ឯកឧត្តមអនុរដ្ឋលេខាធិការ ប៉ុល សុផា អញ្ជើញចូលរួមបើកសិក្ខាសាលា ស្ដីពីភាពជាដៃគូពហុភាគីលើអនុវិស័យកៅស៊ូធម្មជាតិ នៅសណ្ឋាគារ Anik Palace រាជធានីភ្នំពេញ

ចេញ​ផ្សាយ​ ២១ មីនា ២០២៥ 2669

នៅព្រឹកថ្ងៃទី១៩ ខែមីនា ឆ្នាំ២០២៥នេះ ឯកឧត្តម ប៉ុល សុផា អនុរដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ  បានអញ្ជើញបើកសិក្ខាសាលាភាពជាដៃគូពហុភាគីលើអនុវិស័យកៅស៊ូធម្មជាតិ នៅសណ្ឋាគារ Anik Palace រាជធានីភ្នំពេញ។

សិក្ខាសាលា នេះមានការអញ្ជើញចូលរួមពីថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ អគ្គនាយកដ្ឋានកៅស៊ូ វិទ្យាស្ថានស្រាវជ្រាវកៅស៊ូ អង្គការWWFកម្ពុជា សមាគមCamboDHRRA អង្គការNGO Forum តំណាងក្រុមហ៊ុនចម្ការកៅស៊ូមេមត់ ក្រុមហ៊ុនចម្ការកៅស៊ូជប់ ក្រុមហ៊ុនបាវមេន អ៊ិនដាសស្រ្ទី ឯ.ក និងសហគមន៍កៅស៊ូគ្រួសារ សរុបចំនួន៩៦នាក់។

សិក្ខាសាលាធ្វើឡើងក្នុងគោលបំណងលើកកម្ពស់ខ្សែច្រវាក់តម្លៃកៅស៊ូ និងការចូលរួមរបស់ភាគីពាក់ព័ន្ធ លើកកម្ពស់ខ្សែច្រវាក់តម្លៃកៅស៊ូធម្មជាតិនៅកម្ពុជា។

ក្នុងអង្គពិធី ឯកឧត្តមអនុរដ្ឋលេខាធិការ បានវាយតម្លៃខ្ពស់អំពីសារៈសំខាន់នៃសិក្ខាសាលាថ្ងៃនេះ ពីព្រោះសិក្ខាសាលាជាឱកាសដ៏ល្អ សម្រាប់គ្រប់ភាគីពាក់ព័ន្ធបានជួបពិភាក្សាផ្លាស់ប្តូរគំនិត យោបល់ បទពិសោធន៍ ពិនិត្យលើបញ្ហាប្រឈម ចំណុចខ្លាំង ចំណុចខ្សោយ និងរិះរកដាក់ចេញនូវវិធានការ ដំណោះស្រាយ ព្រមទាំងផ្តល់ គំនិតផ្តួចផ្តើមថ្មីៗថែមទៀត ប្រកបដោយភាពវៃឆ្លាត ដើម្បីអភិវឌ្ឍន៍អនុវិស័យកៅស៊ូនៅកម្ពុជាឱ្យមានការអភិវឌ្ឍ និងប្រកបដោយនិរន្តរភាព។

ទន្ទឹមនឹងនេះ ឯកឧត្តមអនុរដ្ឋលេខាធិការ បានណែនាំទៅសិក្ខាកាមទាំងអស់មិនត្រូវមើលរំលងអំពីការអនុវត្តយន្តការតាមដាន ត្រួតពិនិត្យ និងវាយតម្លៃ ទៅលើសកម្មភាព ដែលបានដាក់ចេញឱ្យបានជាក់លាក់ សំដៅសម្រេចឱ្យបាននូវសមិទ្ធិផលថ្មីៗថែមទៀត ដើម្បីអភិវឌ្ឍន៍អនុវិស័យកៅស៊ូឆ្ពោះទៅកាន់ភាពរីកចម្រើនប្រកបដោយសក្តានុពល។ ជាចុងបញ្ចប់ ឯកឧត្តម ក៏បានស្នើឱ្យដៃគូអភិវឌ្ឃន៍ និងអង្គការសង្គមស៊ីវិល ដែលបាននិងកំពុងធ្វើសកម្មភាពគាំទ្រដល់អនុវិស័យកៅស៊ូ ត្រូវបន្តគាំទ្រដល់សហគមន៍ កសិកម្មកៅស៊ូគ្រួសារទាំងនោះបន្ថែមទៀត ដើម្បីប្រែក្លាយទៅជាសហគមន៍កសិកម្មទំនើបពេញលេញ ស្របទៅនឹងគោលនយោបាយរបស់ក្រសួងកសិកម្ម រុក្ខាប្រមាញ់ និងនេសាទ៕