ព័ត៌មានផ្សេងៗទៀត
ឯកឧត្តមរដ្ឋលេខាធិការ គង់ ច័ន្ទវាសនា ដឹកនាំក្រុមការងារចុះត្រួតពិនិត្យ និងពង្រឹងការគ្រប់គ្រងអាជីវកម្មជីនិងថ្នាំកសិកម្ម ក្នុងខេត្តបន្ទាយមានជ័យ
ចេញផ្សាយ ៤ កញ្ញា ២០២៤ 3619
នៅថ្ងៃទី៣ ខែកញ្ញា ឆ្នាំ២០២៤ ឯកឧត្តម គង់ ច័ន្ទវាសនា រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំក្រុមការងារក្រសួងចុះត្រួតពិនិត្យ និងពង្រឹងការគ្រប់គ្រងអាជីវកម្មជីនិងថ្នាំកសិកម្ម ក្នុងខេត្តបន្ទាយមានជ័យ។ ក្នុងជំនួបជាមួយលោក ឃ្លោក នួយ អភិបាលរងខេត្ត ឯកឧត្តមរដ្ឋលេខាធិការបានថ្លែងនូវការកោតសរសេីរចំពោះរដ្ឋបាលខេត្តបន្ទាយមានជ័យ និងមន្ទីរកសិកម្មខេត្ត ដែលជានិច្ចកាលតែងយកចិត្តទុកដាក់តាមដាន និងដោះស្រាយបញ្ហាប្រឈមជូនប្រជាកសិករបានទាន់ពេលវេលា។
ពាក់ព័ន្ធនឹងការគ្រប់គ្រងអាជីវកម្មជី និងថ្នាំកសិកម្ម ឯកឧត្តមរដ្ឋលេខាធិការបានសំណូមពរ និងលេីកទឹកចិត្តឱ្យរដ្ឋបាលខេត្ត មន្ទីរកសិកម្មខេត្ត និងអាជ្ញាធរពាក់ព័ន្ធ ព្រមទាំងសមត្ថកិច្ចប្រចាំការនៅតាមច្រកព្រំដែន បន្តចូលរួមសហការ និងបង្កេីនការទប់ស្កាត់ការនាំចូល និងចរាចរណ៍ជីនិងថ្នាំកសិកម្មខុសច្បាប់ ជាពិសេសប្រភេទថ្នាំកសិកម្មហាមឃាត់ ដេីម្បីការពារផលប្រយោជន៍ប្រជាកសិករ និងអាជីវករស្របច្បាប់ ព្រមទាំងសុខភាពសាធារណ: និងបរិស្ថានផងដែរ។ ជាការឆ្លេីយតប រដ្ឋបាលខេត្តបានសម្តែងនូវការគាំទ្រ និងចូលរួមសហការពេញលេញលេីការងារនេះ និងធ្វេីការណែនាំដល់សមត្ថកិច្ចពាក់ព័ន្ធចូលរួមអនុវត្តឱ្យមានប្រសិទ្ធភាពខ្ពស់។
ក្រោយកិច្ចពិភាក្សា ឯកឧត្តមរដ្ឋលេខាធិការ និងក្រុមការងារបានអញ្ជេីញចុះពិនិត្យការធ្វេីអាជីវកម្មជីនិងថ្នាំកសិកម្មនៅតាមដេប៉ូមួយចំនួនក្នុងទីរួមខេត្ត និងចុះជួបសមត្ថកិច្ចនៅតាមច្រកព្រំដែនសំខាន់ៗ ដូចជាច្រកតំបន់បឹងត្រកួន ច្រកអន្តរជាតិស្ទឹងបត់ និងច្រកតំបន់ម៉ាឡៃផងដែរ ដែលនៅទីនោះ ក្រុមការងារបានទទួលការស្វាគមន៍យ៉ាងកក់ក្តៅ និងកិច្ចសហការជិតស្និទ្ធលេីការទប់ស្កាត់ការនាំចូល និងចរាចរណ៍ជីនិងថ្នាំកសិកម្មខុសច្បាប់៕
