សិក្ខាសាលា​ស្ដីពី “ការអភិវឌ្ឍកសិ-ឧស្សាហកម្មប្រកបដោយនិរន្តរភាព និងសុវត្ថិភាព”

ចេញ​ផ្សាយ​ ១២ ធ្នូ ២០១៩ 18258

​ថ្ងៃសុក្រ ១០កើត ខែមិគសិរ ឆ្នាំកុរ ឯកស័ក ព.ស. ២៥៦៣ ត្រូវនឹងថ្ងៃទី០៦​ ខែធ្នូ ឆ្នាំ២០១៩ នាយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ បានរៀបចំសិក្ខាសាលា​ស្ដីពី “ការអភិវឌ្ឍកសិ-ឧស្សាហកម្មប្រកបដោយនិរន្តរភាព និងសុវត្ថិភាព” ក្រោមអធិបតីភាព​ដ៏ខ្ពង់ខ្ពស់ លោក គង់ ភាជ ប្រធានយកដ្ឋានកសិ-ឧស្សាហកម្ម នៃក្រសួងកសិកម្ម រុក្ខាប្រមាញ់ និងនេសាទ និង លោកបណ្ឌិត វ៉ាង ស៊ាំងសឺ លេខាទី២ នៃការិយាល័យប្រឹក្សា សេដ្ឋកិច្ច និងពាណិជ្ជកម្ម នៃតំណាងស្ថានទូតសាធារណៈរដ្ឋប្រជាមានិតចិន ប្រចាំព្រះរាជាណាចក្រកម្ពុជា ទទួលបន្ទុក ការងារកសិកម្ម ដោយមានការសហការជាមួយមជ្ឈមណ្ឌលសេវាសហប្រតិបត្តិការ​អន្តរជាតិនៃក្រសួងកសិកម្ម និងកិច្ចការជនបទ នៃសាធារណៈរដ្ឋប្រជាមានិតចិន និងមានការគាំទ្រថវិកាដោយ មជ្ឈមណ្ឌលបណ្តុះបណ្តាលនៃក្រសួងពាណិជ្ជកម្មសារធារណរដ្ឋប្រជាមានិតចិន ដោយមានការអញ្ជើញចូលរួមប្រមាណ ៥០នាក់ ដែល មកពីនាយកដ្ឋានកសិ-ឧស្សាហកម្ម,មន្ទីរកសិកម្ម រុក្ខាប្រមាញ់ និងនេសាទខេត្តកណ្ដាល, មន្ទីរកសិកម្ម រុក្ខាប្រមាញ់ និងនេសាទរាជធានីភ្នំពេញ, សាកលវិទ្យាល័យភូមិន្ទកសិកម្ម និងសាលាជាតិកសិកម្មព្រែកលៀបផងដែរ។ គោលបំណងនៃការរៀបចំសិក្ខាសាលានេះឡើងគឺដើម្បីកសាងសមត្ថភាព និងការបង្ហាញពីផ្នត់គំនិត និងបច្ចេកវិទ្យាចុងក្រោយ ទៅដល់សិក្ខាកាមទាំងអស់ និងការគាំទ្រដល់ការអភិវឌ្ឍប្រកបដោយនិរន្តរភាព និងសុវត្ថិភាព។ ក្នុងនោះដែរក៏មានការចូលរួមធ្វើបទបង្ហាញពីអ្នកជំនាញការជាន់ខ្ពស់ចិនចំនួន ០៣រូប ទី១ លោកបណ្ឌិត ចាង ឆាវ ប្រធានក្រុមអ្នកជំនាញការជាន់ខ្ពស់កសិកម្មចិន ធ្វើបទបង្ហាញស្ដីពី “ការអភិវឌ្ឍ បញ្ហាប្រឈមក្នុងកសិ-ឧស្សាហកម្ម និងអនាគត” ទី២ លោកបណ្ឌិត លី ជុនយ៉ាង សមាជិកក្រុមអ្នកជំនាញការជាន់ខ្ពស់កសិកម្មចិន ធ្វើបទបង្ហាញស្ដីពី “បច្ចេកវិទ្យា កែច្នៃកសិផល Seabuckthorn និងអត្ថប្រយោធន៍របស់វា” និងទី៣ លោកបណ្ឌិត ហាន់ យូ សមាជិកក្រុមអ្នកជំនាញការជាន់ខ្ពស់កសិកម្មចិន ធ្វើបទបង្ហាញស្ដីពី “ការធានា គុណភាព និងសុវត្ថិភាពផលិតផលកសិកម្ម និងចំណីអាហារ” ព្រមទាំងមានការចុះទស្សនកិច្ចសិក្សារោងចក្រផលិតដំណាប់ផ្លែឈើ បឹងកេត ផ្លេនធីង & អ៊ិនដាសស្ទ្រៀល ឯ.ក នៅខេត្តកំពង់ស្ពឺ។