ឯកឧត្តមអនុរដ្ឋលេខាធិការ ប៉ែន ផល្លីកា អញ្ជើញចុះអង្កេតត្រួតពិនិត្យ ការប្រើប្រាស់ឧបករណ៍នេសាទ នៅក្នុងភូមិសាស្រ្តចំនួនពីរ

ចេញ​ផ្សាយ​ ៤ តុលា ២០២៥ 824

នៅថ្ងៃទី៣ តុលា ឆ្នាំ២០២៥ ឯកឧត្តម ប៉ែន ផល្លីកា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី ឌិត ទីណា បានអញ្ជើញចុះបំពេញបេសកកម្មសង្កេតមើល និងត្រួតពិនិត្យឧបករណ៍នេសាទលក្ខណ:គ្រួសារក្នុងរដូវបើកនេសាទ ក្នុងភូមិសាស្រ្តបឹងទន្លេសាប នៃខេត្តសៀមរាប និងបាត់ដំបង។ 
បេសកកម្មនេះអមដំណើរដោយលោកនាយរងអធិការដ្ឋានរដ្ឋបាលជលផលខាងជើងបឹងទន្លេសាប លោកនាយខណ្ឌរដ្ឋបាលជលផលសៀមរាប និងសហការី ព្រមទាំងសមាជិកសហគមន៍នេសាទ បានជួបសំណេះសំណាល និងសាកសួរសុខទុក្ខកងកម្លាំងប្រដាប់អាវុធយោធភូមិភាគទី៤ ប្រចាំការនៅសង្កាត់ចុងឃ្នៀស ដឹកនាំដោយលោកឧត្តមសេនីយ៍ត្រី អាន 
ប៊ុនទិ និងសហការី ហើយបានសហការចុះសង្កេតការត្រួតពិនិត្យបទល្មើសពីចំណុចសង្កាត់ចុងឃ្នៀស ក្រុងសៀមរាបរហូតដល់ភូមិមេជ្រៃ ឃុំកែវពណ៌ ស្រុកពួកខេត្តសៀមរាប។  
ឯកឧត្តមបានគូសបញ្ជាក់ថា កិច្ចសហការចុះទៅពិនិត្យជាក់ស្តែងឃើញថា គឺពុំបានជួបប្រទះការប្រើប្រាស់ឧបករណ៍ខុសច្បាប់ស្តីពីជលផលដែលគួរឱ្យកត់សំគាល់ឡើយ ដោយប្រជានេសាទគោរព និងអនុវត្តច្បាប់ក្នុងការនេសាទទៅតាមគោលការណ៍ដែលក្រុមការងារចម្រុះបានផ្សព្វផ្សាយ និងណែនាំ។ 
ជាមួយគ្នានេះ ក្រុមការងារក៏បានបន្តដំណើរចុះអង្កេតបន្តក្នុងអតីតឡូត៌នេសាទលេខ៣ ចាប់ពីស្ទឹងកំបុតរហូតដល់ភូមិព្រែកទាល់ ក្នុងឃុំកោះជីវាំង ស្រុកឯកភ្នំ ខេត្តបាត់ដំបង ដោយចាប់ដៃសហការជាមួយលោកនាយរងអធិការដ្ឋានរដ្ឋបាលជលផលខាងត្បូងបឹងទន្លេសាប និងថ្នាក់ដឹកនាំខណ្ឌរដ្ឋបាលជលផលបាត់ដំបង កងកម្លាំងបុស្តិ៍នគរបាលឃុំកោះជីវាំង និងសមាជិកសហគមន៍នេសាទ។
ទន្ទឹមនឹងនេះ ឯកឧត្តមបាន កោតសរសើរ និងថ្លែងអំណរគុណយ៉ាងជ្រាលជ្រៅ ដល់ក្រុមការងារចម្រុះ ដែលឈរជើងនៅតាមភូមិសាស្រ្តរបស់ខ្លួន សហការជាមួយក្រុមការងារ កងយោធពលខេមរភូមិន្ទ ទទួលបន្ទុកការងារទប់ស្កាត់ និងបង្ក្រាបបទល្មើសធនធានធម្មជាតិក្នុងបឹងទន្លេសាប ក្នុងខេត្ដបាត់ដំបង និងសៀមរាប ព្រមទាំងស្នើឱ្យសហការគ្នាកាន់តែជិតស្និទ្ធិបន្ថែមទៀត ក្នុងការ អនុវត្តន៍ភារកិច្ច ដើម្បីជាប្រយោជន៍រួមទាំងអស់គ្នា៕