ឯកឧត្ដមអនុរដ្ឋលេខាធិការ ប៉ែន ផល្លីកា អញ្ជើញពិនិត្យការប្រើឧបករណ៍នេសាទ នារដូវបើកនេសាទ នៅបឹងទន្លេសាប ក្នុងភូមិសាស្រ្តស្រុកបាកាន និងស្រុកកណ្តៀង ខេត្តពោធិ៍សាត់

ចេញ​ផ្សាយ​ ៣០ មករា ២០២៦ 1116

ថ្ងៃទី៣០ ខែមករា ឆ្នាំ២០២៦ ឯកឧត្តម ប៉ែន ផល្លីកា អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ តំណាងដ៏ខ្ពង់ខ្ពស់ឯកឧត្ដមរដ្ឋមន្រ្តី ឌិត ទីណា បានអញ្ជើញដឹកនាំក្រុមការងារជំនាញចុះបំពេញបេសកកម្មអង្កេត និងត្រួតពិនិត្យការធ្វើនេសាទជាលក្ខណៈគ្រួសារ នៅបឹងទន្លេសាប ក្នុងភូមិសាស្រ្តស្រុកបាកាន និងស្រុកកណ្តៀង ខេត្តពោធិ៍សាត់។
ប្រតិបត្តិការនេះ មានការអមដំណើរដោយ លោក ហៃ ធូរ៉ា ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តពោធិ៍សាត់ លោកនាយខណ្ឌរដ្ឋបាលជលផលពោធិ៍សាត់ ផ្នែករាំងទិល-សង្កាត់បាកាន ក្រុមការងារគណៈបញ្ជាការឯកភាពរដ្ឋបាលស្រុកបាកាន រួមមាន លោក អ៉ុំ សុខណា អភិបាលរងស្រុក ក្រុមប្រឹក្សាឃុំមេទឹក និងប៉ុស្តិ៍នគរបាលរដ្ឋបាលមេទឹក តំបន់ប្រតិបត្តិសឹករងខេត្ត និងកងរាជអាវុធហត្ថខេត្ត។
នាឱកាសនោះ ឯកឧត្តម ប៉ែន ផល្លីកា ក៏បានជួបសំណេះសំណាល និងសួរសុខទុក្ខកងកម្លាំងនៃយោធភូមិភាគ៥ និងកងពល៥១ ដឹកនាំដោយលោក ធា សោភ័ណ្ឌ ប្រចាំទិសព្រែកខ្ញែង និងព្រែកទឹកពុះ ស្ថិតនៅឃុំមេទឹក ស្រុកបាកាន ខេត្តពោធិ៍សាត់ ផងដែរ។ 
ឯកឧត្តមអនុរដ្ឋលេខាធិការ បានថ្លែងអំណរអរគុណដល់កងកម្លាំងយោធាដែលសហការបានល្អជាមួយមន្រ្តីជំនាញក្នុងការងារទប់ស្កាត់ និងបង្រ្កាបបទល្មើសជលផលដោយទទួលបានលទ្ធផលល្អ ដែលធ្វើឱ្យធនធានជលផលកើនឡើងគួរជាទីមោទនៈ។ ក្នុងនោះ ឯកឧត្តមបានសំំណូមពរដល់ក្រុមការងារចម្រុះ សូមចូលរួមសហការបង្រ្កាបឧបករណ៍នេសាទហាមឃាត់មួយចំនួនទៀត រួមមានឈ្នក់រួមផ្សំអំពូលភ្លើង បាចចំណីដែលជាមធ្យោយធ្វើឱ្យត្រីកុំ, មងបីជាន់ ឆក់ និងឈិបយន្ត ព្រោះឧបករណ៍ទាំងនេះធ្វើឱ្យប៉ះពាល់ធ្ងន់ធ្ងរដល់ធនធានជលផល។
ក្នុងកិច្ចសំណេះសំណាល ឯកឧត្តមអនុរដ្ឋលេខាធិការ ក៏បានធ្វើការណែនាំដល់អ្នកពាក់ព័ន្ធឱ្យពង្រឹងកិច្ចសហការការពារបន្ថែមនូវកន្លែងអភិរក្សជលផល ព្រោះជាកន្លែងសម្រាប់រក្សាត្រីមេពូជ។
នៅទីបញ្ចប់ ឯកឧត្តមបានដឹកនាំក្រុមការងារចុះពិនិត្យក្នុងកន្លែងអភិរក្សជលផលលេខ២  នៅចំណុចព្រែកតាឡែន និងព្រែកសន្លុង ដោយពុំបានជួបប្រទះនូវបទល្មើសអ្វីគួរឱ្យកត់សម្គាល់ឡើយ៕