ឯកឧត្តមបណ្ឌិត ហ៊ាន វណ្ណហន ដឹកនាំក្រុមការងារ CaWSIP-MAFF ចូលរួមកិច្ចប្រជុំបេសកកម្មគាំទ្រគម្រោងកែលម្អសន្តិសុខទឹកកម្ពុជា លើកទី២

ចេញ​ផ្សាយ​ ២ ធ្នូ ២០២៥ 2215

ថ្ងៃទី១ ខែធ្នូ ឆ្នាំ២០២៥ ឯកឧត្ដមបណ្ឌិត ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជានាយកគម្រោងកែលម្អសន្តិសុខទឹកកម្ពុជា (CaWSIP-MAFF) បានដឹកនាំមន្ត្រីអនុវត្តគម្រោងថ្នាក់ជាតិ និងថ្នាក់ខេត្ត ចូលរួមកិច្ចប្រជុំចាប់ផ្តើមបេសកកម្មគាំទ្រគម្រោងលើកទី២ របស់ធនាគារពិភពលោក នៅសណ្ឋាគារ Sun&Moon Riverside។ កិច្ចប្រជុំនេះត្រូវបានប្រារព្ធឡើងក្រោមអធិបតីភាព ឯកឧត្តម ឈា ប៊ុនរិទ្ធ រដ្ឋលេខាធិការប្រចាំការនៃក្រសួងធនធានទឹក និងឧតុនិយម និងជានាយកអង្គភាពគ្រប់គ្រងគម្រោង ដោយមានការអញ្ជើញចូលរួមពីក្រុមការងារអនុវត្តគម្រោងនៃក្រសួងកសិកម្ម រុក្ខាប្រមាញ់ និងនេសាទ, ក្រសួងធនធានទឹកនិងឧតុនិយម តំណាងក្រសួងសេដ្ឋកិច្ច និងហិរញ្ញវត្ថុ ក្រុមបេសកកម្មរបស់ធនាគារពិភពលោក ព្រមទាំងមន្ត្រីអនុវត្តគម្រោងថ្នាក់ខេត្តគោលដៅទាំងបួន រួមមាន ខេត្តក្រចេះ មណ្ឌលគិរី កំពង់ធំ និងខេត្តព្រះវិហារ សរុបប្រមាណ ៧០នាក់។
កិច្ចប្រជុំនេះធ្វើឡើង ដើម្បីពិនិត្យលើ វឌ្ឍនភាព និងបញ្ហាប្រឈមដែលបានជួបប្រទះក្នុងការអនុវត្តគម្រោង CaWSIP ក្នុងរយៈពេលមួយឆ្នាំកន្លងមក។ 
សូមជម្រាបថា បេសកកម្មលើកទី២ របស់ក្រុមការងារធនាគារពិភពលោកមានរយៈពេល ១២ថ្ងៃ ចាប់ពីថ្ងៃទី១ ខែធ្នូ រហូតដល់ថ្ងៃទី១២ ខែធ្នូ ឆ្នាំ២០២៥។ ក្នុងនោះដែរ ក៏មានកិច្ចប្រជុំពិក្សាតាមផ្នែកពាក់ព័ន្ធនឹងគម្រោង និងការអញ្ជើញចុះពិនិត្យទីតាំងអនុគម្រោង ដើម្បីសិក្សាស្វែងយល់ពីស្ថានភាពបច្ចុប្បន្ននៃប្រព័ន្ធធារាសាស្ត្រ និងស្ថានភាពការអនុវត្តកសិកម្មវៃឆ្លាតរបស់កសិករនៅតំបន់គោលដៅ ក្នុងខេត្តក្រចេះ និងខេត្តមណ្ឌលគិរី ផងដែរ៕