ឯកឧត្តម វេង សាខុន រដ្ឋមន្រ្តី ក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតឲ្យ លោក NAKADA Shunichi ទីប្រឹក្សាជាន់ខ្ពស់ នាយកដ្ឋានអភិវឌ្ឍន៏ជនបទនៃទីភ្នាក់ងារសហប្រតិបត្តិការអន្តរជាតិជប៉ុន(JICA) ចូលជួបសម្តែងការគួរសម និងពិភាក្សាការងារ

ចេញ​ផ្សាយ​ ១៤ កុម្ភៈ ២០១៨ 3598

នៅវេលាម៉ោង ១០ព្រឹក ថ្ងៃទី ៣១ ខែតុលា ឆ្នាំ២០១៦ ឯកឧត្តម វេង សាខុន រដ្ឋមន្រ្តី ក្រសួងកសិកម្ម រុក្ខាប្រមាញ់ និងនេសាទ បានអនុញ្ញាតឲ្យ លោក NAKADA Shunichi ទីប្រឹក្សាជាន់ខ្ពស់ (គោលនយោបាយកសិកម្ម) នាយកដ្ឋានអភិវឌ្ឍន៏ជនបទ នៃទីភ្នាក់ងារសហប្រតិបត្តិការអន្តរជាតិជប៉ុន (JICA) និង សហការី ចូលជួបសម្តែងការគួរសម និងពិភាក្សាការងារ។ គោល បំណង នៃ កិច្ចជំនួបនេះ គឺក្រុមមន្ត្រីJICA ធ្វើសេចក្ដីរាយការណ៌ពីបេសកកម្ម និងស្នើសុំពិគ្រោះយោបល់ ក៏ដូចជាការណែនាំ ដើម្បីរៀបចំ "គម្រោងជំរុញផលិតកម្មស្រូវពូជ" នៅកម្ពុជា។ លោកទីប្រឹក្សាបានរាយការណ៏អំពីបេសកកម្ម រយៈពេល ២សប្ដាហ៍ នៅកម្ពុជា ក្នុងការស្វែងយល់ និងពិគ្រោះជាមួយភាគីពាក់ព័ន្ធនានា ដើម្បីបានជាធាតុចូល សម្រាប់រៀបចំ "គម្រោងជំរុញផលិតកម្មស្រូវពូជ" ដែលជាគម្រោងជំនួយ របស់ JICA សម្រាប់ក្រសួងកសិកម្ម រុក្ខាប្រមាញ់ និងនេសាទ នាពេលឆាប់ៗខាងមុខនេះ សម្រាប់រយៈពេល ៥ឆ្នាំ ពី ២០១៧ ដល់ ២០២២។ គោលបំណងនៃគម្រោងគឺ ពង្រឹងប្រព័ន្ធផលិត និងចែកចាយគ្រាប់ពូជស្រូវមានគុណភាព នៅខេត្តគោលដៅនៃគម្រោង តាមរយៈការជំរុញផលិតកម្ម និងការធ្វើអធិការកិច្ចគ្រាប់ពូជស្រូវ ដើម្បីធានាបាននូវគុណភាពគ្រាប់ពូជ។ ក្នុងនោះ នឹងមានការចូលរួម និងពង្រឹងសមត្ថភាពសហគមន៍កសិកម្មផលិតពូជស្រូវ ហើយនិងការចូលរួម របស់ក្រុមហ៊ុន ឯកជនផងដែរ ពាក់ព័ន្ធនឹងការផលិត ប្រើប្រាស់ និងពាណិជ្ជកម្មស្រូវពូជ។ ភាគី JICA ក៏នឹងខិតខំរៀបចំគម្រោងនេះ ឲ្យស្របតាមគោលនយោបាយគ្រប់គ្រងពូជដំណាំ ដែលក្រសួងកសិកម្ម រុក្ខាប្រមាញ់ និងនេសាទ កំពុងរៀបចំ និងនឹងត្រូវបានអនុម័តនាពេលខាងមុខ។ ជាការឆ្លើយតប ឯកឧត្ដមរដ្ឋមន្ត្រីបានថ្លែងអំណរគុណចំពោះប្រទេសជប៉ុន ដែលបានជួយ និងជាម្ចាស់ជំនួយដ៏ធំមួយរបស់កម្ពុជា ជាពិសេសជំនួយដល់ការអភិវឌ្ឍន៏វិស័យកសិកម្ម តាមរយៈ JlCA។ ពាក់ព័ន្ធទៅនឹងគម្រោងខាងលើ ឯកឧត្តមរដ្ឋមន្ត្រី បានស្នើ JICA ឲ្យគិតពីបញ្ហាទីផ្សារនៃស្រូវដែលផលិតបាន ពោលគឺគិតពីប្រភេទពូជស្រូវ ដែលមានតម្រូវការទីផ្សារ រួមផ្សំនឹងទិន្នផលខ្ពស់។ ក្នុងនោះ ត្រូវគិតថាតើតួអង្គពាក់ព័ន្ធណា ដែលអាចសម្របសម្រួលលើការងាររកទីផ្សារ តាំងពីការជ្រើសរើសប្រភេទពូជស្រូវមានសក្ដានុពលទីផ្សារ ផលិតកម្មគ្រាប់ស្រូវពូជ ការបែងចែក និងប្រើប្រាស់គ្រាប់ពូជផលិតបាន ក្នុងផលិតកម្មស្រូវ ហើយនិងការធានារកទីផ្សារចំពោះផលិតផលស្រូវ អង្ករ។ ក្នុងន័យនេះ គឺត្រូវធ្វើយ៉ាងណា កសាងឲ្យបាននូវភាពជាដៃគូដែលទុកចិត្តបាន រវាងអ្នកផលិត(កសិករ) និងអ្នកទិញ(ក្រុមហ៊ុនឯកជន ជាពិសេសម៉ាស៊ីនកិនស្រូវ)។ គម្រោងក៏គួរពិចារណាកំណត់តំបន់អនុវត្តគម្រោង ស្របទៅតាមលទ្ធភាពដែលមាន ដោយអាចចាប់ផ្ដើមពីទ្រង់ទ្រាយតូច ទៅទ្រង់ទ្រាយធំ។ ជារួម ត្រូវមានទស្សនៈវែងឆ្ងាយ ក្នុងការទាក់ទាញវិស័យឯកជន ទៅក្នុងខ្សែសង្វាក់ផលិតកម្ម។ ដូចនេះ ឯកឧត្តមរដ្ឋមន្ត្រី បានស្នើឲ្យJICA គិតពី៖

