ព័ត៌មានផ្សេងៗទៀត
ឯកឧត្តមបណ្ឌិតរដ្ឋលេខាធិការ មាស ពិសិដ្ឋ អញ្ជើញដឹកនាំកិច្ចប្រជុំ ស្តីពី «ការពិនិត្យ និងវាយតម្លៃការអនុវត្តន៍គម្រោងអភិវឌ្ឍន៍ធំៗ»
ចេញផ្សាយ ២១ សីហា ២០២៥ 947
នៅថ្ងៃទី១៩ ខែសីហា ឆ្នាំ២០២៥ ឯកឧត្តមបណ្ឌិត មាស ពិសិដ្ឋ រដ្ឋលេខាធិការ ក្រសួងកសិកម្ម រុក្ខាប្រមាញ់ និងនេសាទ បានដឹកនាំកិច្ចប្រជុំ ស្តីពី «ការពិនិត្យ និងវាយតម្លៃការអនុវត្តន៍គម្រោងអភិវឌ្ឍន៍ធំៗ» នៅទីស្តីការក្រសួងកសិកម្ម រុក្ខាប្រមាញ់ និងនេសាទ។
កិច្ចប្រជុំមានការចូលរួមពីថ្នាក់ដឹកនាំ និងមន្រ្តីក្រសួងកសិកម្ម រុក្ខាប្រមាញ់ និងនេសាទ ដែលជាអ្នកតម្រង់ទិស និងគ្រប់គ្រងគម្រោងអភិវឌ្ឍន៍ សមាជិកអង្គភាពសម្របសម្រួលគម្រោងអភិវឌ្ឍន៍ និងមន្រ្តីលេខាធិការដ្ឋានកម្មវិធីគាំទ្រសេដ្ឋកិច្ចជនបទ និងពាណិជ្ជកម្មផលិតផលកសិកម្ម (ASPIRE-AT) សរុបអ្នកចូលរួមចំនួន៧៣នាក់។
ជាកិច្ចចាប់ផ្តើម ឯកឧត្តមរដ្ឋលេខាធិការ បានលើកឡើងអំពីគោលបំណងនៃកិច្ចប្រជុំ និងអនុសាសន៍សំខាន់ៗ របស់ឯកឧត្តមរដ្ឋមន្ត្រី និងផ្តល់ឱកាសដល់អង្គប្រជុំធ្វើការពិភាក្សា អំពីគម្រោងអភិវឌ្ឍន៍ធំៗចំនួន១៣ ដោយផ្តោតសំខាន់លើលទ្ធផល បញ្ហាប្រឈម ដើម្បីបង្កើនប្រសិទ្ធភាព សម្រេចគោលដៅ និងរួមចំណែកដោះស្រាយបញ្ហាប្រឈមសំខាន់ៗ នៅក្នុងវិស័យ ឱ្យស្របទៅនឹងកម្មវិធីគោលនយោបាយ និងយុទ្ធសាស្ត្រថ្មី។
ជាលទ្ធផលនៃកិច្ចប្រជុំ បានសម្រេចនូវចំណុចរួមមាន៖ ១.ទទួលបានព័ត៌មាន ចំណេះដឹង និងយោបល់ល្អៗ ពីអនុវិស័យផ្សេងៗ ២.វិធីសាស្រ្តអនុវត្តឱ្យកាន់តែមានប្រសិទ្ធភាព ៣.គម្រោងអភិវឌ្ឍន៍ជាយន្តការសំខាន់របស់ក្រសួង និងរដ្ឋាភិបាល ដែលត្រូវគ្រប់គ្រង ៤.ត្រូវធ្វើឱ្យកសិករ អ្នកទទួលផល និងអ្នកពាក់ព័ន្ធទុកចិត្តថាអ្វីដែលគម្រោងបានធ្វើ នឹងផ្តល់ផលប្រយោជន៍ជូនគាត់ ៥.ត្រូវធ្វើឱ្យប្រាកដថា គម្រោងផ្តល់ភាពចំណេញដល់អ្នកទទួលផល ពោលគឺមាននិរន្តរភាពសេដ្ឋកិច្ច និងនិរន្តរភាពបរិស្ថាន ៦.មុនពេលផ្តើមអនុវត្តគម្រោងត្រូវដឹងនីតិវិធីលទ្ធកម្មជាមុន ជៀសវាងការចំណាយពេលវេលាច្រើន៕
