ឯកឧត្ដម សុខ វិសាល អនុរដ្ឋលេខាធិការក្រសួងកសិកម្ម បានដឹកនាំមន្ត្រីជំនាញចុះពិនិត្យផលប៉ះពាល់ដំណាំដែលរងការបំផ្លាញដោយសារ «រុយស» នៅខេត្តតាកែវ

ចេញ​ផ្សាយ​ ០៨ កក្កដា ២០២៤ 1393

នៅព្រឹកថ្ងៃទី៦ ខែកក្កដា ឆ្នាំ២០២៤ ឯកឧត្ដម សុខ វិសាល អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណើរដោយមន្ត្រីជំនាញនៃអគ្គនាយកដ្ឋានកសិកម្ម  លោកប្រធាន ព្រមទាំងមន្ត្រីជំនាញនៃមន្ទីរកសិកម្មខេត្ត អាជ្ញាធរដែនដី បានចុះពិនិត្យផលប៉ះពាល់ដំណាំស្រូវ ដែលរងការបំផ្លាញដោយសារ «រុយស» នៅក្នុងស្រុកចំនួន២នៃខេត្តតាកែវ ដើម្បីចាត់វិធានការឱ្យបានទាន់ពេលវេលា។

ឯកឧត្តមមានប្រសាសន៍ថា ជាលទ្ធផលក្រុមការងារជំនាញសង្កេតឃើញថា គិតត្រឹមថ្ងៃទី៦ ខែកក្កដា ឆ្នាំ២០២៤នេះ «រុយស» បានបំផ្លាញដំណាំស្រូវប្រជាកសិករនៅក្នុងស្រុកព្រៃកប្បាស និងស្រុកអង្គរបូរី ខេត្តតាកែវ នៅក្នុងកម្រិតទាប និងអាចគ្រប់គ្រងបានទាំងស្រុង។ ដោយឡែក ការបំផ្លាញដំណាំស្រូវរបស់ដង្កូវមូរស្លឹក នៅមានកម្រិតទាបផងដែរ។

ទន្ទឹមនឹងនោះ ឯកឧត្ដម សុខ វិសាល និងមន្ត្រីជំនាញពាក់ព័ន្ធ ក៏បានសហការជាមួយក្រុមហ៊ុន ខេមបូឌាន ឆេមភៀន អាហ្ក្រោខេមីខល ឯ.ក ឱ្យជួយផ្សព្វផ្សាយពីវិធានការការពារនិងកំចាត់ «រុយស» និងដង្កូវមូរស្លឹក នៅក្នុងឃុំកំពែង ស្រុកព្រៃកប្បាស និងឃុំផ្គាំ ស្រុកអង្គរបូរី ខេត្តតាកែវថែមទៀតផង ។ បន្ថែមពីនេះ ឯកឧត្តមក៏បានអំពាវនាវឱ្យកសិករ មន្ត្រីកសិកម្ម បន្តតាមដានការបំផ្លាញដំណាំស្រូវដោយសត្វល្អិតចង្រៃជាប្រចាំ ដើម្បីរួមគ្នាទប់ស្កាត់ឱ្យបានប្រសិទ្ធភាព និងប្រសិទ្ធផលខ្ពស់៕