ព័ត៌មានផ្សេងៗទៀត
ឯកឧត្តម គង់ ច័ន្ទវាសនា អញ្ជើញចូលរួមពិធីអបអរសាទរទិវាអន្តរជាតិប្រយុទ្ធប្រឆាំងគ្រឿងញៀន នៅសាលមហោស្រព កោះពេជ្រ
ចេញផ្សាយ ២៥ មិថុនា ២០២៦ 51
តបតាមការចាត់តាំងរបស់ឯកឧត្តមរដ្ឋមន្ត្រី ឌិត ទីណា ឯកឧត្តមរដ្ឋលេខាធិការ គង់ ច័ន្ទវាសនា ប្រធានក្រុមការងារប្រយុទ្ធប្រឆាំងគ្រឿងញៀននៃក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមពិធីអបអរសាទរទិវាអន្តរជាតិប្រយុទ្ធប្រឆាំងគ្រឿងញៀន នៅសាលមហោស្រព កោះពេជ្រ ក្រោមអធិបតីភាពដ៏ខ្ពង់ខ្ពស់របស់ ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន និងជាតំណាងដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។
ក្រោមការដឹកនាំរបស់ ឯកឧត្តមរដ្ឋមន្ត្រី ឌិត ទីណា ក្រសួងកសិកម្ម រុក្ខាប្រមាញ់ និងនេសាទ យកចិត្តទុកដាក់ខ្ពស់លើការងារអប់រំផ្សព្វផ្សាយប្រយុទ្ធប្រឆាំងគ្រឿងញៀន ដោយបានរៀបចំការធ្វើតេស្តរហ័សរកសារធាតុញៀនតាមទឹកមូត្រជាបន្តបន្ទាប់ ក្នុងចំណោមថ្នាក់ដឹកនាំ និងមន្ត្រីរាជការគ្រប់លំដាប់ថ្នាក់ ដើម្បីធានាភាពស្អាតស្អំ, ផ្សព្វផ្សាយដល់មន្ត្រីតាមអង្គភាពចំណុះ និងរៀបចំកម្មវិធីផ្សព្វផ្សាយអំពីគ្រោះថ្នាក់នៃគ្រឿងញៀន ដល់និស្សិតនៃគ្រឹះស្ថានឧត្តមសិក្សាកសិកម្មទាំង៣ របស់ក្រសួង ព្រមទាំងជួយផ្សព្វផ្សាយដល់ក្រុមហ៊ុនពាក់ព័ន្ធ មន្ត្រីកសិកម្មឃុំ ប្រជាសហគមន៍កសិកម្ម សហគមន៍នេសាទ សហគមន៍ព្រៃឈើ និងប្រជាកសិករតាមបណ្តាខេត្តនានា ជាពិសេសក្នុងវេទិកាសាធារណៈនៅខេត្តបន្ទាយមានជ័យ។
ដើម្បីជាការចូលរួមអបអរសាទរទិវាប្រកបដោយអត្ថន័យជ្រាលជ្រៅនេះ ក្រសួងកសិកម្ម រុក្ខាប្រមាញ់ និងនេសាទ បានរៀបចំតាំងបង្ហាញស្តង់ពិព័រណ៌របស់ខ្លួន ដើម្បីបង្ហាញអំពីសកម្មភាព និងលទ្ធផលការងារប្រយុទ្ធប្រឆាំងនឹងគ្រឿងញៀនដែលបានអនុត្តនាពេលកន្លងទៅ ជាមួយស្តង់នៃបណ្តាក្រសួង-ស្ថាប័ន និងអង្គភាពជាច្រើនទៀត៕
