ព័ត៌មានផ្សេងៗទៀត
ឯកឧត្តមរដ្ឋលេខាធិការ តូច ប៊ុនហួរ អញ្ជើញទទួលជួបសម្តែងការគួរសម ជាមួយគណ:ប្រតិភូនៃសាធារណរដ្ឋប្រជាមានិតចិន ដើម្បីស្វែងយល់ឱកាសវិនិយោគ ទៅលើវិស័យកសិកម្ម និងកសិ-ឧស្សាហកម្មនៅកម្ពុជា
ចេញផ្សាយ ២៦ កញ្ញា ២០២៤ 1311
នៅថ្ងៃទី២៥ ខែកញ្ញា ឆ្នាំ២០២៤ ឯកឧត្តម តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី ឌិត ទីណា អញ្ជើញទទួលជួបសម្តែងការគួរសម ជាមួយគណៈប្រតិភូនៃសាធារណរដ្ឋប្រជាមានិតចិន ដើម្បីស្វែងយល់ឱកាសវិនិយោគ ទៅលើវិស័យកសិកម្ម និងកសិ-ឧស្សាហកម្មនៅកម្ពុជា ដោយសហការជាមួយក្រុមហ៊ុនក្នុងស្រុក Santana Agro Product Co., Ltd.។ កិច្ចប្រជុំធ្វើឡើងនៅទីស្តីការក្រសួងកសិកម្ម រុក្ខាប្រមាញ់ និងនេសាទ។
គណៈប្រតិភូនៃសាធារណរដ្ឋប្រជាមានិតចិន មកពីក្រុមហ៊ុន Sichuan Pan-Asia Investment Co., Ltd. មានមូលដ្ឋាននៅទីក្រុងស៊ីឈួន បានសម្ដែងការចាប់អារម្មណ៍វិនិយោគលើវិស័យកសិកម្ម និងកសិ-ឧស្សាហកម្មនៅកម្ពុជា ដោយផ្ដើមចេញពីការសិក្សាស្វែងយល់ឱកាសវិនិយោគនូវប្រភេទដំណាំសក្តានុពល ឈានដល់ការផ្គត់ផ្គង់កសិផល ឬផលិតផលកសិកម្មកែច្នៃ ទៅទីផ្សារនៃសាធារណរដ្ឋប្រជាមានិតចិន។
សូមបញ្ជាក់ថា បច្ចុប្បន្ននេះ ក្រុមហ៊ុនបាននិងកំពុងវិនិយោគវិស័យកសិកម្ម (ដំណាំដំឡូងមី) នៅប្រទេសឡាវ និងបានបង្កើតសួនឧស្សាហកម្មចំនួនមួយកន្លែងនៅក្នុងប្រទេសឡាវ និងមានក្រុមហ៊ុនបុត្រសម្ព័ន្ធនៅប្រទេសថៃ ឈ្មោះ Pan-asia Investment ដែលវិនិយោគលើការកែច្នៃម្សៅដំឡូងមី។
ជាលទ្ធផលនៃជំនួបនោះ គណៈប្រតិភូបានទទួលយកនូវការណែនាំពីឯកឧត្តម តូច ប៊ុនហួរ ដើម្បីសិក្សាពីលទ្ធភាពការវិនិយោគលើការកែច្នៃស្វាយចន្ទី ម្រេច និងដំឡូងមី ដើម្បីនាំចេញទៅកាន់ទីផ្សារចិន។ ក្រុមហ៊ុនក៏នឹងសិក្សាពីលទ្ធភាពបង្កើតសួនឧស្សាហកម្មនៅតំបន់ជិតផ្លូវរថភ្លើង ព្រមទាំងលទ្ធភាពបង្កើតរោងចក្រផលិតជីនិងថ្នាំកសិកម្មនៅកម្ពុជាផងដែរ៕
