មើសនេសាទត្រូវបានថមថយច្រើន ដូចជារបាំងសាច់អួនជាទូទៅប្រជានេសាទបានអនុវត្តបានល្អទៅតាមគោលការណ៍ដែលបានផ្សព្វផ្សាយដល់ពួកគាត់ក្នុងរដូវបិទនេសាទនេះ។ ចំពោះបទល្មើសទ្រង់ទ្រាយធំ ដូចជា អួនទឹកសាប (យាំងកាវ) ឈិបយន្ត ពុំមានការកើតឡើយទេ។

ដោយឡែក ភូមិសាស្រ្តខេត្តកំពង់ធំ នៅក្នុងឃុំផាត់សណ្តាយចំពោះរបាំងលបណរ៉ាវប្រជានេសាទ បានអនុវត្តក្រឡារបាំងត្រឹមត្រូវល្អគឺ០៣សង់ទីម៉ែត្រ តែលប/លូមួយចំនួននៅប្រើក្រឡាញឹកចន្លោះពី២-២,៥សង់ទីម៉ែត្រ រីឯរបាំងមានប្រវែងលើសពី១៥០ម៉ែត្របន្តិចបន្ទួច ហើយឯកឧត្តមបានក្រើនរំលឹកដល់ពួកគាត់ឱ្យធ្វើការផ្លាស់ប្តូរ និងកាត់តម្រឹមខ្លួនឯងឱ្យបានឆាប់រហ័យចៀសវាងមានការរុះរើនិងកាប់បំផ្លាញចោលពីអាជ្ញាធរមានសមត្ថកិច្ច។ រីឯភូមិសាស្រ្តខេត្តកំពង់ឆ្នាំង ចាប់ពីប៉ែកខាងលើចាប់ពីឃុំឆ្នុកទ្រូរហូតដល់ក្រុងកំពង់ឆ្នាំង ពុំប្រទះឃើញការនេសាទដោយបើឧបករណ៍ខុសច្បាប់គួរឱ្យកត់សម្គាល់ឡើយ។

ចំណែកឯទិន្នផលត្រីវិញ ឯកឧត្តមបានសាកសួរផ្ទាល់ពីប្រជានេសាទ ពួកគាត់បានប្រាប់ថា ឆ្នាំនេះត្រីសំបូរ ជាងឆ្នាំមុន ជាទូទៅក្នុង១របាំង ពួកគាត់ចាប់បានត្រីចន្លោះពី៥០-៧០គីឡូក្រាមក្នុងមួយរបាំង ក្នុងមួយថ្ងៃ។ ឯការនេសាទដោយសៃយឺនកំពឹស ក៏នឹងអាចចាប់បានចន្លោះពី៥-៧គ្រាប់ក្នុងមួយគ្រឿង តែទំហំនៅតូចនៅឡើយ។ តាមការទទួលបានព័ត៌មានពីមន្រ្តីជំនាញ ឆ្នាំនេះទឹកបឹងទន្លេសាបបានហក់ឡើងលឿងជាងឆ្នាំមុន គឺកំពស់ទឹកខ្ពស់ជាងឆ្នាំមុន១ម៉ែត្រ បើព្រៀបធៀបទៅរយ:ពេលដូចគ្នា ហើយពេលនេះនៅចំណុចផាត់សណ្តាយមានទឹកហូរចូលទន្លេមេគង្គនិងស្ទឹងសែន។

បើតាមឯកឧត្តមអនុរដ្ឋលេខាធិការ តាមការអង្កេតជាទូទៅឃើញមានកូនត្រីរៀល ត្រីប្រា ពោ ឆ្ពិន ឆ្កោក ជាដើមទើបតែនឹងញាស់។ ឯកឧត្តមក៏បានដាក់គោលការណ៍បបញ្ជាក់បន្ថែមដល់មន្រ្តីជំនាញគ្រប់លំដាប់ថ្នាក់ និងកងកម្លាំងចម្រុះឱ្យត្រៀមខ្លួនក្នុងការសហការជួយផ្សព្វផ្សាយ និងទប់ស្កាត់បទល្មើយឱ្យកាន់តែមានប្រសិទ្ធិភាពខ្ពស់ ជាពិសេសគឺការចាប់កូនត្រីធម្មជាតិពីបឹងដូចជាកូនត្រីឆ្តោ ត្រីរ៉ស់ ត្រីប្រា ត្រីពោ ក្នុងរដូវបិទនេសាទនេះ។

ជាទីបញ្ចប់ ឯកឧត្តម ក៏សូមថ្លែងអំណរគុណយ៉ាងជ្រាលជ្រៅចំពោះកងកម្លាំងចម្រុះដែលបានសហការយ៉ាងល្អជាមួយមន្រ្តីជំនាញ ដោយបានទប់ស្កាត់បទល្មើសជលផលយ៉ាងសកម្ម ប្រកបដោយជោគជ័យ និងសំណូមពរឱ្យមានការសហការឱ្យកាន់តែជិតស្និតបន្ថែមទៀតក្នុងការអនុវត្តភារកិច្ចដើម្បីជួយអភិរក្ស និងអភិវឌ្ឍធនធានជលផលនៅបឹងទន្លេសាប ដើម្បីជាប្រយោជន៍រួមទាំងអស់គ្នា៕