ព័ត៌មានផ្សេងៗទៀត
ឯកឧត្តមរដ្ឋលេខាធិការ ឃុន សាវឿន អញ្ជើញជាអធិបតីក្នុងពិធីលែងពូជត្រីចំនួន ៤០ ០០០ក្បាល នៅក្នុងស្រុកប្រាសាទបាគង ខេត្តសៀមរាប
ចេញផ្សាយ ៤ សីហា ២០២៤ 3107
នៅថ្ងៃទី០៣ ខែសីហា ឆ្នាំ ២០២៤ ឯកឧត្តម ឃុន សាវឿន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អញ្ជើញជាអធិបតីក្នុងពិធីលែងពូជត្រីសរុបចំនួន ៤០ ០០០ក្បាល ស្ថិតនៅភូមិបង្កោង ឃុំអំពិល ស្រុកប្រាសាទបាគង ខេត្តសៀមរាប។
ថ្នាក់ដឹកនាំដែលបានអញ្ជើញចូល រួមមាន ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម ឯកឧត្តម ពុំ សុថា ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល ឯកឧត្តម អ៊ឹង គឹមលាង អភិបាលរងខេត្តសៀមរាប លោកប្រធានមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប លោកនាយអធិការដ្ឋានរដ្ឋបាលជលផលខាងជើងបឹងទន្លសាប និងលោកនាយខណ្ឌរដ្ឋបាលជលផលសៀមរាប និងលោកអភិបាលរងស្រុកប្រាសាទបាគង លោកមេឃុំអំពិល ប៉ុស្តិ៍នគរបាលរដ្ឋបាលឃុំអំពិល ប្រជាការពារសហគមន៍នេសាទ លោកគ្រូ អ្នកគ្រូ និងសិស្សានុសិស្សសរុបចំនួន ២០០នាក់។
ដោយពិនិត្យឃើញប្រជាពលរដ្ឋក្នុងភូមិឃុំ រួមគ្នាការពារធនធានជលផលបានល្អ រដ្ឋបាលជលផល នៃក្រសួងកសិកម្ម រុក្ខាប្រមាញ់ និងនេសាទ បានយកត្រីមេពូជនិងកូនត្រីទៅលែងចូលក្នុងបឹងនោះបន្ថែម ដើម្បីឱ្យត្រីកាន់តែសំបូរសម្រាប់ប្រជាពលរដ្ឋចាប់ត្រីបានដោយក្តីសប្បាយរីករាយ ពេលប្រារព្ធពិធីចាប់ត្រីសាមគ្គីនៅឆ្នាំក្រោយៗទៀត។ នាឱកាសនេះ អង្គពិធីបានធ្វើការប្រលែងត្រីសរុបចំនួន៤០ ០០០ក្បាល រួមមាន៖ កូនត្រីប្រាចំនួន១៥ ០០០កូន កូនត្រីឆ្ពិនចំនួន ១២ ០០០កូន កូនត្រីអណ្តែងទន់ចំនួន ៨ ០០០កូន ត្រីក្រាញ់ និងត្រីព្រួលចំនួន ៥ ០០០ក្បាល ត្រូវបានលែងចូលទៅក្នុងបឹងបង្កោង។
បន្ទាប់ពីលែងពូជត្រីរួច ឯកឧត្តមគណធិបតី និងអ្នកចូលរួមទាំងអស់ បានដុតបំផ្លាញឧបករណ៍ឆក់ត្រី (អាំងវែកទ័រឆក់ត្រី) សរុប ២៩៥គ្រឿង នៅចំណុចបឹងបង្កោង។
គួរបញ្ជាក់ថា បឹងបង្កោងមានទទឹង ១៥០ម៉ែត្រ និងបណ្ដោយ ៣០០ម៉ែត្រ។ ជារៀងរាល់ឆ្នាំនៅថ្ងៃទី១២ ខែកុម្ភៈត្រូវនឹងថ្ងៃ៣កើត ខែមាឃ សហគមន៍នៅក្នុងតំបន់តែងរៀបចំពិធីចាប់ត្រីសាមគ្គីក្នុងបឹងបង្កោង។ ពិធីបុណ្យចាប់ត្រីក្នុងបឹងនេះគឺជាទំនៀមដែលធ្វើតាំងពីបុរាណកាលមកម៉្លេះ៕
