ព័ត៌មានផ្សេងៗទៀត
ឯកឧត្តមរដ្ឋលេខាធិការ យ៉ង សាំង កុមារ និង ឯកឧត្តមវេជ្ជបណ្ឌិត ជា សំណាង អញ្ជើញដឹកនាំកិច្ចប្រជុំតម្រង់ទិស ស្តីពី «ការសម្របសម្រួល និងសមាហរណកម្មវិស័យកសិកម្ម សុខាភិបាល អប់រំ ដើម្បីទទួលបានលទ្ធផលអាហារូបត្ថម្ភកាន់តែប្រសើរឡើង»
ចេញផ្សាយ ១៥ សីហា ២០២៥ 522
ឯកឧត្តមបណ្ឌិត យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និង ឯកឧត្តមវេជ្ជបណ្ឌិត ជា សំណាង អនុប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ បានអញ្ជើញដឹកនាំកិច្ចប្រជុំតម្រង់ទិសគម្រោងអន្តរវិស័យគំរូស្តីពី «នវានុវត្តន៍ថ្មីសម្រាប់លទ្ធផលកាន់តែប្រសើរ ការធ្វើសមាហរណកម្មរវាងវិស័យកសិកម្ម សុខាភិបាល និងអប់រំ ដើម្បីផ្លាស់ប្តូរលទ្ធផលអាហារូបត្ថម្ភនៅកម្ពុជា» ហៅកាត់ថា «INAS» ធ្វើឡើងរយៈពេល៣ថ្ងៃ ពីថ្ងៃទី១៣ ដល់ថ្ងៃទី១៥ ខែសីហា ឆ្នាំ២០២៥ នៅសាលាខេត្តកំពង់ឆ្នាំង សាលាខេត្តកំពង់ធំ និង សាលាស្រុកមង្គលបូរី ខេត្តបន្ទាយមានជ័យ។
កិច្ចប្រជុំនេះមានការចូលរួមពី ឯកឧត្តម ខាត់ សុធី អនុរដ្ឋលេខាធិការ ឯកឧត្តមបណ្ឌិត សុខ សុីឡូ អគ្គលេខាធិការ ក.ក.ជ ឯកឧត្តម សាន់ យូ អភិបាលរងនៃគណៈអភិបាលខេត្តកំពង់ឆ្នាំង ឯកឧត្តម ព្រឹម រដ្ឋា អភិបាលរងនៃគណៈអភិបាលខេត្តកំពង់ធំ លោកស្រីវេជ្ជបណ្ឌិត ជា ម៉ារី ប្រធានកម្មវិធីជាតិអាហារូបត្ថម្ភ លោក ហ៊ូ ក្រើន នាយកអង្គការហេឡែន ខេលល័រ អន្តរជាតិកម្ពុជា លោក គង់ ពុទ្ធារិទ្ធិ អនុប្រធាននាយកដ្ឋានផ្សព្វផ្សាយកសិកម្ម រុក្ខាប្រមាញ់ និងនេសាទ លោកលី លាងសេង អនុប្រធានសុខភាពសិក្សានៃក្រសួងអប់រំ យុវជន និងកីឡា លោកស្រី អៀង កាណារ៉ា អភិបាលរងនៃគណៈអភិបាលស្រុកមង្គលបុរី លោក មេឃុំ ប្រធានមណ្ឌលសុខភាព នាយកសាលាបឋមសិក្សា និងមន្ត្រីកសិកម្មឃុំ នៃឃុំពាក់ព័ន្ធការអនុវត្តន៍គម្រោងសរុបអ្នកចូលរួមចំនួន១២២នាក់។
ឯកឧត្តមរដ្ឋលេខាធិការ យ៉ង សាំង កុមារ បានគូសបញ្ជាក់ថា INAS គឺជាគម្រោងគំរូថ្មីមួយ ដែលមានមហិច្ឆតាក្នុងការផ្លាស់ប្តូរលទ្ធផលអាហារូបត្ថម្ភនៅកម្ពុជាឱ្យកាន់តែប្រសើរ តាមរយៈការធ្វើការរួមគ្នា រវាងមន្ត្រីកសិកម្មឃុំ មណ្ឌលសុខភាព និងសាលារៀន ដើម្បីសម្រេចគោលដៅរួម។ ការអភិវឌ្ឍធនធានមនុស្សដែលផ្តោតលើសុខភាពម្តាយ និងកុមារអាយុក្រោម៥ឆ្នាំ តាមរយៈការសហការគ្នា រវាងសាលារៀន មណ្ឌលសុខភាពឃុំ និងមន្រ្តីកសិកម្មឃុំ ក្រោមការសម្របសម្រួលដោយរដ្ឋបាលឃុំសង្កាត់។
បើតាមឯកឧត្តម បានឱ្យដឹងទៀតថា មន្រ្តីកសិកម្មឃុំចូលរួមចំណែកយ៉ាងសំខាន់ លើការងាររបស់គម្រោងតាមរយៈការជំរុញកសិកម្មដែលគិតពីអាហារូបត្ថម្ភ ជាពិសេសក្នុងចំណោមគ្រួសារដែលមានកូនអាយុក្រោម៥ឆ្នាំ ក្នុងគោលបំណងរួម គឺកាត់បន្ថយអត្រាកុមារដែលក្រិន និងស្គមស្គាំង ដែលស្របគ្នាជាមួយយុទ្ធសាស្រ្តជាតិ ស្តីពីសន្តិសុខស្បៀង និងអាហារូបត្ថម្ភ ២០២៥-២០២៨។
សូមជម្រាបថា គម្រោងនេះ ក្រោមការសម្របសម្រួលដោយក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ ក្រសួងកសិកម្ម រុក្ខាប្រមាញ់ និងនេសាទ ក្រសួងសុខាភិបាល ក្រសួងអប់រំ យុវជន និងកីឡា និងរដ្ឋបាលថ្នាក់ក្រោមជាតិ ក្នុងកិច្ចសហការជាមួយអង្គការ Hellen Keller International និងអង្គការដៃគូ ដោយអនុវត្តការងាររួមគ្នានៅឃុំគំរូចំនួន២៥ នៅខេត្តចំនួន៥ រួមមាន៖ ខេត្តតាកែវ កំពត កំពង់ឆ្នាំង កំពង់ធំ និងខេត្តបន្ទាយមានជ័យ៕
