ឯកឧត្តម គី ច័ន្ទរំដួល អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អញ្ជើញពិនិត្យ វឌ្ឍនភាពការងារនៅស្ថានីយ៍ផលិតពូជស្រូវអាងពោធិ៍ ខេត្តបាត់ដំបង

ចេញ​ផ្សាយ​ ២២ មករា ២០២៤ 1614

នៅថ្ងៃទី២២ ខែមករា ឆ្នាំ២០២៤ ឯកឧត្តម គី ច័ន្ទរំដួល អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំកិច្ចប្រជុំស្តីពីវឌ្ឍនភាពការងារ នៅស្ថានីយ៍ផលិតពូជស្រូវអាងពោធិ៍ ស្ថិតក្នុងភូមិសាស្ត្រសង្កាត់អូរម៉ាល់ ក្រុងបាត់ដំបង ខេត្តបាត់ដំបង ដែលក្នុងកិច្ចប្រជុំនោះមានសមាជិកក្រុមការងារ អញ្ជើញមកពី វិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា និងមន្ត្រី Maff-NIO នៃគម្រោងRice-SDP។

ក្នុងដំណើរការនៃកិច្ចប្រជុំនោះ ឯកឧត្តម គី ច័ន្ទរំដួល បានលើកឡើងថា ស្ថានីយ៍ផលិតពូជស្រូវអាងពោធិ៍ គឺជាធាតុចូលមួយក្នុងការរួមចំណែកអនុវត្តកម្មវិធីគោលនយោបាយអាទិភាពទី៥ របស់រាជរដ្ឋាភិបាល ដើម្បីជួយអភិវឌ្ឍផលិតកម្មដំណាំស្រូវ និងរក្សាបាននូវលំនឹងថ្លៃកសិផល។

គួរបញ្ជាក់ជូនថា ស្ថានីយ៍ផលិតពូជស្រូវអាងពោធិ៍ នឹងចាប់ផ្តើមផលិតពូជស្រូវសុទ្ធក្នុងពេលឆាប់ៗខាងមុខនេះ ដែលស្ថានីយ៍ផលិតពូជស្រូវនេះ មានការគាំទ្រពីគម្រោងជំរុញផលិតកម្មស្រូវ និង ការនាំអង្ករចេញ ដែលធន់នឹងបម្រែបម្រួលអាកាសធាតុ ហៅកាត់ថា Rice-SDP៕