ឯកឧត្តម សុខ វិសាល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំពិភាក្សាការងារជាមួយគណៈប្រតិភូកូរ៉េ ដែលអញ្ជើញមកពីសមាគមអភិវឌ្ឍធនធានកសិកម្មកូរ៉េ (KOAA)

ចេញ​ផ្សាយ​ ២១ ធ្នូ ២០២៣ 7407

នាព្រឹកថ្ងៃទី២១ ខែធ្នូ ឆ្នាំ២០២៣ នៅទីស្តីការក្រសួងកសិកម្ម រុក្ខាប្រមាញ់ និងនេសាទ ឯកឧត្តម សុខ វិសាល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ដោយទទួលបានការអនុញ្ញាតដ៏ខ្ពង់ខ្ពស់ពី ឯកឧត្តមរដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំសហប្រតិបត្តិការទ្វេភាគីរវាងមន្ត្រីជំនាញក្រសួងកសិកម្ម រុក្ខាប្រមាញ់ និងនេសាទ ជាមួយគណៈប្រតិភូកូរ៉េ ដែលអញ្ជើញមកពីសមាគមអភិវឌ្ឍធនធានកសិកម្មកូរ៉េ (KOAA)។ កិច្ចប្រជុំនេះមានគោលបំណងពិភាក្សាប្រមូលធាតុចូលដើម្បីកសាងគម្រោងស្តីពី [Cambodia] Project on Agricultural Value Chain Improvement through Cashew Nut Processing and Expert in Cambodia។ កិច្ចប្រជុំមានការចូលរួមពីថ្នាក់ដឹកនាំអង្គភាពជំនាញនៃអគ្គនាយកដ្ឋានកសិកម្ម និងនាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ។

ជាការឆ្លើយតបទៅនឹងសំណួរ ដែលជាតម្រូវការនៃការកសាងគម្រោងខាងលើ អង្គភាពជំនាញដែលមានអគ្គនាយកដ្ឋានកសិកម្ម រួមជាមួយនាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ នឹងចូលរួមក្នុងកិច្ចសហការបច្ចេកទេសដែលជាតួនាទីភារកិច្ចរបស់ក្រសួងរួមមាន៖ (១)ការប្រមូលផ្តុំចងក្រងកសិករដាំដុះ ដែលអាចផ្តល់ជាការបណ្តុះបណ្តាលបច្ចេកទេសដាំដុះ (២)ការប្រមូលផ្តុំកសិករ សហគមន៍កសិកម្ម ដោយផ្សារភ្ជាប់ទៅទីផ្សារ តាមរយៈការអនុវត្តផលិតកម្មកសិកម្មតាមកិច្ចសន្យា (៣)ការសិក្សាទៅលើខ្សែច្រវ៉ាក់តម្លៃស្វាយចន្ទី (៤)ការផ្តល់បច្ចេកទេសក្រោយការប្រមូលផល (ប្រមូលផល ហាលសំងួត ស្តុកទុក) ស្របតាមលក្ខខណ្ឌបច្ចេកទេស (៥)ការផ្តល់បច្ចេកទេសកែច្នៃ ដែលស្របទៅតាមលក្ខខណ្ឌស្តង់ដារតម្រូវ និង(៦)ការសម្របម្រួលសកម្មភាពអនុវត្ត ការរៀបចំឯកសារ ដើម្បីស្នើសុំវិញ្ញាបនបត្រ GAP, GMP, Organic និង HACCP ជាដើម។

ក្នុងកិច្ចប្រជុំនេះ គណៈប្រតិភូកូរ៉េ បានបង្ហាញនូវគំនិតសុទិដ្ឋិនិយម ហើយសង្ឃឹមថា សកម្មភាពបច្ចេកទេសខាងលើ និងក្លាយជាធាតុចូលដ៏សំខាន់ក្នុងជំរុញការកសាងគម្រោងនេះឱ្យទទួលជោគជ័យតាមការរំពឹងទុក។