សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ ក្នុងពិធីបិទសន្និបាតបូកសរុប និងសម្ភោធដាក់ឱ្យប្រើប្រាស់អគារផ្ការំដួល(ថ្មី)នៅទីស្តីការរបស់ក្រសួង

ចេញ​ផ្សាយ​ ៤ ឧសភា ២០១៨ 4152

នៅរសៀលថ្ងៃពុធ ៣រោច ខែពិសាខ ឆ្នាំច សំរឹទ្ធិស័ក ព.ស. ២៥៦២ ត្រូវនឹងថ្ងៃទី០២ ខែឧសភា គ.ស. ២០១៨ នៅទីស្តីការក្រសួងកសិកម្មរុក្ខាប្រមាញ់ និងនេសាទ មានប្រារព្វពិធីបិទសន្និបាតបូកសរុប ការងារ កសិកម្ម រុក្ខាប្រមាញ់ និងនេសាទសម្រាប់ឆ្នាំ២០១៧-២០១៨ និងទិសដៅការងារសម្រាប់ឆ្នាំ២០១៨-២០១៩ និងសម្ភោធដាក់ឱ្យប្រើប្រាស់អគារផ្ការំដួល(ថ្មី)នៅទីស្តីការរបស់ក្រសួង ស្ថិតក្រោមអធិបតីភាព ដ៏ខ្ពង់ខ្ពស់ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រ កម្ពុជា។ ស្ថិតក្នុងបរិយាកាសដ៏មហោឡារិកនេះ ក៏មានការអញ្ជើញចូលរួមផងដែរពីសំណាក់ សម្តេច ឯកឧត្តម លោកជំទាវ តំណាងស្ថាប័ននីតិប្បញ្ញត្តិ និងសមាជិករាជរដ្ឋាភិបាល ឯកឧត្តម លោកជំទាវ តំណាងក្រសួង ស្ថាប័នពាក់ព័ន្ធ អាជ្ញាធរថ្នាក់ក្រោមជាតិ លោកឧកញ៉ា លោក លោកស្រី នាងកញ្ញា ភ្ញៀវជាតិ អន្តរជាតិ និងតំណាងកសិករឆ្នើមទូទាំងប្រទេស ដែលបានអញ្ជើញមកចូលរួមយ៉ាងឱឡារិក យ៉ាងច្រើន កុះករ។

ក្នុងឱកាសដ៏វិសេសវិសាលនេះ តាងនាមថ្នាក់ដឹកនាំ និងមន្រ្តីរាជការគ្រប់ជាន់ថ្នាក់ នៃក្រសួងកសិកម្ម រុក្ខាប្រមាញ់ និងនេសាទ ឯកឧត្តមពិតជាមានសេចក្តីសោមនស្សរីករាយជាអតិបរមា សូមថ្លែងអំណរគុណយ៉ាងជ្រាលជ្រៅជាទីបំផុតចំពោះវត្តមានដ៏ឧត្តុង្គឧត្តមរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា និងសូមទទួលយករាល់អនុសាសន៍ដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីអនុវត្តការងារបន្តឲ្យបានសម្រេចនៅក្នុងឆ្នាំ២០១៨-២០១៩ នេះ ប្រកបដោយផ្លែផ្កា និងទទួលបានជោគជ័យដ៏ត្រចះត្រចង់ថែមទៀត។