ឯកឧត្តមរដ្ឋលេខាធិការ អ៊ួង កុសល អញ្ជើញពិនិត្យការដាំកាហ្វេ នៅចម្ការកាហ្វេ ភីដា ក្នុងខេត្តមណ្ឌលគិរី

ចេញ​ផ្សាយ​ ២៣ មករា ២០២៦ 1755

នៅថ្ងៃទី២៣ ខែមករា ឆ្នាំ២០២៦ ឯកឧត្តម អ៊ួង កុសល រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញពិនិត្យដំណាំកាហ្វេ នៅចម្ការកាហ្វេ ភីដា ដែលមានផ្ទៃដីដាំដុះទំហំ ២៤ហិកតា ស្ថិតនៅភូមិឡៅការ សង្កាត់សុខដុម ក្រុងសែនមនោរម្យ ខេត្តមណ្ឌលគិរី ដោយដំណាំកាហ្វេពូជ Arabica មានចំនួន ៩ហិកតា។ 
ដំណើរនេះ មានការចូលរួមអមដោយ លោកបណ្ឌិត សុង ឃាង ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តមណ្ឌលគិរី និងសហការី ព្រមទាំងមន្ត្រីកសិកម្មឃុំ-សង្កាត់ពាក់ព័ន្ធ។ 
នាឱកាសនោះដែរ ឯកឧត្ដមរដ្ឋលេខាធិការក៏បានផ្តាំផ្ញើតាមរយៈលោកប្រធានមន្ទីរ ឱ្យកសិករ ម្ចាស់ចម្ការ និងក្រមហ៊ុន បង្កើនការដាំដុះដំណាំកាហ្វេបន្ថែមទៀត ខណៈបច្ចុប្បន្ន ខេត្តមណ្ឌលគិរី មានទិន្នផលកាហ្វេសរុបចំនួនប្រមាណ ១ ០០០តោន ដែលស្មើនឹងត្រឹម ១០% នៃតម្រូវការទីផ្សារកាហ្វេក្នុងប្រទេស៕