ឯកឧត្តមរដ្ឋលេខាធិការ តូច ប៊ុនហួរ អញ្ជើញជាអធិបតីភាពក្នុងពិធីបិទវគ្គបណ្តុះបណ្តាល ស្តីពី «ការដាំដុះស្រូវឆ្លាតវៃស្របតាមការបម្រែបម្រួលអាកាសធាតុ» នៅខេត្តតាកែវ

ចេញ​ផ្សាយ​ ១៩ មករា ២០២៦ 866

នៅថ្ងៃទី១៨ ខែមករា ឆ្នាំ២០២៦ ក្រោមអធិបតីភាព ឯកឧត្ដម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញជាអធិបតីភាពក្នុងពិធីបិទវគ្គបណ្តុះបណ្តាលស្តីពី «ការដាំដុះស្រូវឆ្លាតវៃស្របតាមការបម្រែបម្រួលអាកាសធាតុ» ដល់មន្ត្រីកសិកម្មឃុំ ទូទាំងខេត្តតាកែវ។ 
កម្មវិធីនេះ មានការអញ្ជើញចូលរួមពីសំណាក់ ឯកឧត្តម សុខ វិសាល លោក គង់ គា ប្រធាននាយកដ្ឋានដំណាំស្រូវ លោក ផាន់ វ៉ាន់តឹម អគ្គនាយករងក្រុមហ៊ុនជីភាគហ៊ុនប៊ិញឌៀន ប្រទេសវៀតណាម និងអ្នកឧកញ៉ា សុខ ឆេង អគ្គនាយកក្រុមហ៊ុន យីតាក់គ្រុប ព្រមទាំងលោកប្រធាន អនុប្រធាន និងមន្ត្រីនៃមន្ទីរកសិកម្មខេត្តតាកែវ មន្ត្រីកសិកម្មឃុំ សរុបអ្នកចូលរួមចំនួន ១៦៣ នាក់។
ឯកឧត្តមរដ្ឋលេខាធិការ បានគូសបញ្ជាក់ថា វគ្គបណ្តុះបណ្តាលនេះរៀបចំឡើងក្នុងគោលបំណងបង្កើនសមត្ថភាពចំណេះដឹងបន្ថែមដល់មន្រ្តីកសិកម្មឃុំ និងអ្នកពាក់ព័ន្ធ យកទៅផ្សព្វផ្សាយបច្ចេកទេសកសិកម្មវៃឆ្លាតដល់កសិករនៅមូលដ្ឋានរបស់ខ្លួន ឱ្យទទួលបានទិន្នផលខ្ពស់ និងកាត់បន្ថយថ្លៃដើមផលិតកម្ម។
ក្នុងឱកាសនោះ ឯកឧត្ដមរដ្ឋលេខាធិការ បានផ្តល់អនុសាសន៍ឱ្យមន្រ្តីកសិកម្មឃុំយកចំណេះដឹងដែលទទួលបាន ទៅបំប្លែងជាសកម្មភាពជាក់ស្ដែងដោយចុះដល់មូលដ្ឋានដើម្បីបង្ហាញកសិករពីបច្ចេកទេសជ្រើសរើសពូជ ការត្រៀមដី និងការប្រើប្រាស់ជីឱ្យចំគោលដៅ ព្រមទាំងណែនាំកសិករឱ្យប្រើប្រាស់ធាតុចូលកសិកម្ម ដូចជា ជីនិងថ្នាំកសិកម្មឱ្យស្របតាមស្តង់ដារច្ចេកទេស ព្រមទាំងត្រូវធ្វើជាទីប្រឹក្សាដ៏កៀកកិត ដើម្បីដោះស្រាយរាល់កង្វល់របស់កសិករ។ បន្ថែមពីនេះមន្ត្រីត្រូវតាមដានជាប់ជាប្រចាំនូវស្ថានភាពតម្លៃនិងចរន្តទីផ្សារក្នុងរដូវប្រមូលផល ដើម្បីក្តាប់ព័ត៌មានជាក់ស្តែង និងសម្របសម្រួលដោះស្រាយបញ្ហានានា ជូនប្រជាពលរដ្ឋក្នុងវិស័យកសិកម្ម ឱ្យមានជីវភាពកាន់តែប្រសើឡើង៕