ព័ត៌មានផ្សេងៗទៀត
ឯកឧត្តមរដ្ឋលេខាធិការ ឃុន សាវឿន អញ្ជើញជាអធិបតី ក្នុងសិក្ខាសាលាបូកសរុបការងារកសិកម្ម រុក្ខាប្រមាញ់ និងនេសាទ ខេត្តសៀមរាប ឆ្នាំ២០២៤ និងលើកទិសដៅការងារឆ្នាំ២០២៥
ចេញផ្សាយ ០៤ មករា ២០២៥ 207
នៅថ្ងៃទី0៣ ខែមករា ឆ្នាំ២០២៥ ឯកឧត្តម ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ អញ្ជើញជាអធិបតីក្នុងសិក្ខាសាលាបូកសរុបការងារកសិកម្ម រុក្ខាប្រមាញ់ និងនេសាទខេត្តសៀមរាប ឆ្នាំ២០២៤ និងលើកទិសដៅការងារឆ្នាំ២០២៥ ។ ពិធីនេះក៏មានការអញ្ជើញចូលរួមពី ឯកឧត្តម ម៉ក់ សំភា សមាជិកក្រុមប្រឹក្សាខេត្ត និងលោក អ៊ឹង គឹមលាង អភិបាលរង នៃគណៈអភិបាលខេត្តសៀមរាប ព្រមទាំងលោក លោកស្រី តំណាងថ្នាក់ដឹកនាំ មន្ទីរ/អង្គភាពជុំវិញខេត្ត កងកម្លាំងប្រដាប់អាវុធ អាជ្ញាធរមូលដ្ឋាន មន្ត្រីកសិកម្មឃុំ-សង្កាត់ សរុបប្រមាណជា៣០០នាក់។
ថ្លែងទៅកាន់អង្គពិធី ឯកឧត្តម ឃុន សាវឿន បានបង្ហាញក្តីសោមនស្សរីករាយក្នុងការចូលរួមពិធីដ៏មានសារៈសំខាន់នេះ ដើម្បីរិះរកចំណុចខ្លាំង បញ្ហាប្រឈមនានា និងចែករំលែកបទពិសោធន៍ក៏ដូចជាឱកាស ដើម្បីដាក់វិធានការដោះស្រាយ និងកំណត់សកម្មភាពជាឤទិភាពសំដៅប្រសិទ្ធភាព និងប្រសិទ្ធផលការងារ ឈានឆ្ពោះទៅរកការអភិវឌ្ឍវិស័យកសិកម្មក្នុងខេត្តសៀមរាប ឱ្យកាន់តែរីកចម្រើនថែមទៀត ស្របតាមយុទ្ធសាស្ត្រ បញ្ចកោណដំណាក់កាលទី១ របស់រាជរដ្ឋាភិបាល និងគោលនយោបាយរបស់ក្រសួងកសិកម្ម រុក្ខាប្រមាញ់ និងនេសាទ ។
ឯកឧត្តមរដ្ឋលេខាធិការ បានកោតសរសើរ និងវាយតម្លៃខ្ពស់ ចំពោះសមិទ្ធផលការងារ ដែលថ្នាក់ដឹកនាំ និងមន្ត្រីរាជការនៃមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប ខិតខំប្រឹងប្រែងបំពេញ លះបង់កំលាំងកាយ កំលាំងចិត្តប្រកបដោយស្មារតីទទួលខុសត្រូវខ្ពស់ និងសម្រេចបានលទ្ធផលការងារឆ្នាំ២០២៤ តាមផែនការដែលបានគ្រោងទុក។ តែទោះជាយ៉ាងណា វិស័យនេះក៏នៅជួបបញ្ហាមួយ ចំនួនដូចជា៖ ការប្រែប្រួលអាកាសធាតុ គ្រោះរាំងស្ងួត ទឹកជំនន់ បញ្ហាបច្ចេកទេស និងស្ថិរភាពតម្លៃលើទីផ្សារផងដែរ។ ប៉ុន្តែឯកឧត្តមបានគូសបញ្ជាក់ថា ដើម្បីឆ្លើយតប និងដោះស្រាយបញ្ហាប្រឈមមួយចំនួនខាងលើ ជាពិសេសក្នុងការលើកកម្ពស់ ការអភិវឌ្ឍវិស័យកម្មឱ្យកាន់តែមានភាពប្រកួតប្រជែង និងនិរន្តរភាព រាជរដ្ឋាភិបាលកម្ពុជា ដែលមានក្រសួងកសិកម្ម រុក្ខាប្រមាញ់ និងនេសាទជាសេនាធិការ បានដាក់ចេញនូវគោលនយោបាយអាទិភាពទី៥ និងទី៦។
ជាទីបញ្ចប់ ឯកឧត្តម បានផ្តល់អនុសាសន៍ និងតម្រង់ទិសឱ្យមន្ទីរកសិកម្ម រុក្ខាប្រមាញ់ និងនេសាទខេត្តសៀមរាប បន្តផ្សព្វផ្សាយបច្ចេកទេសកសិកម្មទំនើប ដែលធន់នឹងអាកាសធាតុជូនប្រជាពលរដ្ឋនៅតាមជនបទ និងដោះស្រាយបញ្ហាប្រឈមនានាជូនកសិករ ឱ្យបានទាន់ពេលវេលា ដោយរៀបចំផែនការសកម្មភាព និងសូចនាករឱ្យបានច្បាស់លាស់ និងគ្រប់ជ្រុងជ្រោយ ។ ក្នុងឱកាសនោះផងដែរ ឯកឧត្តមបានផ្តល់កិត្តិយសបំពាក់គ្រឿងឥស្សរិយយស និងមេដាយការងារជូនមន្ត្រីរាជការ ដែលមានស្នាដៃល្អខិតខំបំពេញការងារ នាពេលកន្លងមកដើម្បីជាការលើកទឹកចិត្ត៕
