ឯកឧត្តមអនុរដ្ឋលេខាធិការ ទឹម បូរក្ស ដឹកនាំក្រុមការងារសហគមន៍នេសាទ (ស.ន) ចុះពិនិត្យដើម្បីពង្រឹងសហគមន៍នេសាទ នៅខេត្តចំនួន២

ចេញ​ផ្សាយ​ ៧ ឧសភា ២០២៦ 2666

នៅថ្ងៃទី០៥ -០៦ ខែឧសភា ឆ្នាំ២០២៦ ឯកឧត្តម ទឹម បូរក្ស អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តាមការណែនាំដោយឯកឧត្តមរដ្ឋលេខាធិការ ហាស់ សារ៉េត បានដឹកនាំក្រុមការងារសហគមន៍នេសាទ (ស.ន) ចុះពិនិត្យដើម្បីពង្រឹងសហគមន៍នេសាទ នៅខេត្តស្ទឹងត្រែង និងខេត្តក្រចេះ។
ក្នុងដំណើរនេះ ក្រុមការងារក៏បានជួបពិភាក្សានៅខណ្ឌរដ្ឋបាលជលផលស្ទឹងត្រែង នៅមជ្ឈមណ្ឌលស្រាវជ្រាវនិងផលិតពូជវារីសត្វមេគង្គលើ និងចុះពិនិត្យជួបផ្ទាល់នៅទីតាំងសហគមន៍នេសាទអូរម្រេះ (ខេត្តស្ទឹងត្រែង) និងសហគមន៍នេសាទកាំពី (ខេត្តក្រចេះ) ដោយមានការចូលរួមពី លោកស្រី កាំង ឃីម អគ្គនាយករង ថ្នាក់ដឹកនាំនាយកដ្ឋាននិងមន្ត្រីនៃអគ្គនាយកដ្ឋានជលផល ក្រុមការងារអង្គការ FAO មកពីទីក្រុងរ៉ូមនិងតំណាងនៅភ្នំពេញ ព្រមទាំងគណ:កម្មការនិងសមាជិក អាជ្ញាធរ និងថ្នាក់ដឹកនាំនិងមន្ត្រីខណ្ឌជលផលខេត្តទាំងពីរ។
ឯកឧត្តមអនុរដ្ឋលេខាធិការ បានគូសបញ្ជាក់ថា នៅខេត្តស្ទឹងត្រែង មានសហគមន៍នេសាទសរុបចំនួន៦១ បានចុះបញ្ជីផ្លូវការនៅក្រសួងកសិកម្មរួចរាល់ចំនួន៦០ ប៉ុន្តែមិនទាន់បានចុះបញ្ជីប័ណ្ណកម្មសិទ្ធិកន្លែងសហគមន៍នេសាទជាតំបន់គ្រប់គ្រងជលផលនៅឡើយ។ ផែនការអាទិភាព គឺខណ្ឌជលផល និងមន្រ្តីពាក់ព័ន្ធត្រូវជួយរៀបឯកសារដើម្បីស្នើសុំចុះបញ្ជីប័ណ្ណកម្មសិទ្ធិ។ 
ជាមួយគ្នានេះដែរ សហគមន៍នេសាទចំនួន ២ ត្រូវបានជ្រើសរើសដើម្បីពង្រឹងការអនុវត្ត ក្លាយជាសហគមន៍នេសាទទំនើបគំរូ ៖ ១. សហគមន៍នេសាទអូរម្រះជា (ស.ន) ដែលបានទទួលការជួយគាំទ្រដោយគម្រោង ស្តីពី "ការអភិវឌ្ឍន៍សមត្ថភាពសហគ្រប់គ្រងជលផលសម្រាប់សហគមន៍បៃតង និរន្តរភាពធនធានជលផល និងមុខរបរចិញ្ចឹមជីវិតចម្រុះដែលហៅថា "គម្រោងសហគ្រប់គ្រងជលផលឆ្លាតវៃ (SFC)" ផ្តល់មូលនិធិដោយក្រសួងសមុទ្រនិងជលផល នៃសាធារណរដ្ឋកូរ៉េ អនុវត្តតាមរយៈអង្គការ FAO សហការជាមួយអគ្គនាយកដ្ឋានជលផល ហៅកាត់ថា "SFC FAO-ROK" ដែលបានជួយពង្រឹងសមត្ថភាពគណៈកម្មការ (ស.