ឯកឧត្តម គឹម សុន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ អញ្ជើញពិនិត្យ និងវាយតម្លៃបញ្ចប់សុពលភាពការងារសាងសង់ ហេដ្ឋារចនាសម្ព័ន្ធស្រោចស្រព តាមបណ្តាសហគមន៍កសិកម្មចំនួន៧កន្លែង

ចេញ​ផ្សាយ​ ២៥ មករា ២០២៤ 1726

នៅថ្ងៃទី២៤ ខែមករា ឆ្នាំ២០២៤ ឯកឧត្តម គឹម សុន រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានអញ្ជើញទៅពិនិត្យ និងវាយតម្លៃ បញ្ចប់សុពលភាពការងារសាងសង់ហេដ្ឋារចនាសម្ព័ន្ធស្រោចស្រពតាមបណ្តាសហគមន៍កសិកម្មចំនួន ៧កន្លែង នៅក្នុងខេត្តគោលដៅចំនួន៤ រួមមាន ខេត្តកណ្តាល ខេត្តត្បូងឃ្មុំ ខេត្តកំពង់ធំ និងខេត្តសៀមរាប។

ការចុះត្រួតពិនិត្យនេះ គឺដើម្បីប្រគល់និងទទួលការងារលទ្ធកម្មនៃការសាងសង់ហេដ្ឋារចនាសម្ព័នស្រោចស្រពបន្លែ ដែលបានធ្វើចប់សព្វគ្រប់ ក្រោយពេលទទួលបានគម្រោងថវិកា យកទៅសាងសង់ ក្នុងឆ្នាំ២០២២។

អត្ថប្រយោជន៍ចម្បងៗនៃហេដ្ឋារចនាសម្ព័ន្ធស្រោចស្រពដំណាំបន្លែ មានដូចជា៖

១. ផ្គត់ផ្គង់ទឹកសម្រាប់ស្រោចស្រពដំណាំបន្លែបានពេញមួយឆ្នាំ ចំណេញពេលវេលា និងកម្លាំងពលកម្មក្នុងការស្រោចស្រពបន្លែ ធ្វើឱ្យកសិករមានពេលវេលាច្រើនសម្រាប់ប្រកបមុខរបរផ្សេងៗទៀត។

២. បង្កើនការដាំដុះដំណាំបន្លែពី ៤ ទៅ ៧ដង ក្នុងមួយឆ្នាំនៅតាមសហគមន៍កសិកកម្មដែលមានសក្តានុពលនិងសមត្ថភាពគ្រប់គ្រាន់ ដែលអាចផ្គត់ផ្គង់បន្លែសុវត្ថិភាពស្របតាមតម្រូវការទីផ្សារក្នុងស្រុក ជំនួសការនាំចូលបន្លែជាបណ្តើរៗ និងឈានទៅរកការនាំចេញនៅពេលខាងមុខ។

៣. បង្កើនប្រាក់ចំណូលរបស់កសិករកាន់តែច្រើន តាមរយៈការកាត់បន្ថយការចំណាយថវិកាលើការបូមទឹកដោយម៉ាស៊ីនសាំងឬម៉ាស៊ូត ការចំណាយពេលវេលាននិងកម្លាំងពលកម្មក្នុងផលិតកម្មដំណាំបន្លែ។

៤. បង្កើនផ្ទៃដីដាំដុះនិងបរិមាណផល ជាពិសេសនៅរដូវប្រាំង តាមរយៈការពង្រីកសមាជិកសហគមន៍ រួមទាំងពលករចំណាកស្រុកដែលវិលត្រឡប់មកវិញ។

៥. ងាយស្រួលប្រើប្រាស់ ដែលស្ត្រីនិងកុមារក៏អាចស្រោចស្រពបន្លែបាន និងអាចសន្សំសំចៃទឹកបានច្រើន។

៦. ចងក្រងក្រុមអ្នកផលិតបន្លែសុវត្ថិភាពជាប្រព័ន្ធនិងរៀបចំកិច្ចសន្យាផលិតកម្មសម្រាប់រៀបចំផែនការផលិតកម្ម ដើម្បីផ្គត់ផ្គង់តាមតម្រូវទីផ្សារឱ្យបានទៀងទាត់។

ក្រៅពីតំណាងក្រសួងកសិកម្ម រុក្ខាប្រមាញ់និងនេសាទ និងអគ្គនាយកដ្ឋានកសិកម្ម បេសកកម្មនេះក៏មានការចូលរួមផងដែរពីតំណាងក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានលទ្ធកម្មសាធារណៈ អគ្គនាយកដ្ឋានវិនិយោគ នាយកដ្ឋានគណនេយ្យហិរញ្ញវត្ថុ និងអង្គភាពលទ្ធកម្ម៕