ព័ត៌មានផ្សេងៗទៀត
ឯកឧត្តមអនុរដ្ឋលេខាធិការ ប៉ែន ផល្លីកា ដឹកនាំកម្លាំងចម្រុះ ចុះត្រួតពិនិត្យ ទប់ស្កាត់ និងបង្រ្កាបបទល្មើសជលផល ក្នុងភូមិសាស្រ្តក្រុងសៀមរាប ខេត្តសៀមរាប
ចេញផ្សាយ ២៦ កញ្ញា ២០២៤ 2827
នៅថ្ងៃទី១៩ ខែកញ្ញា ឆ្នាំ២០២៤ ឯកឧត្តម ប៉ែន ផល្លីកា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានដឹកនាំកម្លាំងចម្រុះ ចុះត្រួតពិនិត្យ ទប់ស្កាត់ និងបង្រ្កាបបទល្មើសជលផល ក្នុងភូមិសាស្រ្តក្រុងសៀមរាប ខេត្តសៀមរាប។ សមាសភាពចូលរួមក្នុងប្រតិបត្តិការនេះរួមមាន លោក សោម សុវណ្ណ នាយរងអធិការដ្ឋានរដ្ឋបាលជលផលខាងជើងបឹងទន្លេសាប លោក ហៃ យុង អភិបាលរងក្រុងសៀមរាប លោក ធិននី សុទ្ធី នាយខណ្ឌរដ្ឋបាលជលផលសៀមរាប មន្រ្តីបរិស្ថានប្រចាំស្នាក់ការចុងឃ្នៀស តំណាងមន្ទីរបរិស្ថានខេត្តសៀមរាប និងកំលាំងសហគមន៍នេសាទចុងឃ្នៀស។
ដោយប្រើមធ្យោបាយកាណូតចំនួន០៤គ្រឿង កងកម្លាំងសរុបចំនួន២២នាក់ បានចុះត្រួតពិនិត្យនិងបង្រ្កាបបទល្មើស ចាប់ពីចំណុចចុងស្ទឹងអារញ្ញ ភូមិអារញ្ញ សង្កាត់សៀមរាប រហូតដល់ចំណុចទំនប់ព្រហូត និងទំនប់រាំងទេ ស្ថិតនៅក្នុងសង្កាត់ជ្រាវ ក្រុងសៀមរាប ខេត្តសៀមរាប។
ជាលទ្ធផលនៃការបង្រ្កាប បានចំនួន ២ករណី ក្នុងនោះ ករណីទី១ បានរុះរើ និងបំផ្លាញចោលនៅនឹងកន្លែងនូវឧបករណ៍នេសាទរបាំងសាច់អួនក្រឡាតូចជាង៣សង់ទីម៉ែត្រ ចំនួន១១ របាំង សាច់អួនប្រវែង១ ៦០០ម៉ែត្រ ក្បាលលបចំនួន ១១គ្រឿង បង្គោលចំរឹងចំនួន ៧០០ដើម និងករណីទី២ បានរុះរើនិងបំផ្លាញចោលឧបករណ៍នេសាទស្បៃមុងចំនួន ៦របាំង លូស្បៃមុងចំនួន ៦គ្រឿង សាច់ស្បៃមុងប្រវែង ៤០០ម៉ែត្រ ចំរឹងចំនួន ១៥០ដើម និងបានចាក់លែងកូនត្រីចម្រុះចំនួន៣០គីឡូក្រាម៕
