ឯកឧត្តម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ដឹកនាំគណៈប្រតិភូក្រសួង ចូលជួបពិភាក្សាការងារជាមួយគណៈកម្មការទី៣នៃរដ្ឋសភា

ចេញ​ផ្សាយ​ ១២ កុម្ភៈ ២០១៨ 4235

នៅព្រឹកថ្ងៃទី១៧ ខែឧសភា ឆ្នាំ២០១៦ ឯកឧត្តម វេង សាខុន រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទ ដឹកនាំគណៈប្រតិភូក្រសួង ចូលជួបពិភាក្សាការងារជាមួយគណៈកម្មការទី៣នៃរដ្ឋសភាដឹកនាំដោយ ឯកឧត្តម ប៉ុល ហម ប្រធានគណៈកម្មការទី៣នៃរដ្ឋសភា នៅវិមានរដ្ឋសភា។ ក្នុងនាមក្រសួងកសិកម្ម រុក្ខាប្រមាញ់ និងនេសាទ ឯកឧត្តមរដ្ឋមន្ត្រី បានធ្វើសេចក្តីរាយការណ៏ ជូនគណៈកម្មការទី៣នៃរដ្ឋសភាអំពីៈ

- ស្ថានភាពទូទៅនៃវិស័យកសិកម្ម

- អំពីសមិទ្ធផលដែលក្រសួងសម្រេចបានឆ្នាំ២០១៥ ព្រមទាំងអំពីការរៀបចំគោល នយោបាយសម្រាប់អភិវឌ្ឍវិស័យកសិកម្ម

- ក្រសួងបានរៀបចំផែនការយុទ្ធសាស្រ្តអភិវឌ្ឍន៏វិស័យ កសិកម្ម២០១៤-២០១៨ ផែនការសកម្មភាពបម្រែបម្រួលអាកាសធាតុក្នុងវិស័យកសិកម្ម២០១៤-២០១៨ គោលនយោបាយ និងក្របខ័ណ្ឌផែនការយុទ្ធសាស្រ្តអភិវឌ្ឍន៏ផលិតកម្មសត្វ និងសុខភាព សត្វ២០១៦-២០២៥ និងគោលនយោបាយផ្សព្វផ្សាយកសិកម្មកម្ពុជា ប្រើប្រាស់ក្នុងទិសដៅដើម្បីជំរុញបង្កើនប្រសិទ្ធភាពនៃការផ្តល់សេវាបច្ចេកទេសកសិកម្មដល់ប្រជាកសិករ និងសហគមន៏កសិកម្ម និងអនុវត្តផែនការសកម្មភាពសម្រាប់ អនុវត្តគោលនយោបាយអភិវឌ្ឍន៍វិស័យឧស្សាហកម្មកម្ពុជា ២០១៥-២០២៥។ ទន្ទឹមនឹងនេះ ឯកឧត្តមរដ្ឋមន្ត្រី ក៏បានជម្រាបជូនគណៈកម្មការទី៣នៃរដ្ឋសភាអំពីទិសដៅការងារអនុវត្តសម្រាប់ឆ្នាំ២០១៦-២០១៧ ដើម្បីឆ្លើយតប និងឈានទៅសម្រេចជោគជ័យទៅនឹងការអនុវត្តនូវយុទ្ធសាស្រ្តចតុកោណ ដំណាក់កាលទី៣ ផែនការយុទ្ធ សាស្រ្តអភិវឌ្ឍន៍ជាតិ ២០១៤-២០១៨ ព្រមទាំង ផែនការយុទ្ធសាស្រ្ត៥ឆ្នាំ ដែលជាផែនទីបង្ហាញផ្លូវ សម្រាប់ក្រសួងបានដាក់ចេញនូវទិសដៅការងារត្រូវអនុវត្តនៅក្នុងឆ្នាំ ២០១៦-២០១៧ តាម​ផ្នែកនីមួយៗ ផងដែរដោយផ្តោតសំខាន់ទៅលើៈ

- ការបង្កើនការស្រាវជ្រាវ និងផ្សព្វផ្សាយកសិកម្ម

- បង្កើនការខិតខំរិះរកនូវចំណុចគន្លឹះជាលក្ខណៈយុទ្ធសាស្ត្រ ដើម្បីជំរុញការអភិវឌ្ឍន៍ប្រព័ន្ធបញ្ចេញបញ្ចូលទឹកឲ្យដល់ដីស្រែរបស់កសិករ និងស្វែងរកយន្តការក្នុងការគ្រប់គ្រងទឹកឲ្យមានប្រសិទ្ធភាព

