ព័ត៌មានផ្សេងៗទៀត
គណៈប្រតិភូជាន់ខ្ពស់នៃកម្ពុជា-សហភាពអឺរ៉ុប អញ្ជើញចុះទស្សនកិច្ចសិប្បកម្មកែច្នៃគ្រាប់ស្វាយចន្ទី និងសហគមន៍កសិកម្ម នៅខេត្តស្ទឹងត្រែង
ចេញផ្សាយ ១៨ សីហា ២០២៦ 1112
នារសៀលថ្ងៃទី១៨ ខែសីហា ឆ្នាំ២០២៦ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ និងឯកឧត្តម អ៊ីហ្គ័រ ឌ្រីសម៉ាន់ (Igor DRIESMANS) ឯកអគ្គរដ្ឋទូតសហភាពអឺរ៉ុបប្រចាំកម្ពុជា បានអញ្ជេីញដឹកនាំគណៈប្រតិភូជាន់ខ្ពស់នៃកម្ពុជា-សហភាពអឺរ៉ុប(EU) ចុះទស្សនកិច្ចសិប្បកម្មកែច្នៃគ្រាប់ស្វាយចន្ទី និងសហគមន៍កសិកម្ម នៅខេត្តស្ទឹងត្រែង។
ទន្ទឹមនឹងការចុះទស្សនកិច្ចនេះ ឯកឧត្តមរដ្ឋមន្រ្តី និងឯកឧត្តមឯកអគ្គរដ្ឋទូតសហភាពអឺរ៉ុបក៏ជួបសំណេះសំណាលជាមួយប្រជាកសិករនៃសហគមន៍កសិកម្មចំបក់ និងសហគមន៍កសិកម្មអូរពងមាន់ ដែលទទួលបានការគាំទ្រពីគម្រោង (EU-German CAPSAFE)។
គម្រោងនេះផ្តោតសំខាន់លើដំណាំស្វាយចន្ទី និងម្រេច សំដៅពង្រឹងនិងពង្រីកកិច្ចសហប្រតិបត្តិការកម្ពុជា-សហភាពអឺរ៉ុប ដើម្បីលើកកម្ពស់ការធ្វើកសិកម្មប្រកបដោយនិរន្តរភាព និងជួយស្ទួយការកែច្នៃក្នុងស្រុក ស្របតាមស្តង់ដាគុណភាពអន្តរជាតិ និងស្តង់ដាសុវត្ថិភាពចំណីអាហារ សម្រាប់ការនាំចេញទៅទីផ្សារអន្តរជាតិ ដែលទទួលបានតម្លៃបន្ថែមខ្ពស់៕
