ឯកឧត្តមអនុរដ្ឋលេខាធិការ ប៉ែន ផល្លីកា ចុះល្បាតនិងផ្សព្វផ្សាយបទល្មើសជលផល ក្នុងភូមិសាស្ត្រខេត្តចំនួន៣

ចេញ​ផ្សាយ​ ១០ ធ្នូ ២០២៤ 2589

នៅថ្ងៃទី៩ ខែធ្នូ ឆ្នាំ២០២៤ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទបានដឹកនាំកម្លាំងអន្តរាគមន៍ថ្នាក់ជាតិទប់ស្កាត់ និងបង្រ្កាបបទល្មើសជលផលបឹងទន្លេសាបប្រចាំស្នាក់ការកំពង់ភ្លុក អមដំណើរដោយ កើត គា នាយអធិការដ្ឋានរដ្ឋបាលជលផលខាងជើងបឹងទន្លេសាប កងរាជអាវុធហត្ថលើផ្ទៃប្រទេស និងសហការីបានចុះបំពេញការងារក្នុងភូមិសាស្ត្រខេត្តសៀមរាប ពោធិ៍សាត់ និងបាត់ដំបង។

សមាសភាពដែលបានចូលរួមថ្ងៃនេះមាន កម្លាំងអធិការដ្ឋានរដ្ឋបាលជលផលខាងត្បូងបឹងទន្លេសាបចំនួន ៤នាក់ ផ្នែករដ្ឋបាលជលផលរាំងទិល រួមនិងសង្កាត់ក្រោមឱវាទចំនួន ៧នាក់ និងផ្នែករដ្ឋបាលជលផលព្រែកទាល់ និងសង្កាត់ក្រោមឱវាទ រួមទាំងទីបញ្ជាការស្រាលប្រចាំឃុំកោះជីវាំង ស្រុកឯកភ្នំចំនួន១៩ នាក់  សរុប ចំនួន ៤១ នាក់។

ជំនួបនេះធ្វើឡើងក្នុងគោលបំណង សំណេះសំណាលសួរសុខទុក្ខ និងបានបើកកិច្ចប្រជុំការពង្រឹងការងារអនុវត្តច្បាប់ស្តីពីជលផល និងវិធានការបន្តក្នុងការត្រួតពិនិត្យ ទប់ស្កាត់ បង្រ្កាបបទល្មើសផ្សេងៗទៀត ជាពិសេសឧបករណ៍នេសាទ អួនអូសទឹកសាប និងឈឹបយន្ត។

ទីតាំងដែលក្រុមការងារចុះល្បាតទាំងបីខេត្តនោះ រួមមាន ខេត្តពោធិ៍សាត់ នៅក្នុងភូមិសាស្រ្តផ្នែករដ្ឋបាលជលផលរាំងទិល សង្កាត់រដ្ឋបាលជលផលបាកាន ក្នុងដែនអភិរក្សជលផលឡូត៍លេខ២។ ចំណែក ខេត្តបាត់ដំបង នៅក្នុងភូមិសាស្រ្តផ្នែករដ្ឋបាលជលផលព្រែកទាល់ សង្កាត់រដ្ឋបាលជលផលក្បាលតោល ក្នុងដែនអភិរក្សឡូតិ៍លេខ២ និងខេត្តសៀមរាប ចុះត្រួតពិនិត្យបទល្មើសនៅក្នុងកន្លែងអភិរក្សជលផលឡូតិ៍លេខ៤ និងកន្លែងអភិរក្សជលផលកំពង់ភ្លុក ជាលទ្ធផលក្រុមការងារពុំសង្កេតឃើញមានការលួចធ្វើនេសាទឡើយ៕