ព័ត៌មានផ្សេងៗទៀត
លោកជំទាវ ហ៊ូ សុពណ៌ អនុរដ្ឋលេខាធិការ ក្រសួងកសិកម្មអញ្ជើញដឹកនាំមន្ត្រីជំនាញ ចុះពិនិត្យ និងវាយតម្លៃផលប៉ះពាល់ នៃការវាយប្រហាររបស់ដង្កូវហ្វូងលើដំណាំស្រូវ នៅខេត្តព្រះសីហនុ
ចេញផ្សាយ ២៧ មិថុនា ២០២៤ 2352
នៅថ្ងៃទី២៦ ខែមិថុនា ឆ្នាំ២០២៤ លោកជំទាវ ហ៊ូ សុពណ៌ អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញដឹកនាំមន្ត្រីជំនាញ នៃអគ្គនាយកដ្ឋានកសិកម្ម អមដំណើរដោយលោក នេន ចំរើន ប្រធានមន្ទីរកសិកម្មខេត្ត លោកអភិបាលរងស្រុក និងអាជ្ញាធរមូលដ្ឋាន ចុះទៅពិនិត្យ និងវាយតម្លៃផលប៉ះពាល់ នៃការវាយប្រហាររបស់ដង្កូវហ្វូងលើដំណាំស្រូវរបស់កសិករ នៅខេត្តព្រះសីហនុ។
ក្នុងដំណើរនៃការចុះពិនិត្យជាក់ស្តែងបានសង្កេតឃើញ និងបានដោះស្រាយរួមមាន ១. នៅឃុំសាមគ្គី ការរាតត្បាតរបស់ដង្កូវហ្វូងមាននៅភូមិបឹងរាំង និងឃុំទឹកល្អក់ ការរាតត្បាតរបស់ដង្កូវហ្វូងមាននៅភូមិទួល ភូមិព្រែកផ្អាវ ភូមិជ្រលង និងភូមិកំពង់ស្មាច់តូច ស្រុកព្រៃនប់ ។ ក្រុមការងារមន្ទីរបានចុះអន្តរាគមន៍ និងបានផ្តល់ថ្នាំបាញ់កម្ចាត់ដង្កូវលើផ្ទៃដីចំនួន ១៣៨ហ.ត ស្មើនឹង ១៤៥គ្រួសារ។ គិតត្រឹមព្រឹកនេះ ដង្កូវហ្វូងត្រូវបានកម្ចាត់ទាំងស្រុង។
ទី២. នៅក្នុងឃុំកំពង់សីលា ស្រុកកំពង់សីលា ការរាតត្បាតរបស់ដង្កូវហ្វូងមាននៅភូមិថ្មី និងភូមិចាំស្រី ដែលខណៈនោះក្រុមការងារមន្ទីរកសិកម្មខេត្ត បានចុះអន្តរាគមន៍ និងបានផ្តល់ថ្នាំបាញ់កម្ចាត់ដង្កូវលើផ្ទៃដីចំនួន ១៤០ហិកតា ស្មើនឹង ៩៦គ្រួសារ ដោយគិតត្រឹមថ្ងៃ២៧នេះ វត្តមានដង្កូវហ្វូងនៅសេសសល់តិចតួចបំផុត ហើយកសិករម្ចាស់ស្រែនឹងបាញ់ថ្នាំកម្ចាត់បង្ហើយទាំងស្រុងនៅរសៀលនេះ។
នាឱកាសនោះដែរ លោកជំទាវ ហ៊ូ សុពណ៌ ក៏បានអំពាវនាវឱ្យកសិករទាំងអស់ត្រូវតែបន្តចុះពិនិត្យស្រែជាប្រចាំ។ ក្នុងករណីជួបប្រទះដង្កូវបំផ្លាញដំណាំស្រូវ ត្រូវរាយការណ៍ ឬទំនាក់ទំនងទៅអាជ្ញាធរមូលដ្ឋានដែលនៅជិតបំផុតតាមឃុំ-ស្រុក ដើម្បីជួយផ្តល់ការណែនាំពីបច្ចេកទេស ឬរបៀបនៃការប្រើប្រាស់ថ្នាំកសិកម្មបាញ់កំចាត់ដង្កូវឱ្យបានទាន់ពេលវេលា និងមានប្រសិទ្ធភាព។
សូមបញ្ជាក់ផងដែរថា ក្នុងដំណើរនៃការចុះពិនិត្យនោះ មន្ទីរកសិកម្មខេត្តព្រះសីហនុ បានចែកជូនប្រជាកសិករនូវថ្នាំបាញ់កម្ចាត់ដង្កូវ ជូនដល់កសិករទាំង២៤១គ្រួសារ ដែលរងផលប៉ះពាល់ ព្រមទាំងបានណែនាំអំពីវិធីប្រើប្រាស់ និងវិធានការ ការពារក្នុងពេលបាញ់ថ្នាំថែមទៀតផង៕
