ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ គី ច័ន្ទរំដួល អញ្ជើញចូលរួមជាអធិបតីភាពក្នុងពិធីបើក«ពិព័រណ៍កសិផលខ្មែរ» នៅផ្សារទំនើបជីបម៉ុង ២៧១ មេហ្គាម៉ល
ចេញផ្សាយ ៣០ មិថុនា ២០២៦ 2028
នៅថ្ងៃទី៣០ ខែមិថុនា ឆ្នាំ២០២៦ ឯកឧត្តម គី ច័ន្ទរំដួល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងលោកជំទាវ តោ ពិឡា រដ្ឋលេខាធិការក្រសួងពាណិជ្ជកម្ម បានអញ្ជើញចូលរួមជាអធិបតីភាព ក្នុងពិធីបើក «ពិព័រណ៍កសិផលខ្មែរ» នៅផ្សារទំនើប ជីប ម៉ុង ២៧១ រាជធានីភ្នំពេញ។ កម្មវិធីនេះមានការអញ្ជើញចូលរួមពី ឯកឧត្តម លោកជំទាវ តំណាងក្រសួងពាណិជ្ជកម្ម តំណាងក្រសួងកសិកម្ម រុក្ខាប្រមាញ់ និងនេសាទ លោកជំទាវ គីម ចាន់ណា អគ្គនាយិការជាន់ខ្ពស់ ផ្នែកហិរញ្ញវត្ថុ និងជាសមាជិកក្រុមប្រឹក្សាភិបាលក្រុមហ៊ុន ជីបម៉ុង លោកជំទាវ លី សុខឆេង អគ្គនាយិការ ក្រុមហ៊ុន ជីបម៉ុង រីថែល។
ថ្លែងក្នុងពិធីបើក ឯកឧត្តម គី ច័ន្ទរំដួល បានលើកឡើងអំពីគោលនយោបាយអាទិភាពភាពទី៥ និងទី៦ របស់រាជរដ្ឋាភិបាលក្នុងវិស័យកសិកម្ម ដែលផ្តោតទៅលើការដាក់ពង្រាយមន្ត្រីកសិកម្មឃុំ-សង្កាត់ ចំនួន១៦០០នាក់ នៅតាមបណ្តាឃុំ-សង្កាត់ទូទាំងប្រទេស និងការអភិវឌ្ឍន៍សហគមន៍កសិកម្មទំនើបដែលមានលក្ខណៈពិសេសមួយចំនួនដូចជា៖ ការទិញនិងលក់រួមគ្នា (ទិញរួម លក់រួម) ការផលិត និងអនុវត្តបច្ចេកទេសរួមគ្នា ទីផ្សារច្បាស់លាស់ដោយមានកិច្ចសន្យាទុកជាមុន ការគាំទ្រផ្នែកហិរញ្ញវត្ថុ ការគ្រប់គ្រងបែបសហគ្រាសនិងមានប្រព័ន្ធគណនេយ្យច្បាស់លាស់។ និយាយជារួម ធ្វើយ៉ាងណាធានាឱ្យបានថា ប្រជាពលរដ្ឋកម្ពុជាគ្រប់រូបទទួលបាន « មានហូប មានប្រើ មានបាន និង មានរហូត»។
ជាមួយគ្នានេះ ឯកឧត្តមបានអំពាវនាវឱ្យប្រជាពលរដ្ឋបន្តគាំទ្រ និងប្រើប្រាស់កសិផល និងផលិតផលក្នុងស្រុក ក្រោមស្មារតី «ខ្មែរជួយខ្មែរ» ដើម្បីរួមចំណែកលើកកម្ពស់ប្រាក់ចំណូលរបស់ប្រជាកសិករ ពង្រឹងសន្តិសុខស្បៀង និងជំរុញកំណើនសេដ្ឋកិច្ចជាតិប្រកបដោយចីរភាព។ ឯកឧត្តមក៏បានកោតសរសើរចំពោះការចូលរួមរបស់វិស័យឯកជន ក្នុងការលើកកម្ពស់ ការផ្សព្វផ្សាយ និងពង្រីកទីផ្សារកសិផលខ្មែរ ដែលជាការរួមចំណែកយ៉ាងសំខាន់ក្នុងការអភិវឌ្ឍវិស័យកសិកម្ម និងគាំទ្រជីវភាពប្រជាកសិករ។
សូមជម្រាបជូនថា ការចូលរួមដាក់តាំងពិព័រណ៍ផលិតផលកសិផលខ្មែរ នៅផ្សារទំនើបជីបម៉ុង ២៧១ មេហ្គាម៉ល រាជធានីភ្នំពេញ មានចំនួនប្រមាណ៥០ស្តង់ ដែលបានចូលរួមដាក់តាំងពិព័រណ៍។ កម្មវិធី នឹងប្រព្រឹត្តទៅចាប់ពីថ្ងៃទី៣០ ខែមិថុនា ដល់ថ្ងៃទី០៩ ខែកក្កដា ឆ្នាំ២០២៦ នេះ៕
