ព័ត៌មានផ្សេងៗទៀត
ឯកឧត្តម ឃឹម ហ្វីណង់ អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញដឹកនាំក្រុមការងារជួបប្រជុំសហគមន៍សាលាវិស័យ នៅឃុំសាលាវិស័យ ក្នុងខេត្តកំពង់ធំ
ចេញផ្សាយ ១៨ មីនា ២០២៤ 3137
នៅថ្ងៃទី១៥ ខែមីនា ឆ្នាំ២០២៤ ឯកឧត្តម ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យ នៃក្រសួងកសិកម្ម រុក្ខាប្រមាញ់ និងនេសាទ ទទួលបន្ទុកការងារសហគមន៍កសិកម្មទំនើប បានដឹកនាំក្រុមការងារជួបប្រជុំជាមួយសហគមន៍សាលាវិស័យ នៅឃុំសាលាវិស័យ ក្នុងខេត្តកំពង់ធំ។
នៅក្នុងកិច្ចប្រជុំនេះ ឯកឧត្តមបានពន្យល់ណែនាំសហគមន៍អំពីគោលការណ៍នៃការបង្កើត សហគមន៍កសិកម្មទំនើប ដែលជាកម្មវិធីគោលនយោបាយអាទិភាពរបស់ ក្រសួងកសិកម្ម រុក្ខាប្រមាញ់ និងនេសាទ ក៏ដូចជាអត្ថប្រយោជន៍នៃការចូលរួមជាសមាជិក-សមាជិកា សហគមន៍កសិកម្មទំនើប។ បន្ថែមពីលើនេះ ឯកឧត្តមបានណែនាំបងប្អូនសហគមន៍ពីគម្រោងសាកល្បង គម្រោង Cashew Notes ដោយធ្វើការសាកល្បងប្រមូលទិញ គ្រាប់ស្វាយចន្ទីពីសហគមន៍ដើម្បីកែច្នៃ និងធ្វើទីផ្សារ ដែលផលប្រយោជន៍នៃគម្រោង គឺនឹងផ្តល់ត្រឡប់មកសហគមន៍វិញផ្ទាល់។
តាមរយៈកិច្ចប្រជុំនេះ បងប្អូនប្រជាកសិករដែលជាសមាជិក-សមាជិកានៃសហគមន៍ បានសម្តែងសេចក្តីរីករាយ និងបង្ហាញជាជំហររួម ក្នុងការចូលរួមបង្កើតសហគមន៍កសិកម្មទំនើប និងការចូលរួម អនុវត្តគម្រោងសាកល្បង ចាប់ផ្ដើមដោយការធ្វើកិច្ចសន្យាផលិតកម្មកសិកម្ម។
សូមបញ្ជាក់ផងដែរថា សហគមន៍ទំនើប គឺជាសហគមន៍ដែលមានប្រព័ន្ធគ្រប់គ្រងត្រឹមត្រូវ មានរចនាសម្ព័ន្ធច្បាស់លាស់ ដើម្បីកាត់បន្ថយថ្លៃដើមផលិតកម្ម បង្កើនទិន្នផល បង្កើនបច្ចេកទេស និងមានទីផ្សារច្បាស់លាស់៕
