លោកជំទាវ អ៊ឹម រចនា អនុរដ្ឋលេខាធិការក្រសួងកសិកម្ម អញ្ជើញដឹកនាំកិច្ចប្រជុំជាមួយអង្គការ UNIDO អំពីការរៀបចំដំណើរទស្សនកិច្ចសិក្សាសម្រាប់អ្នកសារព័ត៌មាន នៅពាក់កណ្តាលខែកក្កដា ឆ្នាំ២០២៤

ចេញ​ផ្សាយ​ ០៧ មិថុនា ២០២៤ 2263

នៅថ្ងៃទី០៧ ខែមិថុនា ឆ្នាំ២០២៤នេះ លោកជំទាវ អ៊ឹម រចនា អនុរដ្ឋលេខាធិការ និងជាអ្នកនាំពាក្យ ក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំជាមួយប្រធានទីប្រឹក្សាបច្ចេកទេស នៃអង្គការអភិវឌ្ឍន៍ឧស្សាហកម្មសហប្រជាជាតិ ហៅកាត់ថា (UNIDO) លោកបណ្ឌិត  Shetty Seetharama THOMBATHU និងមន្ត្រីបច្ចេកទេស។ នេះជាកិច្ចប្រជុំទី២ហើយ រវាងក្រុមការងារព័ត៌មាននៃក្រសួងកសិកម្ម រុក្ខាប្រមាញ់ និងនេសាទ​ ជាមួយអង្គការ UNIDO ដើម្បីរៀបចំដឹកនាំអ្នកសារព័ត៌មានទៅទស្សនកិច្ចសិក្សា នៅសហគ្រាសកែច្នៃផលិតផលជលផលសមុទ្រ តាមបណ្ដាខេត្តជាប់មាត់សមុទ្ររបស់កម្ពុជា នាពាក់កណ្តាលខែកក្កដា ឆ្នាំ២០២៤ខាងមុខនេះ។

នៅក្នុងកិច្ចប្រជុំដែលរៀបចំធ្វើនៅទីស្ដីការក្រសួងកសិកម្ម រុក្ខាប្រមាញ់ និងនេសាទ លោកជំទាវ អ៊ឹម រចនា មានប្រសាសន៍ថា ដំណើរទស្សនកិច្ចដែលរៀបចំឡើងក្នុងគោលបំណងឱ្យអ្នកសារព័ត៌មានបានស្វែងយល់ និងផ្សព្វផ្សាយពីខ្សែច្រវាក់ នៃការកែច្នៃផលិតជលផលសមុទ្រកម្ពុជា ដែលផលិតស្របតាមស្តង់ដាគុណភាព សុវត្ថិភាព ម្ហូបអាហារ។ តាមរយៈដំណើរទស្សនកិច្ចនេះ លោកជំទាវសង្ឃឹមយ៉ាងមុតមាំថា អ្នកសារព័ត៌មានមកពីស្ថាប័នចំនួន ២០ នឹងចូលរួមផ្សព្វផ្សាយអំពីសហគ្រាសកែច្នៃផលិតផលជលផលសមុទ្រឲ្យបានទូលំទូលាយ ក្នុងគោលដៅបង្កើនតម្រូវការក្នុងស្រុក និងទាក់ទាញអ្នកវិនិយោគបរទេសឲ្យមកបណ្ដាក់ទុនក្នុងអនុវិស័យជលផលកាន់តែច្រើនឡើង។

ដំណើរទស្សនកិច្ចសិក្សា និងផ្សព្វផ្សាយ អំពីសហគ្រាសជលផលក្រោយប្រមូលផល ទទួលបានការគាំទ្រពីគម្រោង CAPFish-Capture តាមគម្រោងនឹងធ្វើឡើងក្នុង «រាជធានីភ្នំពេញ ខេត្តកំពត កោះកុង និងខេត្តព្រះសីហនុ» ចាប់ផ្តើមនៅថ្ងៃទី១៥-១៨ ខែកក្កដា ឆ្នាំ២០២៤ខាងមុខ។

បើតាមស្មារតីអង្គប្រជុំ និងបើគ្មានការប្រែប្រួលណាមួយនោះទេ គម្រោងដំណើរទស្សនកិច្ចសម្រាប់អ្នកសារព័ត៌មានទៅកាន់សហគ្រាសកែច្នៃផលិតផលជលផលសមុទ្រ នឹងមានការចូលរួមពីក្រសួងកសិកម្ម រុក្ខាប្រមាញ់ និងនេសាទ រដ្ឋបាលជលផល អង្គការ UNIDO តំណាងសហភាពអឺរ៉ុបប្រចាំកម្ពុជា តំណាងសភាពាណិជ្ជកម្មអឺរ៉ុបនៅកម្ពុជា  និងអ្នកសារព័ត៌មានដែលអញ្ជើញមកពីស្ថាប័នសារព័ត៌មានផ្សេងៗចំនួនជាង ២០ស្ថាប័ន សរុប៦៥នាក់៕