ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម អញ្ជើញចូលរួមកិច្ចប្រជុំពិគ្រោះយោបល់ថ្នាក់ឧត្តមមន្ត្រីកម្ពុជា-អូស្ត្រាលី លើកទី៤ នៅរាជធានីភ្នំពេញ

ចេញ​ផ្សាយ​ ៤ មេសា ២០២៤ 3239

នៅព្រឹកថ្ងៃទី០៤ ខែមេសា ឆ្នាំ២០២៤ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងសហការី បានអញ្ជើញចូលរួមកិច្ចប្រជុំពិគ្រោះយោបល់ថ្នាក់ឧត្តមមន្ត្រីកម្ពុជា-អូស្ត្រាលី លើកទី៤ នៅរាជធានីភ្នំពេញ។

កិច្ចប្រជុំនេះប្រព្រឹត្តទៅក្រោមការដឹកនាំដោយឯកឧត្តម ប្រាក់ ងួនហេង រដ្ឋលេខាធិការក្រសួងការបរទេស និងសហប្រតិបត្តិការអន្តរជាតិ ជាសហប្រធាន និងលោកជំទាវ Michelle Chan អគ្គលេខាធិការរងក្រសួងការបរទេស និងពាណិជ្ជកម្ម នៃប្រទេសអូស្ត្រាលី ជាសហប្រធាន និងមានការចូលរួមពីថ្នាក់ដឹកនាំក្រសួងស្ថាប័ន នៃប្រទេសកម្ពុជា និងអូស្ត្រាលី។

នៅក្នុងអង្គប្រជុំនេះ ឯកឧត្តម ប្រាក់ ដាវីដ បានរាយការណ៍ពីវឌ្ឍនភាពនៃកិច្ចសហប្រតិបត្តិការរវាងប្រទេសទាំងពីរនាពេលកន្លងមក សម្រាប់វិស័យកសិកម្ម។ បន្ថែមពីនេះ ឯកឧត្តម បានលើកឡើងពីកិច្ចសហការដែលភាគីអូស្រ្តាលីបានគាំទ្រដល់គម្រោង CAVAC ដំណាក់កាលទី១ ចាប់ពីឆ្នាំ២០១០-២០១៥ និងដំណាក់កាលទី២ ចាប់ពីឆ្នាំ២០១៦-២០២២។

ចំណែក ភាគីអូស្ត្រាលីក៏បានគាំទ្រដល់ការអភិវឌ្ឍពូជស្រូវចំប៉ីសរ៧០។ សម្រាប់គម្រោង CAPRED ភាគីអូស្ត្រាលីនឹងគាំទ្រដល់ការរៀបចំសហគមន៍កសិកម្មបែបទំនើប និងការផ្តល់ចំណេះដឹងផ្នែកភាសាអង់គ្លេសជូននិស្សិតនៃសកលវិទ្យាល័យក្រោមឱវាទក្រសួងកសិកម្ម រុក្ខាប្រមាញ់ និងនេសាទទៀតផង។

ឯកឧត្តម ក៏បានថ្លែងអំណរគុណដល់ភាគីអូស្ត្រាលី ដែលកន្លងមកបានផ្តល់អាហារូបករណ៍ជូនមន្ត្រីរាជការ ដើម្បីបន្តការសិក្សាថា្នក់អនុបណ្ឌិត និងថ្នាក់បណ្ឌិតលើការងារកសិកម្ម នៅប្រទេសអូស្ត្រាលី  ព្រមទាំងបានលើកទឹកចិត្តឲ្យបន្ត និងពិនិត្យលទ្ធភាពបង្កើនឱកាសសិក្សាបន្ថែមទៀត។  ឯកឧត្ដម ក៏បានជម្រាបថា ក្រសួង  និងក្រុមការងាររបស់អូស្ត្រាលីបាននិងកំពុងពិភាក្សាគ្នាលើគម្រោងកិច្ចសហប្រតិបត្តិការបន្ថែមទៀត៕