ឯកឧត្តមរដ្ឋលេខាធិការ ហ៊ាន វណ្ណហន អញ្ជើញដឹកនាំក្រុមការងារគម្រោង LASED III ចុះពិនិត្យស្ថានភាពផលិតកម្មបន្លែ នៅខេត្ដកំពត

ចេញ​ផ្សាយ​ ៣ តុលា ២០២៥ 775

នៅព្រឹកថ្ងៃទី៣ ខែតុលា ឆ្នាំ២០២៥ ឯកឧត្តម ហ៊ាន វណ្ណហន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាអនុប្រធានគណៈកម្មការដឹកនាំគម្រោងបែងចែកដីដើម្បីសង្គមកិច្ច និងការអភិវឌ្ឍសេដ្ឋកិច្ច ដំណាក់កាលទី៣ (LASED III) បានអញ្ជើញដឹកនាំក្រុមការងារអនុវត្ដគម្រោង LASED III នៃក្រសួងកសិកម្មរុក្ខាប្រមាញ់ និងនេសាទ អមដោយលោកប្រធានមន្ទីរខេត្ដកំពត ដើម្បីពិនិត្យស្ថានភាព និងសក្ដានុពលផលិតកម្មបន្លែនៅក្នុងខេត្តកំពត។ 
ក្នុងដំណើរបេសកកម្ម ឯកឧត្ដម រួមនឹងក្រុមការងារ អាជ្ញាធរមូលដ្ឋាន បានជួបសំេណះសំណាល និងពិនិត្យការដាំដុះដំណាំបន្លែចម្រុះនៅទីវាលរបស់កសិករ លោក ស្រ៊ន សារឿន លើផ្ទៃដីទំហំ ៦ ហិកតា នៅភូមិកូនសត្វ ឃុំកូនសត្វ ស្រុកទឹកឈូ។ បន្លែចម្រុះមានដូចជា បន្លែខាត់ណា ស្ពៃក្ដោប ស្ពៃចង្កឹះ ស្ពៃតឿ ស្ពៃក្រញាញ់ ស្ពៃឆាយស៊ីម និងសាឡាដ សម្រាប់ផ្គត់ផ្គង់ជូនអតិថិជននៅខេត្តព្រះសីហនុ កំពត តាកែវ កែប កោះកុង និងរាជធានីភ្នំពេញ។ បច្ចុប្បន្ន កសិកររូបនេះក៏កំពុងគ្រោងពង្រីកផ្ទៃដីដាំដុះ និងផលិតកម្មបន្លែចំនួន៥ ហិកតា បន្ថែមទៀត ដែលគាត់នឹងត្រូវការកម្លាំងពលកម្មដើម្បីជួយការងារបន្ថែមទៀត។ 
ឯកឧត្តមរដ្ឋលេខាធិការ បានកោតសរសើរ និងលើកទឹកចិត្តដល់កសិករឆ្នើមរូបនេះ ឱ្យបន្ដខិតខំប្រឹងប្រែងបង្កើនផលិតកម្មបន្លែ ដើម្បីជាការរួមចំណែកលើការផ្គត់ផ្គង់បន្លែក្នុងស្រុក បង្កើតការងារដល់ពលរដ្ឋក្នុងតំបន់។ លើសពីនេះទៀត ឯកឧត្ដមក៏បានស្នើគម្រោងពិនិត្យលទ្ធភាពជួយគាំទ្របន្ថែមតាមរយ:មន្ទីរកសិកម្មខេត្ដ តាមលទ្ធភាព ស្របតាមគោលដៅ និងលក្ខខណ្ឌគម្រោង លើបច្ចេកទេសដាំដុះ វគ្គបណ្តុះបណ្តាល ពិសេសផលិតកម្មបន្លែក្នុងផ្ទះសំណាញ់ និងការចូលរួមទស្សនៈកិច្ចសិក្សាផងដែរ៕