ឯកឧត្តមបណ្ឌិត មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញជាអធិបតីក្នុងពិធីបើកវគ្គបណ្តុះបណ្តាលគ្រូបង្គោល ស្ដីពី បច្ចេកវិទ្យាផលិត និងគ្រប់គ្រងផលបន្លែ និងស្វាយ

ចេញ​ផ្សាយ​ ៤ កុម្ភៈ ២០២៦ 1515

នៅព្រឹកថ្ងៃទី៤ ខែកុម្ភៈ ឆ្នាំ២០២៦ ឯកឧត្តមបណ្ឌិត មាស ពិសិដ្ឋ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានធ្វើជាប្រធានគណៈអធិបតីក្នុងពិធីបើកវគ្គបណ្តុះបណ្តាលគ្រូបង្គោល ស្ដីពី បច្ចេកវិទ្យាផលិត និងគ្រប់គ្រងផលបន្លែ និងស្វាយ នៅទីរួមខេត្តកំពង់ចាម។
វគ្គបណ្តុះបណ្តាល ដែលត្រូវបានរៀបចំ និងដំណើរការដោយ កម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) ដែលជាយន្តការមួយរបស់ក្រសួងកសិកម្ម រុក្ខាប្រមាញ់ និងនេសាទនេះ ត្រូវបានចូលរួមដោយសិក្ខាកាមសរុបចំនួន ៣៣ នាក់ ក្នុងនោះមានស្រ្តី ៧ នាក់ ។ អ្នកទាំងនោះជាមន្ត្រីបច្ចេកទេសនៃក្រសួងកសិកម្ម រុក្ខាប្រមាញ់ និងនេសាទ មន្ត្រីបច្ចេកទេសនៃមន្ទីរកសិកម្ម រុក្ខាប្រមាញ់ និងនេសាទខេត្តចំនួន ២១ ទីប្រឹក្សានៃកម្មវិធី ASPIRE-AT និងបុគ្គលិកបច្ចេកទេសនៃក្រុមហ៊ុនទីប្រឹក្សាផ្នែកពង្រឹងសមត្ថភាពសហគមន៍កសិកម្ម។
ជាគោលបំណងសំខាន់របស់វគ្គ គឺធ្វើឱ្យមានគ្រូ ឬ អ្នកបណ្តុះបណ្តាលកាន់តែល្អ និងកាន់តែច្រើន សម្រាប់រួមចំណែកបង្កើន និងពង្រឹងសមត្ថភាពកសិករ និងអ្នកគ្រប់គ្រងសហគមន៍កសិកម្ម ក្នុងការបង្កើនផលិតភាព និងគុណភាពផលិតផលកសិកម្មទាំង ២ នេះ ។ ក្នុងនោះគឺឱ្យអាចដោះស្រាយបញ្ហា ឬ ឧបសគ្គផ្សេងៗបានកាន់តែប្រសើរ ជាពិសេសបញ្ហាដែលបង្កដោយការប្រែប្រួលអាកាសធាតុ ហើយអាចនឹងលក់ផលិតផលបានច្រើន និងទទួលបានប្រាក់ចំណេញសមស្រប ។
នៅក្នុងពិធីបើក ឯកឧត្តមរដ្ឋលេខាធិការបានលើកឡើងអំពីការយកចិត្តទុកដាក់របស់រាជរដ្ឋាភិបាលកម្ពុជា ជាពិសេសក្រសួងកសិកម្ម រុក្ខាប្រមាញ់ និងនេសាទ ក្នុងការបន្តពង្រឹង និងអភិវឌ្ឍវិស័យកសិកម្មជាតិ ជាពិសេសដើម្បីធ្វើឱ្យប្រជាជនមានស្បៀងអាហារកាន់តែល្អ និងគ្រប់គ្រាន់ រួមចំណែកបង្កើនសេដ្ឋកិច្ចជាតិ និងបង្កើនជីវភាពរបស់កសិករ។ ឯកឧត្តមក៏បានគូសបញ្ជាក់ផងដែរថា ចំណុចសំខាន់ៗ ដែលគ្រូ និងសិក្ខាកាមត្រូវយកចិត្តទុកដាក់ និងព្យាយាមធ្វើឱ្យបាន គឺការកែលម្អសមត្ថភាព និងភាពមានតម្លៃរបស់គ្រូ ដោយ ៖ ១)  បង្កើនចំណេះដឹងបច្ចេកទេសស្តីពីការផលិត និងគ្រប់គ្រងផល និង ២) បង្កើនភាពប៉ិនប្រសប់ ឬ ទេពកោសល្យក្នុងការបង្រៀន ឬ បណ្តុះបណ្តាល៕