ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ហុង ណារិត អញ្ជើញដឹកនាំក្រុមការងារចុះពិនិត្យការប្រមូលផលស្រូវរបស់ប្រជាកសិករ និងជួបសំណេះសំណាលជាមួយម្ចាស់រោងម៉ាស៊ីនកិនស្រូវ និងសហគមន៍កសិកម្ម នៅខេត្តបន្ទាយមានជ័យ
ចេញផ្សាយ ២១ មករា ២០២៥ 1758
នៅថ្ងៃទី២០ ខែមករា ឆ្នាំ២០២៥ ឯកឧត្តម ហុង ណារិត អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អមដំណេីរដោយលោក សាន វួន អនុប្រធានមន្ទីរកសិកម្មខេត្ត និងសហការី លោកអភិបាលរងស្រុកភ្នំស្រុក អជ្ញាធរភូមិ និងមន្រ្តីកសិកម្មឃុំ បានចុះពិនិត្យការប្រមូលផលស្រូវរបស់ប្រជាកសិករ និងជួបសំណេះសំណាលជាមួយម្ចាស់រោងម៉ាស៊ីនកិនស្រូវ និងសហគមន៍កសិកម្ម នៅខេត្តបន្ទាយមានជ័យ។
ក្នុងដំណេីរបេសកកម្មនេះ ឯកឧត្តមអនុរដ្ឋលេខាធិការ បានជួបសំណេះសំណាលជាមួយប្រជាកសិករផលិតស្រូវ និងបានពន្យល់យ៉ាងសុីជម្រៅពីការធ្លាក់ចុះនៃប្រភេទពូជស្រូវអូអឹម៥៤៥១ ដែលជាពូជស្រូវនាំចូលពីបរទេស និងបានគណនានូវថ្លៃដេីមផលិតជូនប្រជាកសិករដេីម្បីបានយល់កាន់តែច្បាស់ពីប្រសិទ្ធភាពសេដ្ឋកិច្ច សំដៅកាត់បន្ថយថ្លៃដេីមផលិតក្នុងផលិតកម្មដំណាំស្រូវ។
ទន្ទឹមនឹងនេះ ឯកឧត្តមអនុរដ្ឋលេខាធិការ បានលេីកទឹកចិត្តមន្ទីរកសិកម្មខេត្ត មន្ត្រីកសិកម្មឃុំ និងមេឃុំ ជំរុញការផ្សព្វផ្សាយឱ្យបានទូលំទូលាយ ដេីម្បីជួយប្រជាកសិករនៅស្រុកភ្នំស្រុក និងសហគមន៍រំដួលទានកាំ ក្នុងស្រុកព្រះនេត្រព្រះ ក្នុងការចងក្រងជាសហគមន៍កសិកម្មទំនេីប ដែលមានផែនការផលិតច្បាស់លាស់ ផ្គត់ផ្គង់តាមតម្រូវការនិងមានការធានាទីផ្សារ មានកិច្ចសន្យាផលិតកម្មត្រឹមត្រូវ ទទួលបានកម្ចីការប្រាក់ទាប មានការគាំទ្របច្ចេកទេសពីក្រសួងកសិកម្មផ្ទាល់ និងផ្តល់ផលចំនេញជាច្រេីនថែមទៀតដល់ប្រជាកសិករ។
ជាទីបញ្ចប់ ឯកឧត្តមអនុរដ្ឋលេខាធិការ បានបន្តបេសកកម្មចុះត្រួតពិនិត្យ និងលេីកទឹកចិត្តដល់រោងម៉ាស៊ីនកិនស្រូវ សិញ ឈីញ នៅឃុំស្រះជីក ស្រុកភ្នំស្រុក បន្តជួយអន្តរាគមន៍ទិញស្រូវពីប្រជាកសិករ ខណៈដែលរោងម៉ាសុីនផ្ទាល់ធ្លាប់បានទទួលទិញស្រូវចម្រុះកិនលក់ឱ្យប្រជាជនក្នុងស្រុក និងផ្គត់ផ្គង់អង្ករតាមកិច្ចសន្យាដល់អង្គភាពទ័ពប្រចាំខេត្តចំនួន៣ គឺខេត្តបន្ទាយមានជ័យ ឧត្តរមានជ័យ សៀមរាប ចំនួន ៦០០០តោន/ឆ្នាំ៕
