ព័ត៌មានផ្សេងៗទៀត
ឯកឧត្តមរដ្ឋលេខាធិការ ហាស់ សារ៉េត អញ្ជើញជាអធិបតីភាពក្នុងកិច្ចប្រជុំបូកសរុបលទ្ធផលការងារមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង ឆ្នាំ២០២៥ និងលើកទិសដៅអនុវត្តឆ្នាំ២០២៦
ចេញផ្សាយ ១៣ កុម្ភៈ ២០២៦ 3108
នៅថ្ងៃទី១២ ខែកុម្ភៈ ឆ្នាំ២០២៦ ឯកឧត្តម ហាស់ សារ៉េត រដ្ឋលេខាធិការ តំណាងខ្ពង់ខ្ពស់ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីភាពក្នុងកិច្ចប្រជុំបូកសរុបលទ្ធផលការងារមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង ឆ្នាំ២០២៥ និងលើកទិសដៅអនុវត្តឆ្នាំ២០២៦។
កិច្ចប្រជុំនេះមានការចូលរួមពី ឯកឧត្ដម ហែម ពិសិដ្ឋ អភិបាលរងខេត្តព្រៃវែង ឯកឧត្តម ទឹម បូរក្ស ឯកឧត្ដម ខាត់ សុធី អនុរដ្ឋលេខាធិការ លោក សុង ហុង អគ្គនាយករង នៃអគ្គនាយកដ្ឋានជលផល លោក គង់ គា ប្រធាននាយកដ្ឋានដំណាំស្រូវ លោក អ៊ុក សំណាង ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង ព្រមទាំងថ្នាក់ដឹកនាំក្រោមឱវាទក្រសួងកសិកម្ម អាជ្ញាធរមូលដ្ឋាន មន្រ្តីកសិកម្មឃុំ-សង្កាត់ និងមន្រ្តីជំនាញពាក់ព័ន្ធជាច្រើនរូបទៀត។
នាឱកាសនោះ ឯកឧត្តម ហាស់ សារ៉េត បានសម្តែងការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង បំពេញការងារប្រកបដោយស្មារតីទទួលខុសត្រូវរបស់ថ្នាក់ដឹកនាំ និងមន្រ្តីពាក់ព័ន្ធទាំងអស់ នៃមន្ទីរកសិកម្មខេត្ត សម្រេចបានលទ្ធផលល្អប្រសើរ។ បន្ថែមពីនេះ ឯកឧត្តមរដ្ឋលេខាធិការ បានណែនាំឱ្យមន្រ្តីជំនាញ និងគ្រប់អង្គភាពពាក់ព័ន្ធយកចិត្តទុកដាក់ប្រើទេពកោសល្យនៃការដឹកនាំ ដើម្បីលើកស្ទួយវិស័យកសិកម្ម ជាពិសេសផ្ដល់ការគាំទ្រផ្នែកបច្ចេកទេសលើការដាំដុះ សំដៅកាត់បន្ថយថ្លៃដើមផលិតកម្ម និងការធ្វើពិពិធកម្មរួមផ្សំជាមួយនឹងការចិញ្ចឹមសត្វបន្ថែម។
ជាចុងបញ្ចប់ឯកឧត្តមរដ្ឋលេខាធិការ បានផ្តល់អនុសាសន៍ណែនាំដល់អាជ្ញាធរមូលដ្ឋានគ្រប់លំដាប់ថ្នាក់ បន្តសហការគាំទ្របញ្ជ្រាបការយល់ដឹង ពីការអភិរក្សធនធានជលផល ដល់ប្រជានេសាទ ដើម្បីរួមគ្នា ទប់ស្កាត់ឱ្យបាននូវការប្រើប្រាស់ឧបករណ៍ល្មើសច្បាប់ផ្សេងៗ និងធានាបាននូវនិរន្តរភាពធនធានធម្មជាតិ ប្រព័ន្ធជីវចម្រុះ សម្រាប់កូនចៅជំនាន់ក្រោយ៕
