ឯកឧត្តមរដ្ឋមន្ត្រី និងឯកឧត្ដមអភិបាលខេត្ត បានធ្វើដំណើរមកពិនិត្យកសិដ្ឋានចិញ្ចឹមទា

ចេញ​ផ្សាយ​ ០៩ កញ្ញា ២០១៩ 4435

នៅរសៀលថ្ងៃដដែល ឯកឧត្តមរដ្ឋមន្ត្រី និងឯកឧត្ដមអភិបាលខេត្ត បានធ្វើដំណើរមកពិនិត្យកសិដ្ឋានចិញ្ចឹមទារបស់លោក អ៊ុំ ឃាង (លេខទូរស័ព្ទទាក់ទង ០១២ ៦៥ ៤០ ១៤) និងសមាគមភ្ញាស់ពងទាកូន នៅភូមិក្រាំងស្វាយ ឃុំស្រែននោង ស្រុកត្រាំកក់។ លោក អ៊ុំ ឃាង បានឲ្យដឹងថាបច្ចុប្បន្នគាត់ចិញ្ចឹមមេទា ១០ ០០០ក្បាល ក្នុង១ថ្ងៃមេទាអាចផ្តល់ពងបាន ៧ ០០០-៨០០០ពាន់គ្រាប់ តម្លៃស៊ុតបច្ចុប្បន្ន ៣៨០-៤០០រៀល/គ្រាប់។ ដោយឡែក លោក សូត្រ សុផល ប្រធានសមាគនភ្ញាស់ស៊ុតទា (លេខទូរស័ព្ទទាក់ទង ០១២ ៦២ ៤៧ ២០) បានជម្រាបជូនថា សមាគមមានសមាជិក ២៦គ្រួសារ គ្រប់ៗគ្រួសារប្រកបអាជីវកម្មភ្ញាស់ស៊ុតទាយកកូនលក់ ៩០០រៀល/ក្បាល និងលក់ជាពងទាកូន /គ្រាប់។ សម្រាប់ឡភ្ញាស់របស់លោក សុផល អាចទទួលទិញស៊ុត ៩-១០ម៉ឺនគ្រាប់ក្នុង១ថ្ងៃ។ ក្នុងរដូវចិញ្ចឹម ១ថ្ងៃជាមធ្យមអាចរក ចំណូលបាន ៣៨០ ០០០រៀល ក្នុង ១ខែប្រមាណ ១១ ៤០០ ០០០ រៀល បន្ទាប់ពីទូទាត់ថ្លៃដើមរួច។ លោកក៏បានបញ្ជាក់ជូនលោករដ្ឋមន្ត្រីជ្រាបផងដែរពីកត្តាចំបងដែលធ្វើឲ្យលោកទទួលបានជោគ ជ័យគឺមានចំណង់ចំណូលចិត្ត ឧស្សាហ៍ព្យាយាម យកចិត្តទុកដាក់ និងមានផែនការច្បាស់លាស់។

ឆ្លៀតយកឱកាសនេះ លោករដ្ឋមន្ត្រី និងលោកអភិបាលខេត្ត បានជួបសំណេះសំណាលជាមួយសមាជិកសមាគម ក្នុងនាមថ្នាក់ដឹកនាំក្រសួង និងថ្នាក់ដឹកនាំនៅមូលដ្ឋាន បានពាំនាំនូវការផ្តាំផ្ញើសាកសួរសុខទុក្ខពីសម្តេចតេជោនាយករដ្ឋមន្រ្តី សម្តេចកិត្តិព្រឹត្តបណ្ឌិត សម្តេចមហាពញាចក្រីប្រធានរដ្ឋសភា និងសម្តេចវិបុលសេនាភក្តីប្រធានព្រឹទ្ធសភា ដែលសម្តេចតែងតែគិតគូពីសុខទុក្ខ បញ្ហាជីវភាពរបស់បងប្អូនគ្រប់ពេលវេលា បើទោះបីសម្តេចមិនបានអញ្ជើញចុះមកដោយផ្ទាល់ ប៉ុន្តែទឹកចិត្តគោរព ស្រឡាញ់ និងបេះដូងរបស់សម្តេចគឺស្ថិតនៅជាប់បងប្អូនគ្រប់ពេលវេលា និងគ្រប់កាល:ទេស: ហើយសម្តេចទាំង៤ បានជូនពរឲ្យបងប្អូនប្រជាពលរដ្ឋយើងជួបតែពុទ្ធពរទាំង៤ ប្រការគ្រប់ៗគ្នា។ សាកសួរនាំអំពីសុខទុក្ខ សកម្មភាពការងារបង្កបង្កើនផល ជាពិសេសការងារចិញ្ចឹម និងភ្ញាស់ស៊ុតទាដែលជារបរប្រចាំគ្រួសារ និងប្រចាំតំបន់ (ពងទាកូនស្រែននោង) រួចមក លោករដ្ឋមន្ត្រី និងលោកអភិបាលខេត្តក្តាប់បានពីចំណុចខ្លាំង និងចំណុចខ្សោយ និងសំណូមពរ ក៏ដូចជាសេចក្តីត្រូវការជាក់ស្តែងដែលទាមទារឲ្យគ្រប់តួអង្គពាក់ព័ន្ធរួមសហការគ្នាដោះស្រាយជួនប្រជាពលរដ្ឋឲ្យបានទាន់ពេលវេលា និងមានប្រសិទ្ធភាព។ ដោយឡែកចំពោះការងារបច្ចេកទេសចិញ្ចឹម និងភ្ញាស់ស៊ុតទា លោករដ្ឋមន្ត្រីបានធ្វើការណែនាំឲ្យមន្ទីរ សហការជាមួយអគ្គនាយកដ្ឋានសុខភាពសត្វ និងផលិតកម្មសត្វ ធ្វើការផ្សព្វផ្សាយ ឬបំពាក់បំប៉នបច្ចេកទេសចិញ្ចឹម វិធានការការពារជំងឹ ការលើកកម្ពស់អនាម័យ និងការអនុវត្តវិធានជីវសុវត្ថិភាពនៅឡភ្ញាស់ស៊ុតទាឲ្យបានប្រសើរ ក្នុងបំណងបង្កើនគុណភាព និងការជឿទុកចិត្តពីអតិថិជន ដែលនិយមបរិភោគពងទាកូន។