ក្រសួងកសិកម្ម រៀបចំសិក្ខាសាលាស្តីពី «ការប្រើប្រាស់ធ្យូងជីវៈ និងទឹកខ្មេះធ្យូងជីវៈ» ដើម្បីពង្រឹងសមត្ថភាពមន្ត្រីកសិកម្មឃុំ នៅខេត្តកំពង់ស្ពឺ និងខេត្តកំពត

ចេញ​ផ្សាយ​ ១៤ សីហា ២០២៦ 2761

នៅថ្ងៃទី១១ និងថ្ងៃទី១៤ ខែសីហា ឆ្នាំ២០២៦ នាយកដ្ឋានផ្សព្វ​ផ្សាយកសិកម្ម សហការជាមួយមន្ទីរកសិកម្ម រុក្ខាប្រមាញ់ និង​នេសាទ ខេត្តកំពង់ស្ពឺ ខេត្តកំពត និងអង្គការ GIZ បានរៀបចំ​សិក្ខា​សាលាស្តីពី «ការប្រើប្រាស់ធ្យូងជីវៈ និងទឹកខ្មេះធ្យូងជីវៈ​ក្នុងវិស័យកសិកម្ម» ក្រោមអធិបតីភាពដ៏ខ្ពង់ខ្ពស់របស់ ឯកឧត្តម​បណ្ឌិត យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ។
សិក្ខាសាលានេះ មានការអញ្ជើញចូលរួមពី ឯកឧត្តម ខាត់ សុធី អនុរដ្ឋលេខាធិការ លោកប្រធានមន្ទីរកសិកម្ម រុក្ខាប្រមាញ់ និង​នេសាទ នៃខេត្តទាំងពីរ ព្រមទាំងថ្នាក់ដឹកនាំ និងមន្ត្រីជំនាញនៃ​នាយក​ដ្ឋានផ្សព្វផ្សាយកសិកម្ម និងនាយកដ្ឋានធនធានដី នៃអគ្គនាយកដ្ឋានក្សេត្រសាស្ត្រ។
សិក្ខាសាលារៀបចំឡើង ក្នុងគោលបំណងពង្រឹងសមត្ថភាព​មន្ត្រីបច្ចេកទេស ជាពិសេសមន្ត្រីកសិកម្មឃុំ ឱ្យទទួលបាន​ចំណេះ​ដឹង និងជំនាញច្បាស់លាស់ អំពីការប្រើប្រាស់ធ្យូងជីវៈ និងទឹកខ្មេះធ្យូងជីវៈ ដើម្បីអាចចុះផ្សព្វផ្សាយ ធ្វើបង្ហាញសាក​ល្បង និងផ្តល់ការគាំទ្រដល់កសិករក្នុងការអនុវត្ត​បច្ចេកវិទ្យា​ទាំងនេះ ប្រកបដោយប្រសិទ្ធភាព និងសុវត្ថិភាព។ ការអនុវត្ត​បច្ចេកវិទ្យានេះ នឹងជួយកាត់បន្ថយការប្រើប្រាស់ធាតុចូលគីមី កាត់បន្ថយថ្លៃដើមផលិតកម្ម កែលម្អសុខភាពដី និងលើក​កម្ពស់សុវត្ថិភាពចំណីអាហារ។
ថ្លែងក្នុងឱកាសនោះ ឯកឧត្តមបណ្ឌិត យ៉ង សាំង កុមារ បានគូស​បញ្ជាក់ថា មន្ត្រីកសិកម្មឃុំមានតួនាទីយ៉ាងសំខាន់ក្នុង​ការផ្សព្វ​ផ្សាយ និងជំរុញការអនុវត្តបច្ចេកវិទ្យាកសិកម្មថ្មីៗដល់កសិករ។ ក្នុងនោះ មន្ត្រីកសិកម្មឃុំត្រូវផ្តោតលើការអនុវត្តវិធីសាស្ត្រ​ដែល​ផ្អែកលើទិន្នន័យ និងភស្តុតាងជាក់ស្តែង ការធ្វើបង្ហាញសាក​ល្បង ការចងក្រងឯកសារ និងការផ្សព្វផ្សាយបន្ត ដើម្បីជំរុញឱ្យ​កសិករអនុវត្តបច្ចេកវិទ្យាកសិកម្ម ដែលមានប្រសិទ្ធភាព សុវត្ថិភាព និងសមស្របទៅនឹងស្ថានភាពជាក់ស្តែង។
ក្នុងអង្គសិក្ខាសាលា សិក្ខាកាមបានចូលរួមចែករំលែក​បទ​ពិសោធន៍ ពិភាក្សា និងវាយតម្លៃលទ្ធផលនៃការអនុវត្តជាក់ស្តែង ព្រមទាំងរួមគ្នារៀបចំផែនការពង្រីកការផ្សព្វផ្សាយ និងការប្រើ​ប្រាស់​ធ្យូងជីវៈ និងទឹកខ្មេះធ្យូងជីវៈ តាមរយៈបណ្តាញមន្ត្រី​កសិកម្មឃុំ។ សកម្មភាពនេះ គឺជាផ្នែកមួយក្នុងការលើកកម្ពស់​ការផ្ទេរចំណេះដឹង និងបច្ចេកវិទ្យាកសិកម្មទៅដល់មូលដ្ឋាន ដើម្បី​រួមចំណែកដល់ការអភិវឌ្ឍវិស័យកសិកម្មនៅកម្ពុជា ឱ្យ​កាន់​តែមានប្រសិទ្ធភាព និងចីរភាព៕