ន) និងបង្កើតមុខរបរចិញ្ចឹមត្រីបន្ថែមដល់សមាជិកចំនួន១៥គ្រួសារ ដោយបានជួយជីកស្រះកែលម្អ និងផ្តល់កូនត្រីពូជប្រភេទត្រីប្រា និងត្រីអណ្តែងចំនួន ២៥គីឡូក្រាម/គ្រួសារ ព្រមទាំងចំណីត្រីផងដែរ។  ទី២. សហគមន៍នេសាទត្បូងខ្លា ជាសហគមន៍នេសាទ មានសក្តានុពលសម្រាប់បង្កើតអេកូទេសចរណ៍ជលផល ដែលតម្រូវឱ្យមានការគាំទ្រពីដៃគូពាក់ព័ន្ធ បច្ចុប្បន្ននៅមិនទាន់មានការជួយគាំទ្រនៅឡើយ។   
ឯកឧត្តមបានឱ្យដឹងទៀតថា រីឯនៅខេត្តក្រចេះ សហគមន៍នេសាទសរុប៦៨ បានចុះបញ្ជីទទួលស្គាល់នៅក្រសួងកសិកម្មចំនួន៦៤ ក្នុងនេះបានចុះបញ្ជីប័ណ្ណកម្មសិទ្ធិ៤ សហគមន៍នេសាទ។ រីឯ សហគមន៍នេសាទ នៅសល់ត្រូវបន្តស្នើសុំចុះបញ្ជីប័ណ្ណកម្មសិទ្ធិជាផែនការអាទិភាព។
ទន្ទឹមនឹងនេះ សហគមន៍នេសាទចំនួន២ ត្រូវបានជ្រើសរើស សម្រាប់ពង្រឹងការអនុវត្តដើម្បីក្លាយជា ស.ន ទំនើបគំរូ រួមមាន៖ ១. សហគមន៍នេសាទកាំពីជា ស.ន បានជួយគាំទ្រពង្រឹងសមត្ថភាពដោយគម្រោង SFC FAO-ROK និងបង្កើតមុខរបរបន្ថែមជាអេកូទេសចរណ៍នៅបឹងរំអិល ទទួលបានសម្ភារៈប្រើប្រាស់ និងផ្ទះស្នាក់ចំនួន៣ ដែលការសាងសង់ទាំងអស់នេះនឹងត្រូវបញ្ចប់ក្នុងអំឡុងខែមិថុនាខាងមុខនេះ ដើម្បីធានាបានជោគជ័យនិងនិរន្តរភាពនូវការដំណើរការអេកូទេសចរណ៍ជលផលនៅបឹងរំអិលនៃ ស.ន កាំពី ដើម្បីជាប្រយោជន៍ដល់សមាជិក ស.ន ក្នុងការចូលរួមអភិរក្សសត្វផ្សោតមេគង្គប្រកបដោយប្រសិទ្ធភាព។ 
ចំណែក សហគមន៍នេសាទទំនប់បាក់ ជាស.ន ដែលបានចុះបញ្ជីប័ណ្ណកម្មសិទ្ធិរួចហើយ មានសក្តានុពលអេកូទេសចរណ៍ជលផលជាសំខាន់ផងដែរ ដោយមានទីតាំងទឹកធ្លាក់និងព្រៃលិចទឹកសម្រាប់ភ្ញៀវលេងកំសាន្ត ប៉ុន្តែនៅមិនទាន់មានដៃគូជួយគាំទ្រនៅឡើយ។ ដូច្នេះតម្រូវការចាំបាច់ គឺចុះជួយសម្របសម្រួលជាមួយសហគមន៍ក្នុងការរៀបចំដំណើរការអេកូទេសចរណ៍ជលផល ជាផែនការអាទិភាព សម្រាប់ឆ្នាំ២០២៦ និង២០២៧៕