ព័ត៌មានផ្សេងៗទៀត
ឯកឧត្តមរដ្ឋលេខាធិការ អុឹម ស៊ីថុល ទទួលជួបជាមួយឯកឧត្តម អាលី អាកបារ ណាហ្សារី (Ali Akbar Nazari) ឯកអគ្គរដ្ឋទូតនៃសាធារណរដ្ឋឥស្លាមអ៊ីរ៉ង់ប្រចាំនៅកម្ពុជា ក្នុងជំនួបសម្ដែងការគួរសម និងពិភាក្សាការងារ
ចេញផ្សាយ ០២ ឧសភា ២០២៥ 663
នៅរសៀលថ្ងៃទី០២ ខែឧសភា ឆ្នាំ២០២៥ ឯកឧត្តម អុឹម ស៊ីថុល រដ្ឋលេខាធិការប្រចាំការក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានទទួលជួបជាមួយឯកឧត្តម អាលី អាកបារ ណាហ្សារី (Ali Akbar Nazari) ឯកអគ្គរដ្ឋទូតនៃសាធារណរដ្ឋឥស្លាមអ៊ីរ៉ង់ប្រចាំនៅកម្ពុជា ដែលមាននិវេសនដ្ឋាននៅទីក្រុងហាណូយ ក្នុងជំនួបសម្ដែងការគួរសម និងពិភាក្សាការងារ នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
នាឱកាសនៃជំនួប ឯកឧត្តមរដ្ឋលេខាធិការប្រចាំការ បានសម្តែងការស្វាគមន៍ និងក្តីសោមនស្សរីករាយក្នុងការបន្តពង្រឹងកិច្ចសហប្រតិបត្តិការរវាងប្រទេសទាំងពីរ កម្ពុជា-អ៊ីរ៉ង់ ក្នុងវិស័យកសិកម្មឱ្យកាន់តែជិតស្និត និងរឹងមាំបន្ថែមទៀត។ ទន្ទឹមនឹងនេះ ឯកឧត្តមរដ្ឋលេខាធិការប្រចាំការ បានបញ្ជាក់បន្ថែមថាកម្ពុជាមានកសិផលសក្កានុពលជាច្រើនរួមមាន៖ អង្ករ ម្រេច និងស្វាយចន្ទី ដែលភាគីអ៊ីរ៉ង់ អាចពិនិត្យលទ្ធភាពនាំយកទៅកាន់ទីផ្សារអ៊ីរ៉ង់ ដែលមានគុណភាពខ្ពស់ និងរសជាតិឆ្ងាញ់។
ជាការឆ្លើយតប ឯកឧត្តមឯកអគ្គរដ្ឋទូត បានបង្ហាញចំណាប់អារម្មណ៍ក្នុងការនាំយកកសិផលកម្ពុជាទៅកាន់ទីផ្សារអ៊ីរ៉ង់ ប្រការសំខាន់ត្រូវទាមទារចាំបាច់នូវគុណភាពខ្ពស់ មានអនាម័យ និងជាផលិតផលស្តង់ដា ហាឡាល់(Halal) ព្រមទាំងបានលេីកឡេីងនូវកសិផលអ៊ីរ៉ង់រួមមាន៖ ផ្កា(Saffron) និងផ្លែឈើសំខាន់ៗជាច្រេីនប្រភេទផងដែរ។
ជាទីបញ្ចប់ ភាគីទាំងពីរឯកភាពជំរុញការចុះអនុស្សរណៈនៃការយោគយល់គ្នា(MoU) ទាំងការងារសុខភាពសត្វ និងកិច្ចសហប្រតិបត្តិការក្នុងវិស័យកសិកម្មឱ្យកាន់តែរហ័ស មានភាពពេញលេញ និងគ្រប់ជ្រុងជ្រោយ។ ឯកឧត្តមរដ្ឋលេខាធិការប្រចាំការ មានសង្ឃឹមយ៉ាងមុះមុតថាការចុះអនុស្សរណៈនៃការយោគយល់គ្នា(MoU) នេះនឹងមានភាពបុរេសកម្ម និងផ្តល់ផលចំនេញទាំងអស់គ្នា៕
