ព័ត៌មានផ្សេងៗទៀត
ឯកឧត្តមបណ្ឌិតរដ្ឋលេខាធិការ យ៉ង សាំង កុមារ អញ្ជើញដឹកនាំមន្ត្រីកសិកម្មឃុំ-សង្កាត់ មកពី៤ស្រុកនៃខេត្តព្រៃវែង ទស្សនកិច្ចរោងម៉ាស៊ីនកិនស្រូវ និងស្វែងយល់ពីគុណភាពស្រូវ និងខ្សែច្រវាក់កែច្នៃអង្ករ
ចេញផ្សាយ ២៦ វិច្ឆិកា ២០២៥ 2001
នៅថ្ងៃទី២៥ ខែវិច្ឆិកា ឆ្នាំ២០២៥ ឯកឧត្តមបណ្ឌិត យ៉ង សាំង កុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ រួមដំណើរដោយឯកឧត្តម ខាត់ សុធី អនុរដ្ឋលេខាធិការ បានដឹកនាំមន្ត្រីកសិកម្មឃុំ-សង្កាត់ មកពី៤ស្រុក ប្រមាណ៣០នាក់ក្នុងខេត្តព្រៃវែង ទស្សនកិច្ចរោងម៉ាស៊ីនកិនស្រូវ ឈិត ប៊ុនថន និងស្វែងយល់ពីខ្សែច្រវាក់កែច្នៃអង្ករ និងការពិនិត្យលើគុណភាពស្រូវ ដើម្បីផលិតអង្ករមានស្តង់ដា និងគុណភាព។
ឯកឧត្តមបណ្ឌិត យ៉ង សាំង កុមារ បានគូសបញ្ជាក់ថា គុណភាពអង្ករល្អ គឺពឹងផ្អែកទាំងស្រុងលើគុណភាពស្រូវ។ ជាមួយគ្នានោះ ឯកឧត្តមក៏មើលឃើញថា ការផលិតស្រូវរបស់កសិករ នៅមិនទាន់ឆ្លើយតបតាមស្តង់ដា និងគុណភាពបាននៅឡើយទេ ដែលទាំងនេះគឺជាកិច្ចការស្នូលរបស់មន្ត្រីកសិកម្មឃុំ-សង្កាត់ ត្រូវធ្វើការឱ្យបានជិតស្និទ្ធជាមួយកសិករតាមរយៈការអនុវត្តយន្តការគោលការណ៍ពូជសុទ្ធនិង គោលការណ៍ស្រែល្អ។
នាដំណើរទស្សនកិច្ចសិក្សានោះ មន្ត្រីកសិកម្មឃុំ-សង្កាត់ បានស្វែងយល់បន្ថែមពីខ្សែច្រវាក់កែច្នៃស្រូវអង្ករ ដែលចាប់ផ្តើមពីការពិនិត្យគុណភាពស្រូវ និងបានពិភាក្សាលើការសហការកសាងភាពជាដៃគូរវាងរោងម៉ាស៊ីន និងសហគមន៍កសិករផងដែរ៕
