ឯកឧត្តមរដ្ឋលេខាធិការ​ អុឹម​ សុីថុល​​ តំណាងដ៏ខ្ពង់ខ្ពស់ឯកឧត្តមរដ្ឋមន្រ្តី​ ឌិត​ ទីណា​ អញ្ជេីញជាអធិបតីក្នុងពិធីបេីកកិច្ចប្រជុំបូកសរុបលទ្ធផលការងារអនុវិស័យដំណាំប្រចាំឆ្នាំ២០២៤​ និងទិសដៅអនុវត្តឆ្នាំ២០២៥

ចេញ​ផ្សាយ​ ២៥ ធ្នូ ២០២៤ 2661

នៅព្រឹកថ្ងៃទី២៥ ខែធ្នូ​ ឆ្នាំ២០២៤​ ឯកឧត្តម​ អុឹម​ សុីថុល​ រដ្ឋលេខាធិការប្រចាំការក្រសួងកសិកម្ម​ រុក្ខាប្រមាញ់​ និងនេសាទ​ និងជាតំណាងដ៏ខ្ពង់ខ្ពស់ឯកឧត្តមរដ្ឋមន្រ្តី​ ឌិត​ ទីណា​ បានអញ្ជេីញជាអធិបតីក្នុងពិធីបេីកកិច្ចប្រជុំបូកសរុបលទ្ធផលការងារអនុវិស័យដំណាំប្រចាំឆ្នាំ២០២៤​ និងទិសដៅអនុវត្តឆ្នាំ២០២៥ ដែលមានអ្នកចូលរួមប្រមាណ ២៥០នាក់ នៅអគ្គនាយកដ្ឋានកសិកម្ម។

ជាកិច្ចចាប់ផ្តើម ឯកឧត្តមបណ្ឌិត ងិន ឆាយ

ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋានកសិកម្ម បានរាយការណ៍នូវសមិទ្ធផលនានាដែលអគ្គនាយកដ្ឋានកសិកម្មសម្រេចបាន ដូចជា ការបង្កើនផលិតភាពដំណាំសក្តានុពលនិងជំរុញការនាំចេញ សិក្សាវាយតម្លៃប្រភេទពូជដំណាំនិងបច្ចេកទេសផលិតកម្មដំណាំ និងការពង្រឹងសេវាកម្មគាំទ្រនិងសមត្ថភាពអង្គភាព។

ដោយឡែក ចំពោះកិច្ចប្រជុំដែលនឹងចាប់ផ្ដើមនាថ្ងៃនេះ ថ្នាក់ដឹកនាំនិងមន្ដ្រីនៃអគ្គនាយកដ្ឋានកសិកម្ម នឹងពិភាក្សារួមគ្នា ក្នុងគោលដៅពង្រឹងប្រសិទ្ធភាពខ្សែចង្វាក់ផលិតកម្មកសិកម្ម ប្រកបដោយនិរន្តរភាព ភាពធន់និងបរិយាបន្ន សំដៅធានាសន្តិសុខស្បៀង លើកកម្ពស់ជីវភាពប្រជាពលរដ្ឋ និងទ្រទ្រង់កំណើនសេដ្ឋកិច្ចជាតិ ក្នុងទស្សនទាន “មានហូប មានប្រើ មានបាន និងមានរហូត”។

បន្ទាប់ពីបានស្ដាប់របាយការណ៍ចប់សព្វគ្រប់ ឯកឧត្តមរដ្ឋលេខាធិការប្រចាំការ អ៊ឹម​ ស៊ីថុល​ បានសម្ដែងការកោតសរសើរ និងវាយតម្លៃខ្ពស់ដល់ថ្នាក់ដឹកនាំ និងមន្រ្តីរាជការគ្រប់លំដាប់ថ្នាក់នៃអគ្គនាយកដ្ឋានកសិកម្ម ដែលបានខិតខំបំពេញតួនាទីភារកិច្ចរបស់ខ្លួនប្រកបដោយស្មារតីទទួលខុសត្រូវខ្ពស់ និងសម្រេចបានលទ្ធផលការងារជាច្រើនគួរជាទីមោទនៈក្នុងឆ្នាំ២០២៤នេះ ជាពិសេសការឆ្លើយតបនិងអន្តរាគមន៍ទាន់ពេលវេលាធ្វើឱ្យអនុវិស័យដំណាំនៅតែរក្សាបាននូវកំណើនបរិមាណផល និងតម្លៃសេដ្ឋកិច្ច ព្រមទាំងរក្សាបាននូវស្ថិរភាពថ្លៃកសិផល។

ឯកឧត្តមរដ្ឋលេខាធិការ បានផ្តល់អនុសាសន៍ណែនាំដល់អង្គពិធីត្រូវចូលរួមពិភាក្សាដោយផ្តោតលើលទ្ធផលការងារដែលសម្រេចបានក្នុងឆ្នាំ២០២៤ ធៀបនឹងកិច្ចព្រមព្រៀងសមិទ្ធកម្មដែលអគ្គនាយកដ្ឋានកសិកម្មបានចុះជាមួយក្រសួង ជំរុញការអភិវឌ្ឍសហគមន៍កសិកម្មទំនើប លើកកម្ពស់ផលិតភាព និងគុណភាពដំណាំ ពង្រឹងខ្សែច្រវាក់ផលិតកម្មដំណាំ ពង្រឹងការគ្រប់គ្រងធាតុចូលកសិកម្ម ពង្រឹងការគ្រប់គ្រងធនធានដីកសិកម្ម ជំរុញការអភិវឌ្ឍបច្ចេកទេសដាំដុះ និងគាំទ្របច្ចេកទេសដល់កសិករ សហគមន៍កសិកម្ម និងមន្ត្រីកសិកម្មឃុំ។

លើសពីនេះ ឯកឧត្តមរដ្ឋលេខាធិការ បានលើកទឹកចិត្តដល់អង្គពិធីត្រូវយកចិត្តទុកដាក់ការផ្តល់វិញ្ញាបនបត្រការអនុវត្តកសិកម្មល្អ ភូតគាមអនាម័យ និងការផ្តល់សេវាសាធារណៈឱ្យបានល្អប្រសើរ និងពង្រឹងការអនុវត្តច្បាប់និងលិខិតបទដ្ឋានគតិយុត្តនានាដែលពាក់ព័ន្ធ ស្របទៅនឹងស្ថានភាពបច្ចុប្បន្ន។ បើតាមឯកឧត្តមរដ្ឋលេខាធិការ ការពិភាក្សា ផ្លាស់ប្តូរយោបល់ និងផ្តល់ធាតុចូលសំខាន់ៗក្នុងកិច្ចប្រជុំនេះ ចាំបាច់ណាស់ក្នុងការរួមចំណែកកែលម្អចំណុចខ្វះចន្លោះ និងពង្រឹងការអនុវត្តឱ្យកាន់តែមុតស្រួច ចំទិសដៅ និងឆ្លើយតបនឹងតម្រូវការជាក់ស្ដែង ព្រមទាំងគោលនយោបាយអាទិភាពទី៥និងទី៦ របស់រាជរដ្ឋាភិបាល និងផែនការយុទ្ធសាស្រ្តអភិវឌ្ឍកសិកម្មឆ្នាំ២០២៤-២០២៨៕