ឯកឧត្តមរដ្ឋលេខាធិការ ប្រាក់ ដាវីដ អញ្ជើញចូលរួមកិច្ចប្រជុំផ្សព្វផ្សាយកម្មវិធីវេទិកា និងពិព័រណ៍កសិកម្មកម្ពុជាឆ្នាំ២០២៥ (CAFE25)

ចេញ​ផ្សាយ​ ២ តុលា ២០២៥ 861

នាថ្ងៃទី២ ខែតុលា ឆ្នាំ២០២៥ ឯកឧត្តម ប្រាក់ ដាវីដ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ បានអញ្ជើញចូលរួមកិច្ចប្រជុំផ្សព្វផ្សាយកម្មវិធីវេទិកា និងពិព័រណ៍កសិកម្មកម្ពុជាឆ្នាំ២០២៥ (CAFE25) តាមប្រព័ន្ធវីដេអូ Zoom និងមានការអញ្ជើញចូលរួមផងដែរពីសំណាក់តំណាងក្រសួងស្ថាប័នពាក់ព័ន្ធ បណ្តាអង្គទូតនានានៅកម្ពុជានិងស្ថានទូតកម្ពុជានៅក្រៅប្រទេស អង្គការ(FAO) ដៃគូអភិវឌ្ឍន៍ អង្គការពាក់ព័ន្ធ និងវិស័យឯកជន។
ក្នុងកិច្ចប្រជុំនេះ ឯកឧត្តមរដ្ឋលេខាធិការ បានជម្រាបជូនដល់អង្គប្រជុំទាំងមូលពីការប្រព្រឹត្តិទៅនូវកម្មវិធី CAFE25 ដែលបានគិតគូររៀបចំយ៉ាងល្អិតល្អន់ និងបានលើកឡើងពីកសិផលសក្តានុពលរបស់កម្ពុជាជាច្រើនប្រភេទ ដែលជាឱកាសសម្រាប់វិនិយោគិនជាតិនិងអន្តរជាតិក្នុងការចាប់យក សំដៅលើកកម្ពស់ការកែច្នៃ វេចខ្ចប់ ខណៈកម្ពុជាមានកសិផលដែលមានគុណភាពខ្ពស់ និងមានច្បាប់ស្តីពីការវិនិយោគ ដែលជួយគាំទ្រដល់រាល់វិនិយោគិនឱ្យទទួលបានអត្ថប្រយោជន៍ជាច្រើន និងក្របខណ្ឌច្បាប់ដែលអំណោយផលដល់ការវិនិយោគផងដែរ។
សូមបញ្ជាក់ជូនថា កម្មវិធីវេទិកា និងពិព័រណ៍កសិកម្មកម្ពុជាឆ្នាំ២០២៥ (CAFE25) នឹងប្រព្រឹត្តិទៅនៅថ្ងៃទី១៣ ដល់ថ្ងៃទី១៦ ខែវិច្ឆិកា ឆ្នាំ២០២៥ ដែលជាវេទិកាជាប្រវត្តិសាស្រ្តដ៏ធំ លើកទីមួយ សម្រាប់វិស័យកសិកម្មកម្ពុជា ក្នុងការផ្គូរផ្គង់អ្នកផលិតកម្ពុជាជាមួយនឹងវិនិយោគិនក្នុងស្រុក និងក្រៅប្រទេស ជំរុញការពង្រឹងខ្សែច្រវាក់តម្លៃនិងផលិតកម្ម និងបង្កើនទំហំពាណិជ្ជកម្មនាំចេញកសិផលកម្ពុជាទៅកាន់ទីផ្សារអន្តរជាតិ៕