ព័ត៌មានផ្សេងៗទៀត
ឯកឧត្តមរដ្ឋលេខាធិការ អុឹម សុីថុល តំណាងដ៏ខ្ពង់ខ្ពស់ឯកឧត្តមរដ្ឋមន្រ្តី ឌិត ទីណា អញ្ជេីញជាអធិបតីក្នុងពិធីបេីកកិច្ចប្រជុំបូកសរុបការងារសុខភាពសត្វ និងផលិតកម្មសត្វប្រចាំឆ្នាំ២០២៤ និងទិសដៅអនុវត្តឆ្នាំ២០២៥
ចេញផ្សាយ ១៧ ធ្នូ ២០២៤ 2603
នៅព្រឹកថ្ងៃទី១៧ ខែធ្នូ ឆ្នាំ២០២៤ ឯកឧត្តម អុឹម សុីថុល រដ្ឋលេខាធិការប្រចាំការក្រសួងកសិកម្ម រុក្ខាប្រមាញ់ និងនេសាទ និងជាតំណាងដ៏ខ្ពង់ខ្ពស់ឯកឧត្តមរដ្ឋមន្រ្តី ឌិត ទីណា អញ្ជេីញជាអធិបតីក្នុងពិធីបេីកកិច្ចប្រជុំបូកសរុបការងារសុខភាពសត្វ និងផលិតកម្មសត្វប្រចាំឆ្នាំ២០២៤ និងទិសដៅអនុវត្តឆ្នាំ២០២៥ ដែលមានការចូលរួមពីថ្នាក់ដឹកនាំ និងមន្រ្តីក្រោមឱវាទចំនួន ១០០នាក់ នៅអគ្គនាយកដ្ឋានសុខភាពសត្វ និងផលិតកម្មសត្វ។
ជាកិច្ចចាប់ផ្តើម ឯកឧត្តមរដ្ឋលេខាធិការ បានសម្តែងនូវការស្វាគមន៍យ៉ាងកក់ក្តៅ និងមានក្ដីសោមនស្សរីករាយជាអនេកដែលបានចូលរួមពិធីនាថ្ងៃនេះ។ លើសពីនេះ ឯកឧត្តមរដ្ឋលេខាធិការ បានកោតសរសើរ និងវាយតម្លៃខ្ពស់ដល់ថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់នៃអគ្គនាយកដ្ឋានសុខភាពសត្វ និងផលិតកម្មសត្វ ដែលបានខិតខំបំពេញតួនាទីភារកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់ និងសម្រេចបានលទ្ធផលការងារជាច្រើនគួរជាទីមោទនៈក្នុងឆ្នាំ២០២៤នេះ។
ទន្ទឹមនឹងនេះ ឯកឧត្តមរដ្ឋលេខាធិការ បានលើកឡើងថាការងារសុខភាពសត្វនិងផលិតកម្មសត្វ ជាអនុវិស័យមួយក្នុងចំណោមអនុវិស័យទាំង៤ នៃវិស័យកសិកម្ម រុក្ខាប្រមាញ់ និងនេសាទ ដែលដើរតួនាទីយ៉ាងសំខាន់ក្នុងការធានាសន្តិសុខស្បៀងកម្ពុជា ផ្ដល់ចំណូលដល់សេដ្ឋកិច្ចជាតិ លើកកម្ពស់សេដ្ឋកិច្ចគ្រួសារ និងចូលរួមចំណែកក្នុងការបង្កើតការងារជូនប្រជាពលរដ្ឋតាមជនបទ ទាំងការចិញ្ចឹមលក្ខណៈគ្រួសារ និងលក្ខណៈពាណិជ្ជកម្ម។
បើតាម ឯកឧត្តមរដ្ឋលេខាធិការ ការងារផលិតកម្មសត្វ មានការរីកចម្រើនគួរឱ្យកត់សម្គាល់ ដែលអាចផ្គត់ផ្គង់តម្រូវការក្នុងស្រុក និងការនាំចេញ តែអនុវិស័យនេះក៏មានបញ្ហាប្រឈមមួយចំនួនដែលបង្កឡើងដោយការប្រែប្រួលអាកាសធាតុ គ្រោះធម្មជាតិ និងការផ្ទុះឡើងនូវជំងឺសត្វផ្សេងៗ ដែលអង្គប្រជុំត្រូវបន្តយកចិត្តទុកដាក់ដល់សុខភាពសាធារណៈ និងការរក្សាបាននូវស្ថិរភាពថ្លៃដែលអាចទទួលយកបានទាំងអ្នកផលិត អាជីវករ និងអ្នកបរិភោគ។
ឆ្លៀតក្នុងឱកាសនេះដែរ ឯកឧត្តមរដ្ឋលេខាធិការ មានសង្ឃឹមយ៉ាងមុតមាំ និងបានផ្តល់អនុសាសន៍ណែនាំដល់អង្គប្រជុំខិតខំយកចិត្តទុកដាក់ក្នុងការចូលរួមពិភាក្សា ផ្ដល់ធាតុចូល និងផ្តល់អនុសាសន៍ល្អៗ ដកស្រង់បទពិសោធន៍ឆ្នាំ ២០២៤ ដើម្បីដាក់ចេញនូវទិសដៅសម្រាប់អនុវត្តបន្តក្នុងឆ្នាំ ២០២៥ អោយកាន់តែមានប្រសិទ្ធភាព និងប្រសិទ្ធផលខ្ពស់៕
