ឯកឧត្តមរដ្ឋមន្ត្រី ឌិត ទីណា បានអញ្ជើញចូលរួមស្ដាប់បទបង្ហាញអំពីគម្រោងទាំងអស់ដែលក្រសួងកំពុងតែអនុវត្តជាមួយដៃគូអភិវឌ្ឍ

ចេញ​ផ្សាយ​ ២៦ ធ្នូ ២០២២ 3216

ការធ្វើបទបង្ហាញរបស់ឯកឧត្តម ឃី កុសល អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ ពីគម្រោងទាំងអស់របស់ក្រសួងជូនថ្នាក់ដឹកនាំ និងមន្ត្រីពាក់ព័ន្ធ ================================== នាព្រឹកថ្ងៃសុក្រ ១កើត ខែបុស្ស ឆ្នាខាល ចត្វាស័ក ព.ស២.៥៦៦ ត្រូវនឹងថ្ងៃទី២៣ ខែធ្នូ ថ្នាក់ដឹកនាំនិងមន្ដ្រីពាក់ព័ន្ធនៃក្រសួងកសិកម្ម រុក្ខាប្រមាញ់ និងនេសាទ បានចូលរួមស្ដាប់បទបង្ហាញរបស់ ឯកឧត្តម ឃី កុសល អនុរដ្ឋលេខាធិការ អំពីគម្រោងទាំងអស់ដែលក្រសួងកំពុងតែអនុវត្តជាមួយដៃគូអភិវឌ្ឍ។ ជាការពិតជំនួយរបស់ដៃគូអភិវឌ្ឍទាំងអស់បានផ្ដល់លទ្ធភាពដល់ក្រសួងកសិកម្ម រុក្ខាប្រមាញ់ និងនេសាទ អាចអនុវត្តនូវគម្រោងនានាក្នុងគោលដៅធ្វើឱ្យប្រសើរឡើងនូវជីវភាពរបស់បងប្អូនប្រជាកសិករ និងវិស័យកសិកម្មនៅកម្ពុជា តាមរយៈវគ្គបណ្ដុះបណ្ដាលជំនាញបច្ចេកទេសថ្មីៗ និងហេដ្ឋារចនាសម្ព័ន្ធរូបវ័ន្តជាច្រើន។ តែទោះបីជាយ៉ាងណាក៏ដោយជាអនុសាសន៍ ឯកឧត្តម ឌិត ទីណា រដ្ឋមន្ត្រី ក្រសួងកសិកម្ម រុក្ខាប្រមាញ់ និងនេសាទបានណែនាំដល់មន្ដ្រីដែលទទួលបន្ទុកលើគម្រោងទាំងអស់ឱ្យពិនិត្យមើលឡើងវិញអំពីគុណតម្លៃនៃគម្រោងនីមួយៗ ថាតើគម្រោងទាំងនោះពិតជាផ្ដល់ផលពិតប្រាកដ ជាតម្រូវការចំគោលដៅ និងមាននិរន្ដរភាពដែរឬទេ ព្រោះបើពុំដូច្នោះទេ ការខិតខំចំណាយពេលវេលា ធនធានមនុស្ស និងហិរញ្ញវត្ថុ ទៅលើគម្រោងទាំងនេះនឹងមិនអាចផ្ដល់ផលប្រយោជន៍ពិតប្រាកដនិងយូរអង្វែងដល់ប្រជាកសិករ និងវិស័យកសិកម្មឡើយ៕