- ខិតខំរៀបចំសេចក្តីព្រាងច្បាប់ ស្តីពីកៅស៊ូ និងលិខិតបទដ្ឋានគតិយុទ្ធដើម្បីប្រើប្រាស់ និងគ្រប់គ្រងវិស័យកៅស៊ូនៅកម្ពុជ ឲ្យស្របនឹងបរិបទនៃសាកលភាវូបនីយកម្ម

- ជំរុញការចិញ្ចឹមសត្វឲ្យមានប្រនិរន្តភាព តាមរយៈការពង្រឹងប្រសិទ្ធភាព ការស្រាវជ្រាវ និងផ្សព្វផ្សាយ

- បង្កើនការការពារ និងអភិរក្សធនធានជលផល និងជំរុញការអភិវឌ្ឍន៍វារីវប្បកម្ម

- ជំរុញការដាំ និងស្តារព្រៃឈើទ្បើងវិញព្រម ទាំងពង្រីក និងពង្រឹងសហគមន៍ព្រៃឈើឲ្យមាននិរន្តរភាពសិក្សាពិនិត្យលើលទ្ធភាពធ្វើកំណែទម្រង់រចនាសម្ព័ន្ធរបស់ក្រសួងដើម្បីបង្កើនប្រសិទ្ធភាពនៃការគ្រប់គ្រងស្ថាប័ន ការផ្តល់សេវាគាំទ្រ និងពង្រឹងសមត្ថភាពផ្នែកអប់រំ និងបណ្តុះបណ្តាល សម្រាប់អភិវឌ្ឍវិស័យកសិកម្មប្រកបដោយនិរន្តរភាព។

ឯកឧត្តមប្រធានគណៈកម្មការទី៣នៃរដ្ឋសភា បានថ្លែងអំណរគុណចំពោះឯកឧត្តមរដ្ឋមន្ត្រីដែលបានធ្វើសេចក្តីរាយការណ៍អំពីស្ថានភាពទូទៅនៃវិស័យកសិកម្ម និងសមិទ្ធផលដែលក្រសួងសម្រេចបានឆ្នាំ២០១៥ ព្រមទាំងទិសដៅការងារត្រូវអនុវត្តនៅក្នុង ឆ្នាំ២០១៦-២០១៧ ជូនគណៈកម្មការទី៣នៃរដ្ឋសភា និងបានឆ្លើយនូវរាល់សំណួរ និងបញ្ហា ជាកង្វល់ ដែលឯកឧត្តមអនុប្រធាន ឯកឧត្តម លោកជំទាវជាសមាជិក សមាជិកានៃគណៈកម្មការទី៣ និងគណៈកម្មការផ្សេងៗទៀតបានលើកទ្បើង។ ឯកឧត្តមប្រធានគណៈកម្មការទី៣ បានសរុបលទ្ធផលនៃ ជំនួបកិច្ច ពិភាក្សារួមមាន ៤ ចំណុច ដូច ខាងក្រោមៈ ១ -បញ្ហាព្រៃឈើ ការការពារព្រៃលិចទឹក បញ្ហាការឆេះព្រៃ ២- បញ្ហាបទល្មើសជលផល ៣-បញ្ហាកសិកម្ម ៤-បញ្ហាគ្រប់គ្រងមន្ត្រីរាជការ ឯកឧត្តមប្រធាន គណៈកម្មការ បានស្នើសុំឲ្យក្រសួងយកចិត្តទុក ដាក់បន្ថែមទៀតលើការងារទាំង ៤ ចំណុច ដូចខាងលើ ដូចជាៈ ការពារ និងទប់ស្កាត់បទល្មើស និងការដាក់ទោសចំពោះជនល្មើសដែលប្រព្រឹត្តបទល្មើស ការទប់ស្កាត់ការនាំចូលផលិតផលកសិកម្ម ការផ្តល់សេវាការទប់ស្កាត់អំពើពុករលួយ។ល។ ក្នុងនាម ក្រសួងកសិកម្ម រុក្ខាប្រមាញ់ និងនេសាទ ឯកឧត្តមរដ្ឋមន្ត្រី បានថ្លែងអំណរគុណចំពោះ គណៈកម្មការទី៣ នៃរដ្ឋសភា និងគណៈកម្មការផ្សេងៗទៀតនៃរដ្ឋសភាចំពោះការលើកទ្បើងនូវសំណួរ និងបញ្ហាជាក្តីកង្វល់ ហើយឯកឧត្តមរដ្ឋមន្ត្រីនឹងទទួលយកនូវរាល់ចំណុចដែលបានលើកទ្បើងខាងលើដើម្បីធ្វើការកែរលំអរដើម្បីនិរន្តភាពការងាររបស់ក្រសួង។