ឯកឧត្តមអនុរដ្ឋលេខាធិការ ប៉ែន ផល្លីកា អញ្ជើញដឹកនាំកម្លាំងអអន្តរាគមន៍ថ្នាក់ជាតិទប់ស្កាត់និងបង្រ្កាបបទល្មើសជលផលក្នុងភូមិសាស្រ្តបឹងទន្លេសាប

ចេញ​ផ្សាយ​ ២៦ កញ្ញា ២០២៤ 2826

នៅថ្ងៃទី២៣ ខែកញ្ញា ឆ្នាំ២០២៤ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានដឹកនាំកងអន្តរាគមន៍ថ្នាក់ជាតិ ចុះទប់ស្កាត់និងបង្ក្រាបបទល្មើសនេសាទជលផល ក្នុងភូមិសាស្ត្របឹងទន្លេសាប ចាប់ពីចំណុចភូមិក្បាលក្របី ច្បាប់ញាំ បឹងកំប្រាំង ចែងពាក់កន្ទេល ស្ថិតនៅក្នុងភូមិក្បាលតោល ឃុំកោះជីវាំង ស្រុកឯកភ្នំ ខេត្តបាត់ដំបង។

ដំណើរចុះបង្ក្រាបនោះ ក៏មានការអមដំណើរពីសំណាក់លោក កើត គា នាយនិងនាយរងអធិការដ្ឋានរដ្ឋបាលជលផលខាងជើងបឹងទន្លេសាប និងសហការី លោកវរសេនីយ៍ឯក សេង សំអាត និងសហការី តំណាងកងរាជអាវុធហត្ថលើផ្ទៃប្រទេស បានសហការជាមួយលោក ឡេង វណ្ណារា នាយផ្នែករដ្ខបាលជលផលព្រែកទាល់ និងកងកម្លាំងទីបញ្ជាការស្រាលខេត្តបាត់ដំបង សរុបចំនួន ២៦នាក់ ដោយប្រើមធ្យោបាយកាណូតចំនួន០៥គ្រឿង។

នៅក្នុងបេសកកម្មចុះបង្ក្រាបនេះ កងកម្លាំប្រតិបត្តិការបានរុះរើ និងបំផ្លាញចោលនៅនឹងកន្លែង វត្ថុតាងមួយចំនួន រួមមាន៖ របាំងសាច់អួនក្រឡាតូចជាង ៣សង់ទីម៉ែត្រ ចំនួន ៨របាំង សាច់អួនប្រវែងប្រមាណ ២ ៥០០ម៉ែត្រ ឡុកចាប់ត្រីចំនួន ២០ក្បាល ប ចំនួន ៨គ្រឿង បង្គោលចំនួន ៩០០ដើម។ ចំណែក កូនត្រីចម្រុះប្រមាណ១៥០គីឡូក្រាម ត្រូវបានចាក់លែងចូលក្នុងបឹងធម្មជាតិវិញ៕