១) ក្នុងដំណាក់កាលដំបូង រក្សាតួនាទីរបស់រដ្ឋាភិបាលក្នុងដំណើរការខ្សែសង្វាក់ផលិតកម្មគ្រាប់ពូជស្រូវ

២) ជាបន្តបន្ទាប់ក្នុងពេលអនាគត ផ្តល់ដល់វិស័យឯកជន ជាពិសេសក្រុមហ៊ុនម៉ាស៊ីនស្រូវ ទទួលរ៉ាប់រងការងារផលិតកម្មគ្រាប់ពូជស្រូវ (អនុវត្តផ្ទាល់ ឬធ្វើផលិតកម្មកសិកម្មតាមកិច្ចសន្យា ជាមួយកសិករ ឬសហគមន៏កសិកម្ម)។ ក្នុងនោះ មន្ត្រីកសិកម្ម នឹងដើរតួនាទីសំខាន់ជាអ្នកតាមដាន ត្រួតពិនិត្យ សម្របសម្រួល និងអន្តរាគមន៏បច្ចេកទេស។ ទស្សនៈខាងលើរបស់ឯកឧត្តមរដ្ឋមន្ត្រី ត្រូវបានមន្ត្រី JICA រីករាយទទួលយក ដើម្បីរៀបចំគម្រោងជំរុញផលិតកម្មស្រូវពូជ ខាងលើ។