ព័ត៌មានផ្សេងៗទៀត
ឯកឧត្តមប្រតិភូរាជរដ្ឋាភិបាល ពុំ សុថា អញ្ជើញដឹកនាំក្រុមការងារ ជួបសួរសុខទុក្ខកម្លាំងអន្តរាគមន៍បង្ក្រាបបទល្មើសជលផលប្រចាំការកន្លែងអភិរក្សជលផលជ្រោយស្តី និងកម្លាំងអន្តរាគមន៍បង្ក្រាបបទល្មើសជលផលប្រចាំការនៅកន្លែងអភិរក្សជលផលកំពង់ភ្លុក ខេត្តសៀមរាប
ចេញផ្សាយ ១ តុលា ២០២៥ 946
នៅថ្ងៃទី៣០ ខែកញ្ញា ឆ្នាំ២០២៥ ឯកឧត្តម ពុំ សុថា ប្រតិភូរាជរដ្ឋាភិបាល ទទួលបន្ទុកជាប្រធានរដ្ឋបាលជលផល បានដឹកនាំក្រុមការងារជួបសួរសុខទុក្ខ និងបាននាំយកអំណោយ ជូនដល់កម្លាំងអន្តរាគមន៍បង្ក្រាបបទល្មើសជលផល ប្រចាំការនៅកន្លែងអភិរក្សជលផលជ្រោយស្តី និងកម្លាំងអន្តរាគមន៍បង្ក្រាបបទល្មើសជលផលប្រចាំការនៅកន្លែងអភិរក្សជលផលកំពង់ភ្លុក ស្ថិតក្នុងឃុំកំពង់ភ្លុក ស្រុកប្រាសាទបាគង ខេត្តសៀមរាប។
នាដំណើរបេសកកម្មនោះ ឯកឧត្តម ពុំ សុថា បាននាំយកនូវអំណោយពីសំណាក់ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ជូនកងដល់កម្លាំងប្រចាំការនៅទីតាំងខាងលើនោះរួមមាន៖ ការឧបត្ថម្ភជាថវិកា ប្រេងម៉ាស៊ូតចំនួន១៦០០លីត្រ អង្ករចំនួន៨បាវ សាច់ជ្រូកចំនួន៣៥គីឡូក្រាម បន្លែចម្រុះចំនួន១៤០គីឡូក្រាម។ បន្ទាប់មកក្រុមការងារក៏បានបន្តដំណើរជួបជាមួយសហគមន៍នេសាទមាត់ខ្លា ស្ថិតនៅឃុំអន្លង់សំណរ ស្រុកជីក្រែង ដើម្បីពិភាក្សាពីការបង្កើតមុខរបរបន្ថែម ដូចជា៖ការដាំបន្លែលើទឹកជាដើម៕
