ព័ត៌មានផ្សេងៗទៀត
ឯកឧត្តមរដ្ឋលេខាធិការ ប្រាក់ ដាវីដ អញ្ជើញជួបសំណេះសំណាល និងតម្រង់ទិសដល់កម្មករត្រៀមប្រឡងចៀរជ័រកៅស៊ូប្រចាំឆ្នាំ២០២៥
ចេញផ្សាយ ៨ ធ្នូ ២០២៥ 2305
នៅថ្ងៃទី៨ ខែធ្នូ ឆ្នាំ២០២៥ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្តមរដ្ឋមន្ត្រី ឌិត ទីណា បានអញ្ជើញជួបសំណេះសំណាល និងតម្រង់ទិសដល់កម្មករ ដែលត្រៀមប្រឡងចៀរជ័រកៅស៊ូប្រចាំឆ្នាំ២០២៥ នៅចំការកៅស៊ូមេមត់ ខូអិលធីឌី ខេត្តត្បូងឃ្មុំ ដែលប្រព្រឹត្តទៅនៅព្រឹកថ្ងៃទី៩ ខែធ្នូ ឆ្នាំ២០២៥។
នាឱកាសនេះ ឯកឧត្តមរដ្ឋលេខាធិការ បានណែនាំទៅកម្មករចៀរជ័រកៅស៊ូទាំងអស់ចំនួនសរុប៨៣នាក់ តំណាងឱ្យចំនួន៤៣ក្រុមហ៊ុន ឱ្យបានយល់ដឹងបន្ថែមពីលក្ខខណ្ឌនៃការចៀរជ័រ លក្ខខណ្ឌប្រកួត និងចាប់ឆ្នោតយកជួរ ដើម្បីត្រៀមប្រឡងនៅព្រឹកស្អែកថ្ងៃទី៩ ខែធ្នូ ឆ្នាំ២០២៥។
ជាមួយគ្នានេះ ឯកឧត្តមរដ្ឋលេខាធិការ មានប្រសាសន៍ថា នេះជាលើកទី២ហើយ ដែលក្រសួងកសិកម្ម រុក្ខាប្រមាញ់ និងនេសាទ បានសហការជាមួយក្រុមហ៊ុនកៅស៊ូ រៀបចំកម្មវិធីប្រឡងប្រជែងចៀរជ័រ ដើម្បីស្វែងរកអ្នកខ្លាំងក្នុងចំណោមអ្នកខ្លាំង និងផ្តល់ជារង្វាន់លើកទឹកចិត្ត សម្រាប់ឆ្នាំ២០២៥នេះ។ ការចៀរជ័រកៅស៊ូ មានសារសំខាន់ ពីព្រោះ មុននឹងឈានដល់ការកែច្នៃជាកង់ឡាន និងចេញចៀរជ័រប្រើប្រាស់ គឺកើតចេញពីកម្មករចៀរជ័រ បើសិនជាអ្នកចៀរជ័រពូកែនឹងធ្វើឱ្យទទួលបានទិន្នផលខ្ពស់ ហើយធានាបានសុខភាពដើមកៅស៊ូនៅល្អ ប៉ុន្តែបើចៀរទៅមិនបានល្អ នឹងធ្វើឱ្យដើមកៅស៊ូអាចមានជំងឺ ធ្វើឱ្យដើមលែងឱ្យជ័រ និងធ្វើឱ្យខាតបង់ច្រើនទៅវិញ។
ទន្ទឹមនឹងនេះ ឯកឧត្តមរដ្ឋលេខាធិការ បានគូសបញ្ជាក់ថា កម្មករដែលចូលរួមប្រឡងចៀរជ័រកៅស៊ូនៅថ្ងៃស្អែកនេះ ជាអ្នកដែលមានបទពិសោធន៍ និងមានជំនាញច្បាស់លាស់ ហើយអាចជាអ្នកអូសទាញអ្នកដែលនៅវិស័យក្រៅពីនេះ មានការចាប់អារម្មណ៍ចូលរួមធ្វើការងារចៀរជ័រកៅស៊ូ ពីព្រោះការងារនេះ ផ្តល់អត្ថប្រយោជន៍ច្រើនដល់កម្មករក្នុងការរកចំណូលបានប្រចាំខែ ប្រចាំឆ្នាំជាប់ជានិច្ច ហើយមានសារសំខាន់យ៉ាងខ្លាំង ព្រោះជាការងារដើមខ្សែនៃខ្សែច្រវាក់តម្លៃទាំងមូល៕
