ឯកឧត្តម ឃុន សាវឿន រដ្ឋលេខាធិកាក្រសួងកសិកម្ម ដឹកនាំក្រុមការងារ ប្រជុំជាមួយដៃគូរអភិវឌ្ឍន៍ ដើម្បីពិភាក្សាលើការរៀបចំតាំងពិព័រណ៍វារីវប្បកម្ម

ចេញ​ផ្សាយ​ ១ មីនា ២០២៤ 3573

នៅថ្ងៃទី២៩ ខែកុម្ភៈ ឆ្នាំ២០២៤ ឯកឧត្តម ឃុន សាវឿន រដ្ឋលេខាធិកាក្រសួងកសិកម្ម រុក្ខាប្រមាញ់ និងនេសាទ ទទួលបន្ទុកវារីវប្បកម្ម បានដឹកនាំក្រុមការងារចូលរួមកិច្ចប្រជុំជាមួយដៃគូរអភិវឌ្ឍន៍ ដើម្បីពិភាក្សាលើការរៀបចំតាំងពិព័រណ៍វារីវប្បកម្ម នៅសាលប្រជុំនៃរដ្ឋបាលជលផល រាជធានីភ្នំពេញ។

ឯកឧត្តម ឃុន សាវឿន មានប្រសាសន៍ថា បន្ទាប់ពីទទួលបានការណែនាំដ៏ខ្ពង់ខ្ពស់ពី ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ព្រមទាំងឆ្លងកាត់ការពិភាក្សាជាមួយថ្នាក់ដឹកនាំទទួលបន្ទុកវារីវប្បកម្ម អង្គប្រជុំនេះ ត្រូវបានរៀបចំឡើងក្នុងគោលបំណងពិភាក្សាលើការរៀបចំពិព័រណ៍វារីវប្បកម្ម ដើម្បីផ្សារភ្ជាប់ទំនាក់ទំនងរវាងអ្នកផ្គត់ផ្គង់ធាតុចូលវារីវប្បកម្ម កសិករផលិត និងអ្នកប្រើប្រាស់។

បើតាមឯកឧត្តម ឃុន សាវឿន គំនិតផ្តួចផ្តើមរៀបចំពិព័រណ៍នេះ គឺដើម្បីផ្សារភ្ជាប់ទំនាក់ទំនងរបស់តួអង្គពាក់ព័ន្ធនឹងវារីវប្បកម្ម បង្ហាញផលិតផលវារីវប្បកម្មដែលផលិតបាននៅក្នុងប្រទេសកម្ពុជា ក៏ដូចជាផ្តល់ទំនុកចិត្តដល់អ្នកបរិភោគ។

ចំណែក លោកបណ្ឌិត ហាវ វិសិដ្ឋ បានលើកឡើងថា ការរៀបចំពិព័រណ៍វារីវប្បកម្មលើកដំបូង ដើម្បីផ្សព្វផ្សាយផលិតផលវារីវប្បកម្មក្នុងស្រុកដល់មហាជនឱ្យបានស្គាល់កាន់តែច្បាស់ មានទំនុកចិត្តក្នុងការបរិភោគ និងត្រូវស្វែងរកដៃគូសហការក្នុងការរៀបចំយកផលិតផលមកតាំងបង្ហាញ។

ជាលទ្ធផលនៃកិច្ចប្រជុំ ក្រុមការងារសម្រេចកំណត់យកថ្ងៃទី២៤-២៦ ខែឧសភា ឆ្នាំ២០២៤ សម្រាប់ធ្វើកម្មវិធីពិព័រណ៍វារីវប្បកម្មកម្ពុជា នៅវិទ្យាស្ថានជាតិកសិកម្មព្រែកលៀប។ កំណត់ក្រុមគោលដៅសំខាន់ក្នុងកម្មវិធីរួមមាន អ្នកឧបត្ថម្ភ ម្ចាស់កសិដ្ឋានចិញ្ចឹមវារីសត្វក្នុងស្រុក និងអ្នកកែច្នៃជាដើម៕